Cuerpo Gobernante amo miakej tlakamej tlen kiyekanaj tekitl tlen kichiuaj iTlaixpantijkauan Jehová itech nochi tlaltikpak. Nin tekitl kichiuaj:

•   Kitaj ma kipiakan tlamachtilmej tlen uits itech amatlajkuilolmej tlen ika momachtiaj itech innechikoluan uan itech tlamachtilmej tlen kipiaj iTlaixpantijkauan Jehová (Lucas 12:42).

•   Yejuan kiyekanaj tekitl tlen kichiuaj iTlaixpantijkauan Jehová itech nochi tlaltikpak. Nin kijtosneki kitaj ma motetlapoui uan kitaj kuali mamotekitilti tomin noso okseki tlamantli.

 Cuerpo Gobernante kichiuaj ken “tlayakankeh de n tokniwah de Jerusalén” itech achto siglo. Yejuan okijtouayaj tlen mochiuaskia uan nochtin oksekimej tlapejpenalmej ijkon okichiuayaj (Hechos 15:2). Axkan noijki, Cuerpo Gobernante amo kimoaxkatiaj ialtepe Jehová, ijkon ken okichijkej tlakamej tlen otlayekanayaj itech achto siglo amo okimoaxkatijkej ialtepe Jehová. Yejuan nochipa kuali momachtiaj iTlajtol toTajtsin Dios uan kuali kimatokej Jehová okitlali Jesús makiyekana tlanechikol (1 Corintios 11:3; Efesios 5:23).

 Poui itech Cuerpo Gobernante Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane uan Jeffrey Winder. Nochtin tekitij itech ueyi altepetl Warwick (Nueva York).

 Akinmej pouij itech Cuerpo Gobernante xexelitokej itech chikuase nechikolmej tlen kitaj mamochiua tlatlamantli tekitl. Sejse kiyekanaj se noso okachi tekitl.

•   Akinmej Tlayekanaj: Kitaj nochi kuali mayeto inmixpan tekiuajkej uan tlapaleuiaj ijkuak tlaxixini uan ijkuak ikaj kipia se ouijkayotl porque amo kikauaj mapoui itech ireligión. Noso ijkuak moneki totoka makinpaleuikan iTlaixpantijkauan Jehová.

•   Akinmej kinpejpenaj akinmej tekitiskej Betel: Kitaj kuali mayetokan akinmej tekitij itech kali Betel tlen katej itech nochi tlaltikpak.

•   Akinmej Tlayekanaj mamochiuakan amatlajkuilolmej: Kitaj mamochiuakan uan mamotitlanikan amatlajkuilolmej tlen kisaj itech Biblia uan kanin uelis mochiuaskej kalmej para kiueyichiuaskej Jehová, kalmej Betel uan kalmej kanin motlajtolkopaj amatlajkuilolmej.

•   Akinmej kiyekanaj Tetlapouilistli: Kitaj mamotetlapoui “itech Tekiuajkayotl [...] itech nochi Tlaltikpak” (Mateo 24:14).

•   Akinmej kiyekanaj Tlamachtil: Kitaj makipiakan tlen momachtiskej itech tlanechikol, itech Tlamachtilmej para akinmej kichiuaj ken Cristo uan noijki tlamachtil ika audio uan video.

•   Akinmej Tlayekanaj mamoijkuilokan amatlajkuilolmej: Kichiuaj tlamachtil tlen kisas itech amatlajkuilolmej tlen kisaj itech Biblia uan noijki tlen yetos itech página tlen tikpiaj itech Internet uan kitaj mamochiua tekitl itech kalmej kanin motlajtolkopaj amatlajkuilolmej.

 Noijki, sejse semana, Cuerpo Gobernante monechikoua para kitas tlen moneki kichiuaskej uan kinpaleuiskej tokniuan. Ijkuak monechikouaj, kitaj tlen kijtoua Biblia uan kikauaj makinyekana iespíritu santo toTajtsin Dios. Uan nochtin motlapouiaj uan mokauaj ijkon kichiuaskej (Hechos 15:25).

 Sejse comité tlen poui itech Cuerpo Gobernante kinpiaj akinmej kinpaleuiaj, ninmej tlakamej uelij uan kipiaj ixtlamatilistli para kichiuaskej tekitl tlen kinmakaj (1 Corintios 4:2). Yejuan monechikouaj sejse semana iuan Cuerpo Gobernante. Maski amo yejuan kipejpenaj tlen kichiuaskej, kema kijtouaj tlen mokuayejyekouaj itech tlen uelis kichiuaskej itech se tlamantli uan kitaj mamochiua tlen omoijto uan ken tlapaleuijtok Cuerpo Gobernante uelis kinmiluiskej ninmej tlakamej mayakan makinmitatij oksekimej tokniuan tlen katej itech okseki altepemej noso matlamachtikan itech seki nechikolmej tlen mochiuaj sejse xiuitl noso ken ijkuak tlami Tlamachtil ika Biblia tlen kichiua Watchtower itech Galaad.