AmaNani 30:1-16
30 UMosi wasekhuluma labakhokheli bezizwana+ zako-Israyeli wathi, “Nanku umlayo ovela kuJehova:
2 Nxa umuntu angenza isifungo+ kuJehova kumbe enze isithembiso+ sokuthi uzazila okuthile, kumele agcwalise ilizwi lakhe.+ Kufanele enze konke athembise ukuthi uzakwenza.+
3 “Nxa intombi ingenza isifungo kuJehova kumbe ithembise ukuthi izazila okuthile yona isahlala emzini kayise,
4 uyise abesesizwa ngesifungo sayo kumbe ngesithembiso esenzileyo sokuzila into ethile futhi angaphikisani lakho lokho, zonke izifungo ezenzileyo zizaqhubeka zisebenza futhi zonke izithembiso zokuzila okuthile ezenzileyo zizaqhubeka zisebenza.
5 Kodwa nxa uyise angathi esizwa ukuthi yenze izifungo kumbe ukuthi ithembise ukuzila izinto ezithile abeseyalisa, ekufungileyo akusoze kusebenze. UJehova uzayithethelela ngoba uyise kayivumelanga.+
6 “Nxa intombi leyo ingenda ivele isingaphansi kwesifungo sayo kumbe ingaphansi kwesithembiso esenze ingacabanganga,
7 umkayo abesesizwa ngezifungo lezo kanye lezithembiso ezenzileyo zokuthi izazila okuthile kodwa angayalisi ngalelolanga azizwe ngalo, izifungo lezo zizaqhubeka zisebenza.
8 Kodwa nxa umkayo angathi ekuzwa lokho abeseyalisa ngalelolanga akuzwe ngalo, uyabe enze ukuthi isifungo leso loba isithembiso esenzileyo singasasebenzi+ njalo uJehova uzayithethelela.
9 “Nxa owesifazana ongumfelokazi kumbe odivosileyo angenza isifungo, uyabe ebophekile kukho konke akuthembisileyo.
10 “Kodwa nxa owesifazana angenza isifungo kumbe athembise ukuthi uzazila okuthile, yena engaphansi kophahla lomkakhe,
11 njalo umkakhe ekuzwile lokho futhi engazange ale kumbe aphikisane lakho, zonke izifungo azenzileyo zizaqhubeka zisebenza. Loba yisiphi isithembiso sokuzila okuthile asenzileyo asisoze sitshintshe.
12 Kodwa nxa indoda yakhe ingamalisa ngelanga ekuzwe ngalo lokho, iyabe isicitshe loba yisiphi isifungo asenzileyo kumbe isithembiso sokuzila okuthile asenzileyo, asisoze sisebenze.+ Indoda yakhe yenze ukuthi zingasebenzi njalo uJehova uzamthethelela.
13 Loba yisiphi isifungo kumbe isithembiso esiphathelane lokuzila esenziwa ngowesifazana ukuze azincitshe okuthile, umkakhe nguye ozamnika imvumo yokuthi asigcwalise yini loba hatshi.
14 Kodwa nxa insuku zilokhu ziselekana umkakhe engazange amalise, uyabe esezivumele zonke izifungo lezo kumbe zonke nje izithembiso zokuzila okuthile azenzileyo. Uvumele ukuthi zenziwe ngoba kazange amalise ngelanga amuzwa ngalo efunga.
15 Kodwa nxa angamvimbela ukwenza izifungo lezo ngemva kwesikhathi, ilanga azizwa ngalo selidlulile, umkakhe nguye ozathwala umlandu wecala elenziwe yinkosikazi yakhe.+
16 “Le yiyo imilayo uJehova ayitshela uMosi, ephathelane lendoda lomkayo kanye lobaba lendodakazi yakhe esakhulayo ehlala laye emzini wakhe.”
