IVangeli Elabhalwa NguMathewu 16:1-28
16 Wathi elapho abaFarisi labaSadusi bamlanda bamcela ukuthi abatshengise isibonakaliso esivela ezulwini,+ befuna ukumlinga.
2 Wabaphendula wathi: “Nxa sekuntambama lithi, ‘Umkhathi uzabe umuhle ngoba isibhakabhaka sibomvu njengomlilo,’
3 lekuseni lithi, ‘Lamuhla kuzaqanda njalo lizakuna ngoba isibhakabhaka sibomvu njengomlilo futhi kulamayezi.’ Liyakwazi ukuchasisa ukukhangeleka kwesibhakabhaka kodwa alenelisi ukuchasisa izibonakaliso zezikhathi.
4 Isizukulwane esibi lesingathembekanga* siqhubeka sifuna isibonakaliso, kodwa akulasibonakaliso esizasiphiwa+ ngaphandle kwesibonakaliso sikaJona.”+ Wasesuka wahamba wabatshiya khonapho.
5 Abafundi bachapha baya ngaphetsheya kolwandle bakhohlwa ukuthatha izinkwa.+
6 UJesu wathi kubo: “Hlalani livule amehlo, linanzelele imvubelo yabaFarisi labaSadusi.”+
7 Ngakho baqalisa ukukhuluma ngalokhu bebodwa besithi: “Sikhohlwe ukuthatha izinkwa.”
8 UJesu esazi lokhu wathi: “Kungani likhuluma ngokuthi alilazinkwa lina elilokholo oluncane?
9 Kanti lilokhu lingazwisisi? Alizikhumbuli yini izinkwa ezinhlanu ezadliwa ngabantu abangu-5 000, lokuthi labutha ukudla okuseleyo kwagcwala amabhasikiti amangaki?+
10 Selizikhohliwe yini izinkwa eziyisikhombisa ezidliwe ngabantu abangu-4 000, lokuthi libuthe ukudla okuseleyo kwagcwala amabhasikiti amakhulu* amangaki?+
11 Kungani lingazwisisi ukuthi bengingakhulumi lani ngesinkwa? Nanzelelani imvubelo yabaFarisi labaSadusi.”+
12 Ngakho bazwisisa ukuthi wayesithi bananzelele izinto ezifundiswa ngabaFarisi labaSadusi hatshi imvubelo yesinkwa.
13 UJesu wathi esefike emangweni weKhesariya Filiphi wabuza abafundi bakhe wathi: “Abantu bathi iNdodana yomuntu ingubani?”+
14 Bona bathi: “Abanye bathi inguJohane uMbhabhathizi,+ abanye bathi ingu-Elija,+ abanye bona bathi inguJeremiya loba omunye wabaphrofethi.”
15 Yena wathi kubo: “Kodwa lina lithi ngingubani?”
16 USimoni Phetro waphendula wathi: “UnguKhristu+ iNdodana kaNkulunkulu ophilayo.”+
17 UJesu wasesithi kuye: “Uyathokoza Simoni ndodana kaJona ngoba lokhu awukuvezelwanga ngumuntu,* kodwa ukuvezelwe nguBaba osezulwini.+
18 Kanti njalo ngithi kuwe: Wena unguPhetro,+ futhi phezu kwalelidwala+ ngizakwakha ibandla lami njalo amagedi engcwaba awasoze alehlule.
19 Ngizakunika amakhiye oMbuso wezulu. Loba kuyini ozakubopha emhlabeni kuyabe sekuvele sekubotshiwe ezulwini, njalo loba kuyini ozakuthukulula emhlabeni kuyabe sekuvele sekuthukululiwe ezulwini.”
20 Ngemva kwalokho waqonqosela abafundi ukuthi bangatsheli muntu ukuthi yena unguKhristu.+
21 Kusukela ngalesosikhathi, uJesu waqalisa ukuchasisela abafundi bakhe ukuthi kwakumele aye eJerusalema ahlukuluzwe kakhulu ngabadala labaphristi abakhokhelayo kanye lababhali. Wabachasisela lokuthi kumele abulawe abesevuswa ngelanga lesithathu.+
22 UPhetro uthe esizwa lokhu wamdonsela eceleni wamkhuza wathi: “Zizwele isihawu Nkosi. Lokho ngeke kwenzakale kuwe loba sekutheni.” +
23 Kodwa yena wamfulathela uPhetro wathi kuye: “Yana emva kwami Sathane! Uyisikhubekiso kimi ngoba awucabangi imicabango kaNkulunkulu kodwa ucabanga eyabantu.”+
24 UJesu wasesithi kubafundi bakhe: “Loba ngubani ofuna ukungilandela kazidele athwale isigodo sakhe sokuhlutshwa* aqhubeke engilandela.+
25 Loba ngubani ofuna ukusindisa impilo yakhe* izamlahlekela, kodwa loba ngubani olahlekelwa yimpilo yakhe* ngenxa yami uzayithola.+
26 Kambe umuntu kungamnceda ngani sibili ukuzuza umhlaba wonke kodwa alahlekelwe yimpilo yakhe?*+ Kumbe kuyini umuntu angabhadala ngakho ukuze athole impilo yakhe?*+
27 Phela iNdodana yomuntu izakuza isenkazimulweni kaYise ilezingilosi zayo, ibisinika ngamunye umvuzo wakhe kusiya ngokuthi uziphatha njani.+
28 Ngiqinisile ngithi kini, bakhona abanye abemi lapha abangasoze bafe bengakayiboni iNdodana yomuntu isiza eMbusweni wayo.”+
Amabala angaphansi
^ Kumbe, “lesifebayo.”
^ Kumbe, “amabhasikiti okuthwala ukudla.”
^ NgesiGrikhi, “yinyama legazi.”
^ Khangela iNgcazelo Yamabala.
^ Kumbe, “ngumphefumulo wakhe.”
^ Kumbe, “umphefumulo wakhe.”
^ Kumbe, “ngumphefumulo wakhe.”
^ Kumbe, “umphefumulo wakhe.”
