Okudanisayo yikuthi ngathi sengizabamba iminyaka engu-13, ubungane bami loJehova baqalisa ukuphela. Engangifunda labo babekhanya belenkululeko yokwenza loba yini abayifunayo njalo ngangifisa ukuba njengabo. Ngasengicabanga ukuthi imithetho abazali bami abangifakela yona lendlela okumele siphile ngayo njengamaKhristu kwakungicindezela futhi ngasengibona angani ukukhonza uJehova kungumsebenzi. Ngangingathandabuzi sibili ukuthi uJehova ukhona kodwa ngangingasamthandi kangako.

Kangizange ngiyekele ukutshumayela kodwa inkonzo yami yayisiziqandela nje. Nxa ngangiphuma ekutshumayeleni ngangihamba ngingalungiselelanga yikho ngangithwala nzima ukuqalisa ingxoxo lokuqhubeka ngayo. Lokho kwabangela ukuthi ngingabi lezimpindela lezifundo zeBhayibhili lokuthi ngingakukholisi ukutshumayela njalo ngacina sengikuzonda. Ngangizibuza ukuthi abanye bakwenza njani ukuqhubeka betshumayela khona kuyinto enzima kangaka futhi ebhowayo.

Ngathi sengileminyaka engu-17, ngasengikufuna kakhulu ukukhululeka yikho ngabopha ezami  ngaya e-Australia. Lokhu kwabadanisa abazali bami. Babekhathazekile ngami kodwa babelethemba lokuthi ngizaqhubeka ngikhonza uJehova.

Sengise-Australia, ukwenza izinto eziphathelane lokukhonza kwaba nzima kakhulu. Ngaqalisa ukulova emihlanganweni yebandla njalo ngajayelana labanye abasakhulayo ababenjengami, ababengaboni hlupho ngokuya emihlanganweni yebandla lamuhla, kuthi kusasa ebusuku bayezinathela bagide emaklabhini. Nxa ngikhumbula ngempilo yami ngalesosikhathi ngiyananzelela ukuthi ngangixamalazile. Ngapha ngangikhonza uJehova, ngapha ngisenza izinto zomhlaba. Kodwa akula lapho engangizizwa ngikhululeke khona.

Ngemva kweminyaka engaba mibili, ngazana lomunye udade owangenza ngaqalisa ukucabanga ngokuthi impilo yami yayizaphetha ngani, loba nje wayengakwazi ukuthi unginceda kangakanani. Ngalesosikhathi sasihlala singodade abahlanu abangatshadanga futhi sanxusa umbonisi wesiqinti lomkakhe uTamara ukuthi bazehlala lathi okweviki. Kwakusithi nxa umbonisi wesiqinti ephathekile ngemisebenzi yebandla, uTamara abuye kithi sizixoxele sizihlekela nje. Ngangikuthanda lokho. Wayezehlisa futhi kwakulula ukukhuluma laye. Kwangimangalisa ukuthi kumnandi kangaka ukuba lomuntu okhutheleyo ekukhonzeni uJehova.

UTamara wayetshiseka okuzwayo. Indlela ayethanda ngayo uJehova lenkonzo yenza ngafisa ukuba njengaye. Kwakumthokozisa ukukhonza uJehova ngenhliziyo yonke. Kodwa mina ngangingathokozi ngoba ngangingamkhonzi ngenhliziyo yonke. Indlela ayesenza ngayo layethokoza ngayo yangithinta sibili. Isibonelo sakhe sangenza ngacabanga ngalokho okutshiwo liBhayibhili, ukuthi uJehova ufuna simkhonze “ngenjabulo” ‘langezingoma zokuthokoza.’—Hubo. 100:2.

Ngangifuna ukuthokoza njengoTamara kodwa kwakumele ngiqale ngenze utshintsho olukhulu. Kwangithatha isikhathi ukuthi ngiqalise ukukwenza lokho futhi ngaqalisa ngokwenza izinto ezincane. Ngasengilungiselela ngingakayi  ekutshumayeleni futhi ngangisiba liphayona elisizayo lapha lalapha. Lokhu kwanginceda ukuthi ngingatshaywa kakhulu luvalo lokuthi ngibe lesibindi. Ngaqalisa ukusebenzisa kakhulu iBhayibhili futhi lokho kwangenza ngakholisa ukutshumayela. Kungakayi ngaphi ngaba liphayona elisizayo eliqhubekayo.

Ngaqalisa ukuba labangane beminyaka etshiyeneyo ababesenza kuhle ekukhonzeni futhi beyikholisa inkonzo yabo. Banginceda ngabona ukuthi kuyini okwakumele ngikuqakathekise empilweni lokuthi ngiqalise ukubala iBhayibhili nsuku zonke. Ngasengikholisa okuzwayo ekutshumayeleni futhi ngacina sengiliphayona lesikhathi sonke. Ngasengithokoza futhi sengikhululekile ukuba sebandleni, into okwasekuleminyaka ngayicina.

Ngemva komnyaka ngabonana lo-Alex, umzalwane owayelomusa, elobuntu, ethanda uJehova futhi ethanda lokutshumayela. Wayeyinceku ekhonzayo futhi wayeseleminyaka eyisithupha ephayona. Wayeke wancedisa lapho okulabamemezeli abalutshwana khona eMalawi. Ekhonale wajayelana labanali ababa yizibonelo ezinhle kuye futhi abamkhuthaza ukuthi aqhubeke eqakathekisa izinto eziphathelane lokukhonza.

Satshada ngo-2003 futhi silokhu sisenkonzweni yesikhathi sonke kusukela ngalesosikhathi. Sifunde izinto ezinengi ezinhle njalo uJehova usibusise ngezindlela esingeke sizibale siziqede.

Ngo-2009 sacelwa ukuthi sibe ngabanali eTimor-Leste, ilizwe elincane elisezihlengeni ze-Indonesia. Samangala sathaba kodwa sasisesaba ngesikhathi esifananayo. Ngemva kwezinyanga ezinhlanu safika eDili, isigodlo selizwe lelo.

Impilo eTimor-Leste yayitshiyene lesasivele siyiphila. Kwasekumele sijayele amasiko, ulimi, ukudla lempilo yakhona. Ekutshumayeleni sasijayele ukuhlangana labantu ababengabayanga bokucina, abangafundanga futhi ababethwele nzima.  Kanti njalo sasihlangana labanengi ababelimele ngesikhathi kulempi lodlakela lababelamanxeba enhliziyweni. *

Inkonzo yayimnandi okwamagama. Ngokwesibonelo, ngake ngafunda loMaria, intombazana eyayileminyaka engu-13 njalo eyayihlala idanile. * Wayefelwe ngunina eminyakeni eyayisanda kwedlula njalo wayembona gqo uyise. Wayengakwazi ayefuna ukukwenza empilweni njengabantwana abanengi ababelingana laye. Ngikhumbula ngelinye ilanga ekhala engithululela isifuba sakhe. Ngangingazwisisi ayekutsho ngoba ngangingakalwazi kuhle ulimi lwakhe. Kodwa ngathandaza kuJehova ngimcela ukuthi angincedise ngimkhuthaze ngasengimbalela amavesi aduduzayo. Ngeminyaka emilutshwana eyalandelayo ngabona iBhayibhili limtshintsha. Wayesethokoza, indlela ayegqoka azilungise ngayo layephila ngayo layo yatshintsha. Wabhabhathizwa futhi laye uselezakhe izifundo. Khathesi uMaria usephakathi kwemuli enkulu yabantu bakaJehova futhi uyabona sibili ukuthi uyathandwa.

UJehova uyawubusisa umsebenzi wokutshumayela owenziwa eTimor-Leste. Lanxa abamemezeli abanengi bebhabhathizwe phakathi kweminyaka elitshumi edlulileyo, abanengi sebengamaphayona, izinceku ezikhonzayo labadala. Abanye basebenza ewofisini yokuhumutsha behumutsha amabhuku asekelwe eBhayibhilini ngezindimi zakuleyondawo. Kwakungithokozisa ukubezwa behlabela emihlanganweni yebandla, ukubabona bebobotheka futhi bethuthuka ekukhonzeni.

Impilo esasiyiphila eTimor-Leste yayitshiyene leye-Australia kodwa yayimnandi sibili. Ngezinye izikhathi sasihamba ngomtshova owawugcwele abantu, abanye babo bethwele inhlanzi ezomileyo lamagqibhagqibha ezilimo ababezithenge emakethe. Ngamanye amalanga sasiqhuba isifundo seBhayibhili phakathi kokuyindlwana okwakutshisa futhi kungelasamende phansi, ngapha inkukhu zigijigijima khonapho. Lanxa kwakusiba lobunzima obunje, ngangiyikholisa sibili impilo yakhona.

Ngiyababonga kakhulu abazali bami ngokuthi benza konke okusemandleni abo ukuthi bangifundise ngoJehova futhi bangisekele langesikhathi ngiziqandela ekukhonzeni. UZaga 22:6 ugcwalisekile sibili. Ubaba lomama bayazigqaja ngami lo-Alex futhi kuyabathokozisa ukusibona sisetshenziswa nguJehova. Kusukela ngo-2016 besihambela ensimini yegatsha le-Australasia.

Kunzima ukukholwa ukuthi kulesikhathi lapho engangingasayikholisi khona inkonzo ngoba khathesi sengikuthanda ukutshumayela. Sengikwazi ukuthi kungelani lokuthi kwenzakalani empilweni, ukukhonza uJehova ngenhliziyo yonke yikho kuphela okwenza sithokoze. Sengileminyaka engu-18 ngikhonza uJehova lo-Alex futhi ngikholisile sibili. Khathesi sengibona ukuthi aliqiniso amazwi umhubi uDavida awatsho kuJehova: ‘Bonke abaphephela kuwe bazathokoza; bazahlabelela njalonjalo ngenjabulo. Labo abalithandayo igama lakho bazajabula ngawe.’—Hubo. 5:11.