1. UJehova uzwa njani nxa abantu bakhe besebunzimeni?

 UJEHOVA uyakubona konke okwenzakala ebantwini bakhe emhlabeni. Uyabona nxa bethokoza futhi uyabe ekwazi nxa bedanile. (Hubo. 37:18) Uyathokoza kakhulu nxa ebona sisenza konke okusemandleni ethu ukuthi siqhubeke simkhonza lanxa kulezinto ezisizwisa ubuhlungu. Kanti njalo uzimisele ukuhlala esisekela futhi esiduduza.

2. UJehova ubancedisa njani labo abalenhliziyo ezidabukileyo njalo kumele senzeni?

² IHubo 147:3 liyasicacisela indlela uJehova ancedisa ngayo labo abadanileyo. Lithi ‘ubopha amanxeba’ alabo abalenhliziyo ezidabukileyo. UJehova ulendaba lathi sibili. Kodwa kumele senzeni ukuze asincedise? Nanku umzekeliso ongasinceda. Udokotela oyingcitshi angamelapha kuhle umuntu olimeleyo. Kodwa umuntu lo kuyabe kumele alalele konke akutshelwa ngudokotela ukuze asile. Esihlokweni lesi sizabona ukuthi uJehova ubatshelani labo abalenhliziyo ezidabukileyo. Sizabona lokuthi bangawalandela njani amacebo abanika wona.

UJEHOVA UYASIQINISEKISA UKUTHI SIQAKATHEKILE

3. Yindaba abanye bezibona bengaqakathekanga?

³ Emhlabeni lo abantu abanengi abalathando njalo lokhu kwenza abanye bacine bezibona angathi kabaqakathekanga. Udadewethu okuthiwa nguHelen a uthi: “Abazali bami babengasithandi ngitsho. Ubaba wayelodlakela futhi nsuku zonke wayesitshela ukuthi asincedi ngalutho.” Mhlawumbe lawe uphathwa kubi, uhlala uchothozwa futhi kawutshengiswa ukuthi  uyathandwa njengoHelen. Nxa kunjalo, kungaba nzima ukuthi ukholwe ukuthi kulomuntu olendaba lawe sibili.

4. UJehova usiqinisekisa ngani? (IHubo 34:18)

⁴ Lanxa abanye abantu bekuphatha kubi, qiniseka ukuthi uJehova uyakuthanda lokuthi uyakuqakathekisa. IBhayibhili lithi “useduze lalabo abalenhliziyo ezidabukileyo.” (Bala iHubo 34:18.) Nxa ‘udanile’ khumbula ukuthi kukhona okuhle uJehova akubona enhliziyweni yakho, yikho wakudonsela kuye. (Joh. 6:44) Uzimisele ukukuncedisa zikhathi zonke ngoba uligugu kuye.

5. Singafundani endleleni uJesu ayephatha ngayo labo ababekhangelelwa phansi?

⁵ Okungasinceda sizwisise ukuthi uJehova ulendaba lalabo abalenhliziyo ezidabukileyo yikukhangela lokho okwenziwa nguJesu. Ngesikhathi esenza inkonzo yakhe emhlabeni, wayebananzelela labo ababekhangelelwa phansi futhi wayesiba lesihawu kubo. (Mat. 9:​9-12) Omunye owesifazana owayelomkhuhlane owawusumhlukuluze kakhulu wathinta isembatho sikaJesu efuna amsilise. UJesu wamduduza wasemncoma ngenxa yokuthi wayetshengise ukuthi ulokholo. (Mak. 5:​25-34) UJesu ulingisela uYise kukho konke. (Joh. 14:9) Ngakho ungathandabuzi ukuthi uJehova uyakuqakathekisa lokuthi uyakubona okuhle okwenzayo. Uyalubona ukholo lwakho kanye lendlela omthanda ngayo.

6. Kuyini okunganceda umuntu ozibona angathi kaqakathekanga?

⁶ Manje ungenzani nxa uyake uzizwe angathi kawuqakathekanga? Bala amavesi aseBhayibhilini angakunceda ungathandabuzi ukuthi uqakathekile kuJehova, ubusucabangisisa ngawo. b (Hubo. 94:19) Nxa wehlulekile ukwenza lokho obukuhlelile kumbe ungenelisi  ukwenza okunengi njengabanye, ungazitsheli ukuthi usungumuntu omubi. UJehova kakhangelelanga ukuthi wenze okungaphezu kwamandla akho. (Hubo. 103:​13, 14) Nxa wake waphathwa kubi, ungazibeki icala ngalokho okwenzakalayo. Vele akulamuntu okumele ahlukuluzwe. Khumbula ukuthi uJehova ujezisa abenza okubi hatshi abahlukuluzwayo. (1 Phet. 3:12) USandra owaphathwa kubi esesemncane uthi, “Ngihlala ngimcela uJehova ukuthi angincedise ngizibone ngendlela angibona ngayo, ngingaziboni angathi angilancedo.”

7. Singabancedisa njani abanye nxa sake sadlula ebunzimeni?

⁷ Ungathandabuzi ukuthi uJehova angakusebenzisa ukuthi uncedise abanye. Ukuphe isibusiso sokusebenza laye emsebenzini wokutshumayela. (1 Khor. 3:9) Mhlawumbe izinto ezibuhlungu ezenzakala kuwe sezikwenze waba lozwelo kakhulu, zaphinda zakunceda ukuthi uzwisise indlela abanye abazizwa ngayo. Kunengi ongakwenza ukuze ubancedise. UHelen esike sakhuluma ngaye wancediswa njalo laye usebancedisa ngcono abanye. Uthi: “Ngangizibona angani kangincedi ngalutho, kodwa uJehova usengenze ngabona ukuthi ngiyathandwa njalo uyangisebenzisa ukuthi ngincedise abanye.” Khathesi uHelen useliphayona lesikhathi sonke futhi uyathokoza.

UJEHOVA UFUNA SIKUKHOLWE UKUTHI UYASITHETHELELA

8. Yiwaphi amazwi aduduzayo esiwathola ku-Isaya 1:18?

⁸ Abanye abantu bakaJehova bayakhathazeka ngezinto abazenza kudala. Abanye bangabe bazenza bengakabhabhathizwa njalo abanye bangabe bazenza sebebhabhathiziwe. Kodwa kumele sikhumbule ukuthi uJehova wasihlawulela ngenxa yokuthi uyasithanda kakhulu. Siyaqiniseka ukuthi ufuna sisamukele isipho lesi asinika sona. UJehova ufuna siqiniseke ukuthi nxa ‘sesilungisise izindaba’ c phakathi kwethu laye, akasasibaleli izono esiyabe sizenzile. (Bala u-Isaya 1:18.) Uyasithanda kakhulu ngoba kazikhumbuli ngitsho izono esazenza kudala. Ahlala ekukhumbula ngokuhle esiyabe sikwenzile.—Hubo. 103:​9, 12; Heb. 6:10.

9. Kuyini okungasinceda ukuthi singahlali sicabanga ngezinto ezimbi esazenza kudala?

⁹ Nxa ukhathazekile ngenxa yezinto ezimbi owazenza kudala, zama ukuthi ucabange ngalokho okwenza khathesi langalokho ongakwenza esikhathini esizayo. Umphostoli uPhawuli laye wayeke azisole ngokuthi wayewahlukuluze kabuhlungu amaKhristu. Kodwa wayekwazi ukuthi uJehova wamthethelela. (1 Thim. 1:​12-15) Manje wayeqhubeka ekhathazekile yini ngezono ayezenze kudala? Akuthandabuzwa ukuthi kazange akwenze lokho, njengoba nje wayengatshoni ecabanga ngezinto ayezenzile ukuze abe ngumFarisi ohlonitshwayo. (Flp. 3:​4-8, 13-15) Wayetshiseka emsebenzini wokutshumayela futhi ecabanga ngezinto ayezazithola esikhathini esizayo. Lawe akulalutho ongalwenza ukuze utshintshe izinto ezenzakala kudala. Ongakwenza yikudumisa uJehova ngalokho okwenzayo khathesi futhi uhlale ulindele ikusasa elihle akuthembisa lona.

10. Kuyini esingakwenza nxa senza izinto ezazwisa abanye ubuhlungu?

¹⁰ Okunye okungakukhathaza yikucabanga ngalokho owakwenzayo okwazwisa abanye ubuhlungu. Nxa kunjalo, kuyini okungakunceda? Yenza okusemandleni akho ukuthi ulungise lapho owaphambanisa khona futhi  uxolise ngenhliziyo yonke. (2 Khor. 7:11) Cela uJehova abancedise labo owabazwisa ubuhlungu. UJehova angancedisa wena kanye lalabo owabazwisa ubuhlungu ukuthi liqhubeke limkhonza liqinisela njalo likhululekile.

11. Sifundani kulokho okwenziwa ngumphrofethi uJona? (Khangela lomfanekiso.)

¹¹ Nanzelela izinto ezingabe zakuwisela esilingweni ubusuzimisela ukuthi zingaphindi zikugwenxe. Kanti njalo vumela uJehova akusebenzise loba ngaphi afuna khona. Cabanga ngalokho okwenzakala kumphrofethi uJona. Kulokuthi aye empumalanga eNiniva lapho uNkulunkulu ayemthume khona, yena wabaleka waya entshonalanga eThashishi. UJehova wamlaya uJona. Kanti njalo uJona walungisisa lapho ayephambanise khona. (Jona. 1:​1-4, 15-17; 2:​7-10) UJehova kazange amkhalale. Waphinda wamthuma futhi eNiniva njalo uJona wahle wakwenza masinyane lokho ayekutsheliwe. Lanxa wayengabe ezisola ngalokho ayekwenzile kazange avume ukuthi kumenze angawamukeli umsebenzi ayesewuphiwa nguJehova.—Jona. 3:​1-3.

UJEHOVA UYASIDUDUZA NGOMOYA WAKHE ONGCWELE

12. UJehova usincedisa njani nxa sisebunzimeni obusizwisa ubuhlungu obukhulu kakhulu? (UFiliphi 4:​6, 7)

¹² Nxa singehlelwa yinto etshiya isidabule inhliziyo, uJehova uyasiduduza esebenzisa umoya wakhe ongcwele. Cabanga ngalokho okwenzakala kuRon loCarol. Indodana yabo yazibulala. Bathi: “Lanxa sasike sibe sebunzimeni, okunje sasingakaze sikubone. Izikhathi ezinengi ubuthongo babungabuyi. Kwakusithi kungaba njalo, sithandaze kuJehova, yena abesesinika ukuthula okukhulunywa ngakho kuFiliphi 4:​6, 7.” (Bala.) Nxa uphakathi kobunzima obukuzwisa ubuhlungu obukhulu kakhulu, tshela uJehova konke okusenhliziyweni yakho njalo uthandaze kanengi. Akulandaba ukuthi imithandazo yakho mide kangakanani. (Hubo. 86:3; 88:1) Thandaza kanengi kuJehova ucela umoya wakhe ongcwele. Kasoze athi uyahlupha, kodwa uzakuncedisa.—Luk. 11:​9-13.

13. Umoya ongcwele ungasinceda njani ukuthi siqhubeke sikhonza uJehova sithembekile? (U-Efesu 3:16)

¹³ Uphakathi kobunzima obukuqeda amandla yini? Umoya ongcwele ungakunika amandla okuthi uqhubeke ukhonza uJehova uthembekile. (Bala u-Efesu 3:16.) Omunye udadewethu okuthiwa nguFlora wayengumnali ndawonye lomkakhe. Kodwa umkakhe wasuka wafeba basebedivosa. Uthi: “Ngangibona angathi umhlaba usungihlanekele. Ngathandaza kuJehova ngimcela ukuthi anginike umoya wakhe ongcwele ukuze ngiqinisele. UJehova wawathoba amanxeba ami njalo wangincedisa ukuthi ngilwisane lobunzima engangibona angathi ngeke ngilwisane labo.” Udadewethu lo uyayibona indlela uJehova amncedise ngayo ukuthi amthembe kakhulu futhi kathandabuzi ukuthi lanxa engaze ehlelwe yibuphi ubunzima, uJehova uzamqinisa. Uqhubeka esithi: “Amazwi eHubo 119:32 abhalelwe mina sibili. Athi: ‘Ngizayitshisekela imilayo yakho, ngoba wenze ukuthi ithole indawo enhliziyweni yami.’”

14. Singenzani ukuze umoya ongcwele usebenze kithi?

¹⁴ Nxa ungathandaza kuJehova ucela umoya ongcwele, kuyini okuyabe sekumele ukwenze? Yenza izinto ezizakwenza ukuthi umoya ongcwele usebenze kuwe. Okunye kwakhona yikuya emihlanganweni yebandla lokutshumayela. Bala iLizwi likaNkulunkulu nsuku zonke ukuze ucabange ngendlela acabanga ngayo. (Flp. 4:​8, 9) Ngesikhathi ubala iBhayibhili, nanzelela abanye okukhulunywa ngabo abake baba sebunzimeni, ubusucabangisisa ngokuthi uJehova wabancedisa njani ukuthi baqinisele. USandra esike sakhuluma ngaye  wehlelwa zinhlupho ezinengi. Uthi: “Indaba kaJosefa iyangikhuthaza kakhulu. Lanxa waphathwa kubi futhi waba sebunzimeni, kazange avume ukuthi lokho kuphambanise ubungane ayelabo loJehova.”—Gen. 39:​21-23.

UJEHOVA USEBENZISA ESIKHONZA LABO UKUZE ASIDUDUZE

15. Ngobani abangasiduduza futhi bangasiduduza njani? (Khangela lomfanekiso.)

¹⁵ Nxa sisebunzimeni, abafowethu labodadewethu ‘bangasiduduza kakhulu.’ (Khol. 4:11) UJehova usebenzisa bona ukuze atshengise ukuthi uyasithanda. Esikhonza labo bangasiduduza ngokusilalela nxa sibatshela lokho okusikhathazayo njalo bangasivakatshela ukuze batshengise ukuthi balendaba lathi. Bangasibalela ivesi eduduzayo kumbe bathandaze lathi. d (Rom. 15:4) Kwezinye izikhathi umfowethu kumbe udadewethu angasikhumbuza indlela uJehova asibona ngayo futhi asincedise ukuthi singakhathazeki kakhulu. Abafowethu labodadewethu bangasincedisa langezinye izindlela, ngokwesibonelo bangasiphekela ukudla nxa sikhathazeke kakhulu.

16. Ngezinye izikhathi kuyini okuyabe kumele sikwenze ukuze abanye basincedise?

¹⁶ Kwezinye izikhathi kungadinga ukuthi sicele ukuthi abanye basincedise. Abafowethu labodadewethu bayasithanda futhi bayafuna  ukusincedisa. (Zaga. 17:17) Kodwa bangabe bengakwazi ukuthi sizwa njani lokuthi sifunani. (Zaga. 14:10) Nxa kulento ekuzwise ubuhlungu, ungafeli ngaphakathi. Khuluma labangane obathembayo. Batshele ukuthi ufuna bakuncedise njani. Ungakhetha ukukhuluma lomdala oyedwa kumbe ababili ongabe ukhululekile ukuxoxa labo. Abanye odadewethu bakhetha ukukhuluma labanye odade ababathembayo futhi lokho kwenza baduduzeke.

17. Kuyini okungaba nzima ukuthi sikwenze nxa sisizwa ubuhlungu, futhi lokho singakunqoba njani?

¹⁷ Zama ukuthi ungazehlukanisi labafowenu labodadewenu. Kwezinye izikhathi ungabe usizwa ubuhlungu kakhulu, uze uzwe kusithi ungabi sebantwini. Kanti njalo kungaba nzima ukuthi abafowenu labodadewenu bakuzwisise futhi bangakhuluma amazwi angakuzwisa ubuhlungu bengahlosanga. (Jak. 3:2) Ungavumi ukuthi izinto lezi zikwenze uzehlukanise labanye, ucine ungasayitholanga induduzo ongabe uyidinga. Omunye umdala okuthiwa nguGavin olohlupho lokuhlulukelwa uthi: “Izikhathi ezinengi ngiyabe ngisizwa kungatsho ukuthi ngikhulume labangane bami.” Kodwa uGavin kakuvumeli lokho ukuthi kumenze angabi labafowethu labodadewethu ngoba kuyamkhuthaza kakhulu ukuba labo. Udadewethu okuthiwa ngu-Amy uthi: “Kunzima ukuthi ngithembe abantu ngenxa yalokho okwenzakala kimi. Kodwa lokhu ngifunda ukuthi ngibathande abafowethu labodadewethu futhi ngibathembe njengoJehova. Ngiyakwazi ukuthi lokho kwenza uJehova athokoze njalo lami kungenza ngithokoze.”

IZITHEMBISO ZIKAJEHOVA ZIYASIDUDUZA

18. Kuyini esikulindele ngabomvu futhi kuyini okumele sikwenze khathesi?

¹⁸ Sisilindele ngabomvu isikhathi lapho uJehova azasusa khona zonke izinto ezisizwisa ubuhlungu lezenza sikhathazeke. (Isam. 21:​3, 4) Ngalesosikhathi zonke izinto ezisizwisa ubuhlungu ezake zenzakala “kazisoze zifike enhliziyweni.” (Isaya. 65:17) Kodwa njengoba sibonile, lakhathesi uJehova ‘uyawabopha amanxeba ethu.’ Kunengi uJehova akwenzileyo ukuze asiduduze futhi asincedise. Ngakho vuma ukuthi akuncedise. Kungaze kube njani, ungaqali ukuthandabuza ukuthi uJehova ‘ulendaba lawe.’—1 Phet. 5:7.