1. Uzwa njani ngeqiniso?

 ABANTU bakaJehova bayalithanda iqiniso eliseLizwini lakhe. Yilo eliyinsika yokholo lwethu. (Rom. 10:17) Kasithandabuzi ukuthi uJehova ubeke ibandla lamaKhristu laba ‘yinsika lesisekelo seqiniso.’ (1 Thim. 3:15) Siyazehlisa ‘kwabakhokhelayo’ phakathi kwethu ngoba bayasichasisela iqiniso eliseBhayibhilini futhi basitshela lokho okumele sikwenze okuhambelana lentando kaNkulunkulu.—Heb. 13:17.

2. UJakhobe 5:19 uthi kuyini okungenzakala kithi lanxa sesilifundile iqiniso?

² Lanxa sesalamukela iqiniso futhi sivuma ukuthi inhlanganiso kaJehova yiyo esikhokhelayo kungenzakala ukuthi siduke. (Bala uJakhobe 5:19.) Inhloso kaSathane ngeyokuthi sicine singasalithembi iBhayibhili kumbe lokho esikufundiswa yinhlanganiso kaNkulunkulu.—Efe. 4:14.

3. Kungani kumele sibambelele eqinisweni? (U-Efesu 6:​13, 14)

³ Bala u-Efesu 6:​13, 14. Esikhathini esiseduze uSathane uzasebenzisa amanga ukuthi aqile izizwe ukuze zimelane loJehova. (Isam. 16:​13, 14) Okunye esikwaziyo yikuthi uzakwenza konke okusemandleni akhe ukuthi adukise abantu bakaJehova. (Isam. 12:9) Ngakho kuqakathekile ukuthi sizifundise ukwehlukanisa iqiniso lamanga njalo sizimisele ukulandela iqiniso. (Rom. 6:17; 1 Phet. 1:22) Ukwenza njalo kuzasinceda ukuthi sisinde ekuhluphekeni okukhulu.

4. Sizaxoxa ngani esihlokweni lesi?

⁴ Esihlokweni lesi sizabona izinto ezimbili ezizasinceda  ukuthi sinanzelele iqiniso eliseBhayibhilini lokuthi sivume ukukhokhelwa yinhlanganiso kaNkulunkulu. Ngemva kwalokho sizaxoxa ngezinto ezintathu ezizasinceda ukuthi siqhubeke siligagadlele iqiniso.

OKUZASINCEDA SILINANZELELE IQINISO

5. Ukwesaba uJehova kuzasinceda njani?

⁵ Ukwesaba uJehova. Nxa singafunda ukumesaba uJehova sizamthanda kakhulu okokuthi siyabe singafuni ukwenza loba yini engamzondisa. Sizimisele ukufunda umehluko okhona phakathi kokulungileyo lokungalunganga laphakathi kweqiniso lamanga ukuze uJehova asamukele. (Zaga. 2:​3-6; Heb. 5:14) Akumelanga sesabe abantu ukwedlula indlela esimthanda ngayo uJehova. Izikhathi ezinengi izinto abantu abayabe befuna sizenze ukuze bona bathokoze ziyabe zingamthokozisi uJehova.

6. Abakhokheli bako-Israyeli abalitshumi benzani ngenxa yokwesaba abantu?

⁶ Nxa singesaba abantu ukwedlula uNkulunkulu singacina sesiduka eqinisweni. Ake sixoxe ngokwenziwa ngabakhokheli abangu-12 ababethunywe ukuyahlola ilizwe uJehova ayethe uzalinika abako-Israyeli. Abakhokheli abalitshumi babesesaba amaKhenani ukwedlula indlela ababethanda ngayo uJehova. Batshela ama-Israyeli bathi: “Ngeke senelise ukuyakulwa labantu labo ngoba balamandla kulathi.” (Nani. 13:​27-31) Kwakuliqiniso sibili ukuthi amaKhenani ayelamandla ukwedlula abako-Israyeli. Kodwa nxa umuntu wayengathi ama-Israyeli ayengeke enelise ukunqoba izitha zawo wayeyabe etshengisa ukuthi wayengacabangi ngalokho uJehova ayengakwenza. Abakhokheli labo abalitshumi kwakumele bacabange ngalokho uJehova ayefuna ama-Israyeli akwenze. Kwakumele bacabangisise langalokho ayebenzele khona  esikhathini esasisanda kwedlula. Lokho kwakuzabanceda bananzelele ukuthi uJehova ulamandla kakhulu ukwedlula amaKhenani. Kodwa uJoshuwa loKhalebhi bona babengafanani labakhokheli laba. Babefuna ukuthokozisa uJehova yikho batshela abantu bathi: “Nxa uJehova ethokoza ngathi uzasingenisa elizweni leli loba sekutheni njalo uzasinika lona.”—Nani. 14:​6-9.

7. Singenzani ukuze sihlale simesaba uJehova? (Khangela lomfanekiso.)

⁷ Nxa sifuna ukuhlala simesaba uJehova kumele sidinge ukuthi kuyini okuzamthokozisa kukho konke esikwenzayo. (Hubo. 16:8) Nxa ubala indaba eziseBhayibhilini zibuze ukuthi, ‘Ngabe yimi engangisesimeni leso ngangizakwenzani?’ Ake sithi wawukhona ngesikhathi abakhokheli abalitshumi besithi ama-Israyeli ayengeke enelise ukunqoba abaseKhenani. Wawuzakukholwa yini lokho ababekutsho ubusuqalisa ukwesaba kumbe indlela omthanda ngayo uJehova lesifiso sakho sokumthokozisa kwakuzakwenza ungesabi? Isizukulwane sonke sama-Israyeli lawo kasizange sikholwe ukuthi uJoshuwa loKhalebhi babekhuluma iqiniso. Lokho kwenza ukuthi acine engasangeni eLizweni Lesithembiso.—Nani. 14:​10, 22, 23.

8. Yibuphi ubuntu okumele sisebenze nzima ukuze sihlale silabo njalo kungani kumele senze njalo?

⁸ Ukuthobeka. UJehova uvezela abantu abathobekileyo iqiniso. (Mat. 11:25) Lathi sazithoba savuma ukuncediswa ukufunda iqiniso. (Imiseb. 8:​30, 31) Lanxa kunjalo kumele sinanzelele ukuthi singacini sesizikhukhumeza. Nxa singazikhukhumeza singacina sesibona angathi imibono yethu iqakatheke kakhulu okokuthi isifanana lezimiso eziseBhayibhilini kumbe lokho esikutshelwa yinhlanganiso kaJehova.

9. Singenzani ukuze sihlale sithobekile?

⁹ Nxa sifuna ukuhlala sithobekile kumele sikhumbule ukuthi sibancane kakhulu nxa siqathaniswa loJehova uNkulunkulu. (Hubo. 8:​3, 4) Okunye okungasinceda yikuthandaza kuJehova simcela ukuthi asincedise sihlale singabantu abathobekileyo futhi abavuma ukufundiswa. UJehova uzasinceda siqakathekise imicabango yakhe ukwedlula imibono yethu. Usifundisa imicabango yakhe esebenzisa iBhayibhili kanye lenhlanganiso yakhe. Ngesikhathi ubala iBhayibhili dinga imicijo etshengisa ukuthi uJehova uyabathanda abantu abathobekileyo. Dinga ukuthi kungani ezonda abazigqajayo labazikhukhumezayo kanye labazitshaya isifuba. Nxa ungaphiwa umsebenzi wokukhokhela ebandleni kumbe umsebenzi wenkonzo owenza waziwe ngabantu abanengi, zama ngamandla wonke ukuthi uhlale uthobekile.

KUYINI OKUNGASINCEDA SIBAMBELELE EQINISWENI?

10. Ngobani uJehova abebasebenzisa ukuze bakhokhele abantu bakhe?

¹⁰ Hlala ukuthemba esikutshelwa yinhlanganiso kaJehova. Ngesikhathi sama-Israyeli, uJehova wayesebenzisa uMosi loJoshuwa ukuze batshele abantu lokho okwakumele bakwenze. (Josh. 1:​16, 17) Nxa ama-Israyeli ayekhumbula ukuthi amadoda la ayesetshenziswa nguJehova, izinto zaziwahambela kuhle. Kwadlula iminyaka eminengi kwasekubunjwa ibandla lamaKhristu njalo abaphostoli abangu-12 yibo ababelikhokhela. (Imiseb. 8:​14, 15) Ngokuhamba kwesikhathi abanye abadala ababeseJerusalema baba phakathi kweqembu leli elalikhokhela. Nxa amabandla ayelandela lokho ayekutshelwa ngamadoda la ayethembekile ‘ayeqhubeka eqiniswa ekukholweni, labazalwane besanda usuku ngosuku.’  (Imiseb. 16:​4, 5) Lalamuhla uJehova uyasibusisa nxa silandela lokho esikutshelwa yinhlanganiso yakhe. UJehova angezwa njani nxa singayekela ukulalela labo ababeke ukuthi basikhokhele? Impendulo yombuzo lo singayithola ngokuxoxa ngalokho okwenzakala ngesikhathi ama-Israyeli esiya eLizweni Lesithembiso.

11. Kuyini okwenzakala kulabo abavukela uMosi? (Khangela lomfanekiso.)

¹¹ Ngesikhathi ama-Israyeli esiya eLizweni Lesithembiso, amanye amadoda adumileyo avukela uMosi futhi athandabuza ukuthi uJehova wayemnike umsebenzi wokukhokhela. Amadoda la athi: “Bonke abantu bako-Israyeli [hatshi uMosi kuphela] bangcwele, bonke nje, njalo uJehova uphakathi kwabo.” (Nani. 16:​1-3) Kuliqiniso ukuthi kuJehova “bonke abantu bako-Israyeli” babengcwele. Lanxa kunjalo uJehova wayekhethe uMosi ukuthi akhokhele abantu bakhe. (Nani. 16:28) Nxa abahlamuki laba babechothoza uMosi kwakufanana lokuthi bachothoza uJehova ngokwakhe. Kabazange bacabange ngalokho uJehova ayekufuna, kodwa bacabanga ngalokho bona ababekufuna. Babefuna amandla lodumo. UNkulunkulu wawabulala amadoda ayekhokhela ekuhlamukeni lokhu kanye lezinkulungwane zabantu ababewasekela. (Nani. 16:​30-35, 41, 49) Asithandabuzi ukuthi lalamuhla uJehova kathokozi ngalabo abaphikisana lalokho okuhlelwe yinhlanganiso yakhe.

12. Kungani singahlala siyithemba inhlanganiso kaJehova?

¹² Singenelisa ukuhlala siyithemba inhlanganiso kaJehova. Abafowethu abakhokhelayo kabathikazi ukwenza utshintsho nxa kungacaca ukuthi indlela esizwisisa ngayo iqiniso eliseBhayibhilini sekumele ilungisiswe, kumbe nxa indlela okuhlelwe ngayo umsebenzi woMbuso sekumele itshintshe. (Zaga. 4:18) Isizatho esikhulu esenza benze njalo yikuthi bafuna ukuthokozisa uJehova. Benza konke okusemandleni abo ukuze  basekele izinqumo zabo eLizwini likaNkulunkulu okumele lilandelwe yibo bonke abantu bakaJehova.

13. Siyini ‘isisekelo samazwi aqondileyo,’ njalo kumele senzeni?

¹³ “Qhubeka ubambelele esisekelweni samazwi aqondileyo.” (2 Thim. 1:13) ‘Isisekelo samazwi aqondileyo’ sitsho imfundiso zamaKhristu ezitholakala eBhayibhilini. (Joh. 17:17) Konke esikukholwayo kusekelwe emfundisweni lezi. Inhlanganiso kaJehova iyasifundisa ukuthi sibambelele kuzo. Nxa singahlala sisenza njalo sizabusiswa.

14. Kuyini okwenza amanye amaKhristu ayekela ukubambelela “esisekelweni samazwi aqondileyo”?

¹⁴ Kungenzakalani nxa singayekela ukubambelela “esisekelweni samazwi aqondileyo”? Ake sixoxe ngokwake kwenzakala ngesikhathi sabaphostoli. Amanye amaKhristu ayememethekisa ihungahunga lokuthi usuku lukaJehova lwaselufikile. Kungenzakala ukuthi kwakulencwadi okwakuthiwa yayibhalwe ngumphostoli uPhawuli eyayibatshela ngendaba leyo. Amanye amaKhristu ebandla leThesalonika akukholwa lokho engazange azinike isikhathi sokuhlolisisa ukuthi kwakuliqiniso yini futhi lawo ahle aqalisa ukukumemethekisa. Aluba ayezikhumbula izinto uPhawuli ayewafundise zona eseselawo ayengasoze athatheke ngamanga lawo. (2 Thes. 2:​1-5) UPhawuli wawatshela ukuthi kwakungamelanga akholwe loba yini ayizwayo. Yikho ukuze awancede angadukiswa esikhathini esizayo umphostoli uPhawuli waphetha incwadi yesibili ayibhalela amaKhristu eThesalonika ngamazwi athi: “Mina Phawuli ngiyalibingelela ngibhala ngesami isandla. Lokhu kuluphawu encwadini zami zonke njalo le yiyo indlela engibhala ngayo.”—2 Thes. 3:17.

15. Singenzani ukuze singakholwa amanga ayabe ekhanya angathi aliqiniso? Nika isibonelo. (Khangela lemifanekiso.)

¹⁵ Kuyini esikufunda emazwini uPhawuli awatshela amaKhristu aseThesalonika? Nxa singezwa izinto ezingahambelani lalokho esikufundiswa liBhayibhili kumbe indaba ezethusayo, kumele siqedisise, sizihlolisise. Ngesikhathi seSoviet Union, izitha zethu zabhodisa incwadi okwakukhanya angathi ivela  emawofisini ethu amakhulu. Incwadi leyo yayikhuthaza abafowethu labodadewethu ukuthi babumbe enye inhlanganiso. Yayikhanya angathi ivela kubazalwane sibili. Lanxa kunjalo, abafowethu ababethembekile kabazange bathatheke ngayo. Bananzelela ukuthi okwakubhalwe kuyo kwakungavumelani lalokho ababekufundisiwe. Lalamuhla, ezinye izitha zethu zisebenzisa ezempucuko zizama ukusidukisa lokwenza ukuthi singamanyani labafowethu labodadewethu. Akumelanga ‘siphange siphithane ingqondo.’ Kodwa kumele sihlolisise ukuthi esikuzwayo lesikubalayo kuyavumelana yini leqiniso esesilifundile. Nxa singenza njalo siyabe sizivikela.—2 Thes. 2:2; 1 Joh. 4:1.

16. URoma 16:​17, 18 uthi kumele senzeni nxa abanye betshiya iqiniso?

¹⁶ Qhubeka umanyene lalabo abaqotho kuJehova. UNkulunkulu ufuna ukuthi simkhonze simanyene. Nxa singabambelela eqinisweni sizenelisa ukuqhubeka simanyene. Labo abaphambukayo eqinisweni babangela ukuthi kube lokwehlukana ebandleni. Yikho uNkulunkulu esithi ‘singabi lobudlelwano labo’ ukuze singacini siduka eqinisweni.—Bala uRoma 16:​17, 18.

17. Ukwazi iqiniso lokubambelela kulo kuzakunceda njani?

¹⁷ Nxa singabalazi iqiniso futhi sibambelele kulo sizahlala siseduze loJehova futhi silokholo oluqinileyo. (Efe. 4:​15, 16) Kanti njalo kasisoze sithatheke ngemfundiso lezindaba ezingamanga ezivela kuSathane. Kodwa uJehova uzasivikela futhi asinakekele lasekuhluphekeni okukhulu. Ngakho qhubeka uligagadlele iqiniso. Ungenza njalo ‘uNkulunkulu wokuthula uzakuba lawe.’—Flp. 4:​8, 9.