• Wayezakhethwa nguNkulunkulu. “Sengiyibekile eyami inkosi . . . Ngizakwenza izizwe zibe yilifa lakho, imikhawulo yomhlaba kube yinotho yakho.”—IHubo 2:6, 8.

• Wayezakuba yindlalifa yeNkosi uDavida. “Sizalelwe umntwana, siphiwe indodana . . . Ukwanda kombuso wakhe lokuthula akuyikuba lomkhawulo. Uzabusa esihlalweni sobukhosi sikaDavida laphezu kombuso wakhe, ewumisa njalo ewuqinisa.”—U-Isaya 9:6, 7.

• Wayezazalelwa eBhethilehema. “Wena Bhethilehema . . . , kuwe ngizavelelwa ngozakuba ngumbusi . . . Udumo lwakhe luzafika emikhawulweni yomhlaba.”—UMikha 5:2, 4.

• Wayezakwaliwa ngabantu futhi abulawe. “Weyiswa, asimhloniphanga. . . . Wagwazwa ngenxa yeziphambeko zethu, wachobozwa ngenxa yokona kwethu.”—U-Isaya 53:3, 5.

• Wayezavuswa kwabafileyo futhi aphiwe isikhundla esiphakemeyo. ‘Ngokuba kawusoze ungitshiye engcwabeni. Kawusoze uvume ukuthi othembekileyo wakho abole. Kulenjabulo engapheliyo esandleni sakho sokudla.’—IHubo 16:10, 11, NWT.

Konke esikhulume ngakho phezulu kwenzakala kuJesu Khristu kuphela. Ingilosi yatshela uMariya unina kaJesu yathi: “UNkulunkulu uzayipha isihlalo sobukhosi sikayise uDavida, . . . njalo uMbuso wayo kawusoze uphele.”—ULukha 1:31-33.

UJesu kazange abuse ngesikhathi esasemhlabeni. Kodwa uzabusa abantu esezulwini, eyiNkosi yoMbuso kaNkulunkulu. Kuyini okwenza abe nguMbusi ongcono kulabo bonke? Nanku okunye akwenza esasemhlabeni:

•   UJesu wayelendaba labantu. UJesu wanceda amadoda labesifazana, abadala labatsha kungelani lokuthi babevela ngaphi, benothile loba bengabayanga. (UMathewu 9:36; UMakho 10:16) Kwathi indoda eyayilobulephero imncenga isithi: “Nxa nje ufuna, ungangenza ngihlambuluke,” uJesu wayizwela usizi waseyelapha.—UMakho 1:40-42.

• UJesu wasifundisa okumele sikwenze ukuze sithokozise uNkulunkulu. Wathi: “Ngeke libe yizigqili zikaNkulunkulu lezeNotho.” Wathi kumele siphathe abanye ngendlela esifuna ukuphathwa ngayo. Waphinda wasifundisa lokuthi uNkulunkulu ufuna sinanzelele lezinto esizicabangayo. Yikho nxa sifuna ukuthokozisa uNkulunkulu kumele sihlolisise lezinto ezisekujuleni kwezinhliziyo zethu. (UMathewu 5:28; 6:24; 7:12) UJesu waphinda wasitshela lokuthi sizathola intokozo yeqiniso nxa singabayazi intando kaNkulunkulu futhi siyenze.—ULukha 11:28.

• UJesu wasifundisa ukuthi kutshoni ukuthanda abanye. Konke okwakhulunywa nguJesu lalokho akwenzayo kwakhuthaza ababemlalele. “Ixuku lasala libambe owangaphansi, limangaliswa yindlela ayefundisa ngayo, ngoba wayelifundisa njengomuntu olamandla.” (UMathewu 7:28, 29) Wathi: “Qhubekani lithanda izitha zenu.” UJesu waze wakhulekela labantu abambulalisayo. Wathi: “Baba, bathethelele ngoba kabakwazi abakwenzayo.”—UMathewu 5:44; ULukha 23:34.

UJesu nguMbusi ongcono kakhulu futhi uzanceda abantu bonke. Manje uqalisa nini ukubusa?