Hloniphanani Emulini
KUNGANI KUQAKATHEKILE UKUTHI SIHLONIPHANE EMULINI?
Kuba lokuthula emulini nxa bonke behloniphana kungelani lokuthi yindoda, ngumfazi kumbe ngabantwana.
-
Ibhuku elithi The Seven Principles for Making Marriage Work lithi nxa indoda lomkayo behloniphana futhi bethandana, kuzakhanya “lasezintweni ezincane abazenza nsuku zonke hatshi ezintweni ezinkulu kuphela.”
-
Ukuhlolisisa okwenziweyo kutshengisa ukuthi abantwana abafundiswa ukuhlonipha abanye kabazikhangeleli phansi, bayazwanana labazali babo njalo balezinto ezilutshwana ezibakhathazayo.
ONGAKWENZA
Sebenzani liyimuli. Okokuqala, wobani leqiniso lokuthi umuntu ngamunye emulini uyakwazi ukuthi kutshoni ukutshengisa inhlonipho. Okwesibili, bhalani phansi izinto elikhangelele ukuthi umuntu ngamunye emulini azenze kumbe okungamelanga azenze. Okwesithathu, xoxani ngalokho elikubhale phansi ukuze wonke umuntu emulini abekwazi lokho okumele akwenze.
Woba yisibonelo. Uhlala ubasola yini abanye emulini yakho nxa bangaphambanisa? Uhlala uyikhangelelela phansi yini imibono yabo? Uyabaquma yini imilomo nxa besakhuluma?
Zama lokhu: Zimisele ukuhlonipha umkakho labantwabakho lanxa bephambanisa ngezinye izikhathi.
Bahloniphe abanye lanxa ungavumelani lemibono yabo. Nxa uveza okucabangayo balekela ukusebenzisa amabala anjengokuthi “awukaze” kumbe “uhlala usenzenje.” Amazwi anjalo ayabalimaza abanye emulini futhi enza lokuthi ukungazwisisani okuncane kucine sekukukhulu.
OFAKAZI BAKAJEHOVA BATSHENGISA NJANI UKUTHI BAYAHLONIPHANA EZIMULINI ZABO?
OFakazi bakaJehova bazama ngamandla abo wonke ukuthi baphathane ngenhlonipho emulini. Balezihloko ezitshiyeneyo ezikhuluma ngokuhloniphana ezitholakala kuwebhusayithi yabo, emabhukwini lasemabhukwaneni, lakumavidiyo futhi izinto zonke lezi zitholakala mahala.
OKWABATSHADILEYO: Izihloko ezisengxenyeni ethi Okunceda Imuli zinceda amadoda labomkabo ukuthi . . .
-
balalelane
-
baqhubeke bekhulumisana lanxa bephambaniselene
-
bangaxabani
(Dinga ingxenye ethi “Okunceda Imuli” ku-jw.org)
OKWABAZALI: Izihloko ezisengxenyeni ethi Okunceda Imuli zinceda abazali ukuthi bafundise abantwababo . . .
-
ukulalela
-
ukuncedisa ngemisebenzi yangekhaya
-
ukufunda ukusebenzisa amabala anjengokuthi “ngiyacela” lathi “ngiyabonga”
(Dinga ingxenye ethi “Ukukhulisa Abantwana Abancane” lethi “Ukukhulisa Abantwana Asebekhulakhulile” ku-jw.org)
Khangela lesihloko esithi, “Izinto Ezingu-6 Okumele Abantwana Bazifundiswe,” esiku-Vukani! No. 2, 2019 lesithi “Izinto Ezingu-12 Ezenza Imuli Ithokoze” esiku-Vukani! No. 2, 2018 ikhasi 8-11. (Dinga izihloko lezi ku-jw.org)
OKWABASAKHULAYO: Ingxenye ethi Ezabasakhulayo etholakala ku-jw.org ilezihloko, amavidiyo, imisebenzi yokwenza, lokunye okunceda abasakhulayo ukuthi . . .
-
bazwanane labazali babo labanye emulini
-
bakhulume ngenhlonipho labazali babo ngemithetho abayifakelwayo
-
bangenzani ukuze bathenjwe ngabazali babo
(Dinga ingxenye ethi “Ezabasakhulayo” ku-jw.org)
Akubhadaliswa ukusebenzisa iwebhusayithi ethi jw.org. Kawusoze ucelwe imali kumbe ukuthi ube lilunga lenhlanganiso le njalo awusoze ubuzwe imibuzo emayelana lawe.
