IBhayibhili liyasitshela ukuthi uJehova leNdodana yakhe uJesu Khristu bazakwenzani ngokuhlupheka okubangelwa nguSathane uDeveli. Lithi: “INdodana kaNkulunkulu [uJesu] yabonakala ukuze ichithe imisebenzi kaSathane.” (1 UJohane 3:8) Ubuhwaba, inzondo lazo zonke izinto ezimbi kuzasuswa. UJesu wathembisa ukuthi uSathane uDeveli ‘oyinkosi yalo umhlaba usezaxotshwa.’ (UJohane 12:31) Nxa uSathane esesusiwe, abantu bazaphila emhlabeni omutsha olokuthula.​—2 UPhetro 3:13.

Bazaphetha ngani abantu abalobuqholo abaqhubeka besenza izinto ezimbi bengafuni ukuntshintsha? Zwana ukuthi iBhayibhili lisithembisani. Lithi: “Abaqotho bazahlala elizweni, labangasolekiyo bazasala kulo; kodwa izigangi zisasuswa elizweni, labangathembekanga bazakhutshwa kulo.” ­(IZaga 2:21, 22) Yikho-ke ngeke uphinde umuthi tshazi umuntu omubi. Emhlabeni omutsha olokuthula, abantu abalalelayo bazakhululwa kancane kancane esonweni abasithola ku-Adamu.​—KwabaseRoma ­6:17, 18; 8:21.

Emhlabeni lo omutsha, uNkulunkulu uzakwenzani ukuze ububi bungaphindi bubekhona? Kasoze athathele abantu inkululeko yokuzikhethela abenze bafanane lemitshina enza lokho ehlelelwe ukuthi ikwenze kuphela. Kodwa uzafundisa abantu abamlalelayo izindlela zakhe, abancede ukuthi batshiye imicabango engayisiyo kanye lemikhuba emibi.

UNkulunkulu uzakwenzani ngezehlakalo ezifikela abantu belibele? Uthembisa ukuthi sekuseduze ukuthi uMbuso wakhe ubuse emhlabeni. Phela iNkosi yoMbuso lo, uJesu Khristu, ilamandla okusilisa abagulayo. (UMathewu 14:14) Kanti njalo ilamandla okuvimba izinto eziyingozi ezenzakala emhlabeni ngokwesibonelo ukuzamazama komhlaba kumbe iziphepho. (UMakho 4:35-41) Yikho-ke ukuhlupheka okubangelwa ‘yizikhathi ezimbi ezifikela abantu belibele’ kuzabe sekuyinganekwane nje. (UmTshumayeli 9:12) Nxa uKhristu esebusa, akulangozi ezehlela abantu.​—IZaga 1:33.

Kodwa-ke kuzakwenzakalani ngezigidi zabantu abafa kabuhlungu bengonanga lutho? Esanda kuvusa umngane wakhe uLazaro, uJesu wathi: “Ngiyikuvuka kwabafileyo lokuphila.” (UJohane 11:25) Akuthandabuzwa sibili ukuthi uJesu ulamandla okuvusa abafileyo, baphinde baphile.

Kuyakuthokozisa yini ukuzwa ngethemba lokuphila emhlabeni lapho izinto ezimbi ezingasoze ziphinde zehlele abalungileyo? Nxa kunjalo, kungaba kuhle ukuthi ufunde iBhayibhili ukuze ukwazi okunengi ngoNkulunkulu weqiniso kanye lezinjongo zakhe. OFakazi bakaJehova kabasoze bathikaze ukuzokuncedisa ukuthi uluthole ulwazi lolu. Siyakunxusa ukuthi ubalande sibili nxa bekhona lapho ohlala khona kumbe ubhalele kukheli elikumagazini le.