ICluj-Napoca ngelinye lamadolobho amakhulu elizweni leRomania. OFakazi bakaJehova babukisa amabhuku edolobheni leli kusukela mhlaka 20 kusiya ku-24 April 2016. Babetshengisa abantu indlela iBhayibhili elisinceda ngayo endabeni zokukhonza kanye lezokuziphatha. Baxoxa labantu abanengi kakhulu ababevakatshile futhi babatshengisa amavidiyo baphinda babanika lamabhuku.

Isitendi saboFakazi bakaJehova savakatshelwa ngababalisi labantwana ababevela ezikolo ezitshiyeneyo. Abantwana abanengi bakholisa ukubukela amavidiyo athi Woba Ngumngane KaJehova futhi abanengi babo babefuna ibhuku elithi Ibhuku Lami Lezindaba ZeBhayibhili lebhukwana elithi Fundisa Abantwabakho. Omunye umama osebenza lapho okugcinwa khona abantwana wabona amavidiyo kaLwazi wathi kumngane wakhe: “Kumele sibhale phansi iwebhusayithi leyi [i-www.mr1310.com] ukuze sitshengise abantwana amavidiyo la.”

Abaleminyaka engu-13 kusiya kwengu-19 bona bakholisa kakhulu imidwebo yabopopayi egoqela le: Luthando Lweqiniso Yini Kumbe Ngolokuthatheka? Ungenzani Nxa Uhlutshwa Ngabanye Abantwana? kanye lethi Be Social-Network Smart.

Abanye abavakatshela isitendi saboFakazi bakaJehova ngumfundisi we-Orthodox kanye lomkakhe. Baphiwa i-New World Translation of the Holy Scriptures yesiNgisi kanye lamabhukwana. Umfundisi lo wathi iBhayibhili leli lihunyutshwe ngendlela eqondileyo njalo uthanda ingxenye ethi “Bible Words Index.” Wanika oFakazi laba inamba zakhe zocingo ukuze baphinde baxoxe laye okunengi ngeBhayibhili.

Inkosikazi yomfundisi lo yabuza ukuthi ingakuthola ngaphi okuphathelane labantwana. Bayilayela ukuthi iye ngaphansi kwengxenye ethi “Abantwana” ku-jw.org. Yakholisa kakhulu ukubukela ividiyo ethi Khuluma Iqiniso. Bobabili lomkayo bakholisa ukubona izinto ezinengi eziku-jw.org, umfundisi lo waze wathi i-jw.org “iyisipho uNkulunkulu asinike abantu.”