Umoya ongcwele ungamandla kaNkulunkulu. (UMikha 3:8; ULukha 1:​35) UNkulunkulu usebenzisa umoya ongcwele ngendlela ayifunayo ukuze enze intando yakhe.​—IHubo 104:30; 139:7.

 NgesiHebheru ibala elithi “umoya” ngu-ruʹach ikanti ngesiGrikhi ngu-pneuʹma. Izikhathi ezinengi lapho iBhayibhili elisebenzisa khona ibala elithi “umoya,” liyabe likhuluma ngomoya ongcwele kaNkulunkulu kumbe amandla akhe. (UGenesisi 1:2) Kodwa ibala leli liyasetshenziswa nxa kukhulunywa langezinto ezilandelayo:

•   Umoya wokuphefumula.​—UHabakhukhi 2:19, The Holy Bible in Ndebele; ISambulo 13:15.

•   Umoya ovunguzayo.​—UGenesisi 8:1; UJohane 3:8.

•   Amandla okuphila.​—UJobe 34:14, 15.

•   Ukutshengisa lokho umuntu ayikho.​—AmaNani 14:24.

•   Nxa kukhulunywa ngoNkulunkulu langezingilosi.​—1 AmaKhosi 22:21; UJohane 4:24.

 Ingcazelo zonke lezi zitshengisa ukuthi umoya yinto esingeke siyibone kodwa siyenelisa ukubona lokho okwenzayo. Ibhuku elithi An Expository Dictionary of New Testament Words elabhalwa ngu-W. E. Vine lithi: “Umoya ongcwele unjengomoya, ngeke siwubone kodwa ulamandla.”

 IBhayibhili liphinda lifanise umoya ongcwele ‘lezandla’ zikaNkulunkulu kumbe ‘iminwe’ yakhe. (IHubo 8:3; 19:1; ULukha 11:20; khangela loMathewu 12:28.) Njengoba nje umuntu engasebenzisa izandla leminwe yakhe ukuze enze into ethile, loNkulunkulu wasebenzisa umoya ongcwele ukuze enze okulandelayo:

•   Adale amazulu lomhlaba.​—IHubo 33:6; U-Isaya 66:​1, 2.

•   Aphefumulele abantu ababhala iBhayibhili.​—2 UPhetro 1:​20, 21.

•   Anike izinceku zakhe ezaphila kudala amandla okwenza izimangaliso lawokutshumayela.​—ULukha 4:​18; ImiSebenzi 1:8; 1 KwabaseKhorinte 12:​4-​11.

•   Ancedise abantu bakhe ukuthi babe lezithelo ezinhle.​—KwabaseGalathiya 5:​22, 23.

Umoya ongcwele kawusomuntu

 IBhayibhili litshengisa ukuthi umoya ongcwele awusomuntu ngoba liwufanisa ‘lezandla’ zikaNkulunkulu, ‘leminwe’ yakhe kumbe ‘lomoya wokuphefumula.’ (U-Eksodusi 15:​8, 10) Njengoba nje izandla zingeke zenelise ukusebenza zodwa zingaqondiswanga ngumnikazi, lomoya ongcwele ngeke uzenzele loba yini ungathunywanga nguNkulunkulu. (ULukha 11:13) IBhayibhili liphinda lifanise umoya ongcwele lamanzi njalo lithi umoya lo wenza umuntu abe lokholo lolwazi lezinye impawu ezitshiyeneyo. Konke lokhu kutshengisa ukuthi umoya ongcwele awusomuntu.​—U-Isaya 44:3; ImiSebenzi 6:5; 2 KwabaseKhorinte 6:6.

 IBhayibhili likwenza kucace ukuthi uNkulunkulu ulebizo elithi Jehova lokuthi iNdodana yakhe ilebizo elithi Jesu Khristu, kodwa akulandawo lapho elisitshela khona ukuthi umoya ongcwele ulebizo. (U-Isaya 42:8; ULukha 1:​31) Ngesikhathi uStefane ebulawa, wabona umbono futhi kulowombono wabona inkazimulo yabantu ababili hatshi abathathu. IBhayibhili lithi: “Kodwa yena wakhangela ezulwini egcwele umoya ongcwele, wabona inkazimulo kaNkulunkulu lekaJesu emi esandleni sokudla sikaNkulunkulu.” (ImiSebenzi 7:​55) Umoya ongcwele yiwo owasetshenziswa nguNkulunkulu ukuze uStefane enelise ukubona umbono lo.

 Okungaqondanga: Umoya ongcwele ungumuntu futhi uyingxenye yobuthathu bukaNkulunkulu njengoba kutshiwo ku-1 Johane 5:​7, 8 ku-King James version.

 Okuqondileyo: U-1 Johane 5:​7, 8 ku-King James version uthi: “Ezulwini kuloBaba, uLizwi loMoya Ongcwele futhi bobathathu laba bamunye. Njalo bathathu abafakazayo emhlabeni.” Kodwa abachwayisisayo bathi amazwi la kawabhalwanga ngumphostoli uJohane, yikho akumelanga abekhona eBhayibhilini. Isikhwicamfundo okuthiwa nguBruce M. Metzger sathi: “Ubufakazi butshengisa ukuthi amazwi la akumelanga abekhona kuThestamenti Elitsha ngoba awasoqiniso.”​—A Textual Commentary on the Greek New Testament.

 Okungaqondanga: IBhayibhili litshengisa ukuthi umoya ongcwele ngumuntu.

 Okuqondileyo: Kuliqiniso ukuthi amanye amavesi akhuluma ngomoya ongcwele angani ngumuntu. Ngokwesibonelo uJesu wathi umoya ongcwele ‘ungumsizi,’ uyanika ubufakazi, uyakhokhela, uyakhuluma, uyezwa, uyakhazimulisa futhi uyamukela. (UJohane 16:​7-​15) Kodwa lokhu akutsho ukuthi umoya ongcwele ngumuntu. IBhayibhili liphinda lenze okufananayo nxa likhuluma ngokuhlakanipha, ukufa lesono. (IZaga 1:20; KwabaseRoma 5:17, 21) Ngokwesibonelo lithi ukuhlakanipha ‘kulemisebenzi’ ‘labantwana’ ikanti isono siyahuga njalo siyabulala.​—UMathewu 11:19; ULukha 7:35; KwabaseRoma 7:8, 11.

 Okungaqondanga: Ukubhabhathizwa ebizweni lomoya ongcwele kutshengisa ukuthi ungumuntu.

 Okuqondileyo: Ngesinye isikhathi iBhayibhili lisebenzisa ibala elithi “ebizweni” nxa likhuluma ngesikhundla loba amandla. (UDutheronomi 18:​5, 19-​22; U-Esta 8:​10) Abantu bayake bethi “umthetho ukuthola ulecala” kodwa lokho akutsho ukuthi umthetho ungumuntu. Ngakho ukubhabhathizwa “ebizweni” lomoya ongcwele kutsho ukunanzelela ukuthi uNkulunkulu usebenzisa umoya wakhe ukuze enze intando yakhe.​—UMathewu 28:19.

 Okungaqondanga: Abaphostoli bakaJesu labanye abalandeli bakhe babekholwa ukuthi umoya ongcwele ngumuntu.

 Okuqondileyo: IBhayibhili alikutsho ukuthi umoya ongcwele ngumuntu njalo akula esikuthola kwezembali okutshengisa ukuthi lokhu kuliqiniso. Ibhuku okuthiwa yi-Encyclopædia Britannica lithi: “Imfundiso yokuthi umoya ongcwele ngumuntu . . . yaqalisa ukusetshenziswa emhlanganweni obizwa ngokuthi yi-Council of Constantinople owenziwa ngomnyaka ka-381.” Kwasekuyiminyaka edlula 250 umphostoli wokucina kaJesu efile.