“Lizakwamukela amandla nxa umoya ongcwele ufika kini njalo lizakuba ngofakazi bami eJerusalema lakulo lonke elaseJudiya leSamariya kuze kuyefika emaphethelweni omhlaba.”—ImiSebenzi 1:8, INguqulo Yomhlaba Omutsha.

 “Kodwa lina lizakwamukela amandla, esefikile phezu kwenu uMoya oNgcwele, libe ngofakazi bami eJerusalema, lakulo lonke elaseJudiya laseSamariya kuze kube semikhawulweni yomhlaba.”—ImiSebenzi 1:8, The Holy Bible in Ndebele.

 UJesu uthembisa abalandeli bakhe ukuthi umoya ongcwele kaNkulunkulu uzabapha amandla okwenza umsebenzi wokutshumayela lasezindaweni ezikhatshana kakhulu.

 “Lizakwamukela amandla nxa umoya ongcwele ufika kini.” Evesini le uJesu uphinda athembise abafundi bakhe ukuthi uzabanika umoya ongcwele a owawuzabancedisa nxa yena esebuyele ezulwini. (UJohane 14:16, 26) UJesu wabuyela ezulwini ngomnyaka ka-33 C.E, futhi ngemva kwensuku ezilitshumi abalandeli bakhe bamukela umoya ongcwele ababewuthenjisiwe. (ImiSebenzi 2:1-4) Umoya ongcwele kaNkulunkulu wabancedisa ukuthi bakhulume ngezindimi ezehlukeneyo, ukuthi benze izimangaliso lokuthi batshumayele ngesibindi beveza ukuthi balokholo kuJesu.—ImiSebenzi 3:1-8; 4:33; 6:8-10; 14:3, 8-10.

 “Lizakuba ngofakazi bami.” Ibala elihunyutshwe ngokuthi ‘ofakazi’ litsho “umuntu okhuluma” into azibonele yona kumbe “ofakaza” into ayaziyo. Abaphostoli baphila laye uJesu yikho babengafakaza ngalokho okwenzakala kuye esemhlabeni, ngokufa langokuvuswa kwakhe. (ImiSebenzi 2:32; 3:15; 5:32; 10:39) Ababekutsho kwenza abanengi baba leqiniso lokuthi uJesu wayenguKhristu okutsho uMesiya owayethenjisiwe. (ImiSebenzi 2:32-36, 41) Labo abakholwa okwakutshiwo ngabaphostoli baba ngofakazi bakaJesu futhi batshumayeza abanye bebatshela okunengi ngempilo kaJesu, ukufa kwakhe kanye lokuvuswa kwakhe.—ImiSebenzi 17:2, 3; 18:5.

 “Kuze kuyefika ekucineni komhlaba.” Amazwi la angahunyutshwa langokuthi “lapho okucina khona umhlaba” kumbe “lakwamanye amazwe.” Amazwi kaJesu aveza indlela abalandeli bakhe ababezasebenza ngayo befakaza ngaye. Babetshumayela ngalokho abakukholwayo eJudiya leSamariya lakwezinye izindawo. Kwakumele batshumayele ezindaweni ezinengi futhi baxoxe labantu abanengi ukwedlula labo uJesu axoxa labo. (UMathewu 28:19; UJohane 14:12) Kungakapheli iminyaka engu-30 uJesu ekhulume amazwi la, umphostoli uPhawuli wabhala ukuthi izindaba ezinhle ezimayelana loJesu ‘zasezitshunyayelwe kukho konke okudaliweyo okungaphansi kwezulu’ lasezindaweni ezikhatshana ezinjengeRoma, iParthia (eseningizimu-mpumalanga yoLwandle uCaspian) leNorth Africa.—KwabaseKholose 1:23; ImiSebenzi 2:5, 9-11.

 Ibhuku lemiSebenzi liphinda lisitshele izenzakalo ezifanana lalezo ezitholakala ekucineni kweVangeli likaLukha. (ULukha 24:44-49; ImiSebenzi 1:4, 5) Umlobi walo ngumfundi uLukha. Uqalisa indaba yakhe ngokuchasisa indlela uJesu abonakala ngayo kubafundi bakhe ngemva kokuvuswa kwakhe. (ImiSebenzi 1:1-3) Ngemva kwalokho abeselandisa ngendlela ibandla lamaKhristu elabunjwa njalo lakhula ngayo kusukela ngomnyaka ka-33 C.E. kusiya ku-61 C.E.—ImiSebenzi 11:26.

 Amanye amavesi asesahlukweni sokuqala sebhuku lemiSebenzi atshengisa ukuthi abafundi bakaJesu babefuna ukwazi ukuthi uJesu wayezaqalisa ukubusa eyiNkosi yoMbuso kaNkulunkulu ngalesosikhathi yini. (ImiSebenzi 1:6) UJesu wabaphendula ebatshela ukuthi kwakungamelanga bakhathazeke kakhulu ngokuthi uMbuso kaNkulunkulu wawuzabekwa nini. (ImiSebenzi 1:7) Wabatshela ukuthi okwakumele bakuqakathekise yikutshumayela ngaye “kuze kuyefika emaphethelweni omhlaba.” (ImiSebenzi 1:8) Lalamuhla amaKhristu akhuthele emsebenzini wokutshumayela izindaba ezinhle zoMbuso kaNkulunkulu.—UMathewu 24:14.

 Bukela ividiyo le emfitshane ukuze ubone okumunyethwe libhuku lemiSebenzi.