MUSOLO WO KUJIJA 42
NGOMA 103 Vahavisi Vedu —Zvipo zvo Vanarume
Khombijanyi Kubonga “Zvipo Zviri Kuvanarume”
“Paakakwira kudenga . . . , wakapa ungano zvipo zvo vanarume.”—VaE. 4:8.
ZVATISAJIJA
Tinobeseswa kudini ngo va wonereri vo ndharaundha, vakuru no vabesri vo ungano uye tingakhombijisa kudini kuti tinoda vanarume ava vakagondeka.
1. Zvipo zvipi zvotakapuwa ndi Jesu?
AKUNA mundhu umweni anokova kudai inga ndi Jesu. Paainga pasi pano, iyena wakashandisa simba rake kuti abese vamweni. (Ruka 9:12-17) Iyena wakatipa cipo cinokosha maningi, cokutenda kutifira. (Johani 15:13) Kuvhira paakamuswa, Jesu wakandoenderera mberi esiva mundhu anokova. Inga zvaakathembesa, iyena wakakumbira Jehovha mweya mupsene kuti utibese no kutinyalaja. (Johani 14:16, 17 ; 16:13) Jesu unoshandisa musangano jo ungano, kuitira kuti aenderere mberi esitijijisa, kuti tikwanise kuita kuti vandhu vari pasi pese vave vajiji.—Mateu 28:18-20.
2. Maererano na VaEfeso 4:7, 8, “zvipo izvi” zvinosanganisira ani na ani?
2 Wonanyi zvipo zvimweni zva Jesu. Mu postori Pauro wakanyora kuti, pasure pokunge Jesu akwira kudenga “iyena wakapa zvipo vanarume.” (Verenganyi VaEfeso 4:7, 8.) Pauro wakabhuya kuti Jesu wakapa zvipo izvi kuitira kuti zvibese ungano munjira yakasiyana-siyana. (VaE. 1:22, 23; 4:11-13) Nyamasi uno, “zvipo zvo vanarume izvi” zvinobatanija vabeseri no vakuru vo ungano uye vawonereri vo ndharaundha. a Icokwadi kuti vanarume ava vandhu vanocishaishi, nguva imweni vanoshaisha. (Jakobe 3:2) Asi Ishe wedu Jesu Kristu unovashandisa kuti vatibese, ivona zvipo zvake katiri.
3. Tsananguranyi kuti tese tingabeswa kudini ngo “zvipo izvi.”
3 Jesu wakagaja “zvipo izvi zvo vanarume” kuitira kuti zvivangise ungano. (VaE. 4:12) Asi isusu tese, tingavabesa kuti vakwanise kuita ushoni mabasa ovakagajwa. Inga muezaniso: Vamweni vandhu tingashanda pakubesa kuvaka Nyumba yo Kunamatira. Vamwenizve vangabesa ngo kupa zvokuha uye no mabasa amweni akasiya-siyana. Ngo kudalo, tese hedu tingabesa ngo zvatinobhuya no kuita, kuvangisira kunoita vabeseri no vakuru vo ungano uye vawonereri vo ndharaundha. Ngatiwonenyi basi kuti tinobeseswa kudini ngo basa ravanoita uye kuti tingaitenyi kuti ivona na Jesu vawone kuti ivona “zvipo katiri.”
VABESERI VO UNGANO VANOITA “MABASA ANOKOSHA”
4. Mu nguva yo kare “vabeseri vo ungano” vaiita mabasa enyi?
4 Mu zana lo makore okutanga, hama jimweni jakagajwa inga vabeseri vo ungano. (1 Tim. 3:8) Zvinoita inga kuti ndivona vakaita “mabasa anokosha” akabhuiwaya ngo mu postori pauro. (1 VaK. 12:28) Vabeseri vo ungano, vaiita mabasa amweni mu ungano kuitira kuti vakuru vawane nguva yo kujijisa no kuhambira jihama. Inga muezaniso, vabeseri vo ungano ava vangabesa pakuita makhopi o zvinyorwa uye nokutenga zviro zvinozoshandiswa pakuita makhopi aya.
5. Vabeseri vo ungano vanoita mabasa enyi mazuva ano?
5 Wonanyi mabasa anokosha anoizwa ngo vabeseri vo ungano vari mu ungano yenyu. (1 Pet. 4:10) Ivona vangagajwa kuti vawonerere mare yo ungano, vawonerere ndima yo kooparijira, kukumbira mabhuku no kuita kuti vapariji vese vamawane, vangashandazve no kucikwata co audhiyo no vhidhiyo, nokupsakira vandhu ndau yokugara pamusangano jo ungano uye nokucenesa Nyumba yo Kunamatira. Mabasa ese aya anokosha maningi, ngokuti anoita kuti ungano ilambe yakarongeka. (1 VaK. 14:40) Asipi izvi basi zvovanoita, vabeseri vo ungano vamweni vanoita mativi akasiyana-siyana pamusangano yo ungano. Mubeseri wo ungano, ungashanda pakubesa muwonereri wo grupu ro kooparijira. Nguva imweni, mubeseri wo ungano ungagajwa kuti aperekeje vakuru povanonga vesihambira hama.
6. Zvicinyi zvatinoemurira pa mabasa anoizwa ngo hama iji?
6 Basa rinoizwa ngo vabeseri vo ungano rinobesesa kudini ungano? Hanzvaji Beberly, b vanogara Bolivhiya vakati: “Ngo ndava yo vabeseri vo ungano, inini ndinodakarira maningi musangano yedu.” “Basa rovanoita, rinondibesera kuti ndipe mupingulo ngo izwi rinozika, ndinase kuemba pamusangano, ndijije ngo mavhidhiyo uye ndinase kuzwisisa hurukuro. Ivona vanotibesa kuti tirambe takajiviririka, ivona vanotibesa kuti tipinde musangano teishandisa vhidhiyo-konferensiya. Panonga papera musangano, ivona vanotibesa pakucenesa-cenesa, kuwonerera mare yo ungano uye nokuwona kuti tese tino mabhuku atinoda here. Ndinobonga maningi hama iji!” Leslie, anogara Kolombiya ano mwamuna anoshanda inga mukuru wo ungano wakati: “Mwamunangu unothemba vabeseri vo ungano, kuti akwanise kuita mabasa ake ese. No kainga kuti asi ivona waizogara asina nguva yokuita zvimweni, iyeni ndinobonga maningi hama iji ngo kuzvipira ngo mweyo wese pakubesera.” Hina kamare aya ndiwona mazwire atinoitawo.—1 Tim. 3:13.
7. Zvicinyi zvatingaita kuti tikhombijire kubonga kedu? (Wonanyi foto.)
7 Azvinenyi hazvo no mazwire atinoita ngo ndava yo zvinoizwa ngo hama iji, asi Bhaibheri rinotivhunja kuti: “Ivanyi vandhu vanobonga.” (VaK. 3:15) Mukuru wo ungano imweni yo Finlandiya anozwi Krzysztof wakati: “Ndinotumira mesajhi unotsamba yo Bhaibheri ku mubeseri wo ungano, uye ndinobhuya zviro zvaanoita zvinondivangisa maningi no kumubonga ngo basa raanoita.” Pascal na Jael, vanogara Kaledoniya, ivona vanoitira mukumbiro ku vabeseri vo ungano. Pascal wakati: “Kakawanda mukumbiro yedu tinonyanya kuiitira ku hama iji jakagajwari jiri mu ungano yedu.” Jehovha unozwa nokudavira mukumbiro iyi, uye ungano inobesereka maningi.—2 VaK. 1:11.
VAKURU VO UNGANO VANOITA “MABASA ANOKOSHA KUITIRA IMWIMWI”
8. Ngenyi Pauro wakabhuya kuti vakuru vo munguva yo kare “vaishanda ngo simba”? (1 VaTesaronika 5:12, 13)
8 Vakuru vo ungano vomu zana lokutanga vaishanda ngo simba kuitira ungano. (Verenganyi 1 VaTesaronika 5:12, 13; 1 Tim. 5:17) Ivona “vaitungamirira” ungano—kuitisa musangano uye nokuita zvisungo vakabatana inga cikwata co vakuru. Uye ivona “vaitsiura” hama no hanzvaji mu ungano—vaipawo mazano no ndhungamiriro jinoshanda, nocinangwa cokuti ungano ijiviririke. (1 VaT. 2:11, 12; 2 Tim. 4:2) Icokwadi kuti vakuru ava vaishanda ngo simba kuti vasapote mbhuri javo, nokujitungamirira muno zvokunamata.—1 Tim. 3:2, 4; Tito 1:6-9.
9. Mabasa api anoizwa ngo vakuru mazuva ano?
9 Vakuru vo mazuva ano vanozviro zvakawanda zvokuita. Ivona vapariji. (2 Tim. 4:5) Ivona vanoshanda ngo simba mubasa rokuparijira, vanoronga basa rokuparijira mundharaundha matinogara uye vanotijijisa kuti tinase kuita basa iri rokuparijira. Pamweni paya vanoshanda inga vatongi vanorudo uye vasikakasiki kunyangajwa. Mu Kristu paanoita cishaishi cakakura ivona vanomubesa kuti ahwijisirezve ushamwari wake na Jehovha. Vanobasazve rokuita kuti ungano irambe yakacena patsika. (1 VaK. 5:12, 13; VaG. 6:1) Cokutanga, vakuru vanozivikanwa inga vahavisi. (1 Pet. 5:1-3) Ivona vanoita hurukuro ja vese, vanoita zvese zvovanokona kuti vanase kuziva hama jese mu ungano nokujihambira. Vakuru vamweni, vanobesa pakuvakwa ko Nyumba jo Kunamatira. Vamweni vanoronga magungano nokushanda ku Khomiti yo Ligasau yo Cipitari, uye vamweni vanoita divi la vaya vanoenda ko wona vari kuwaja muzvipitari. Vakuru vanoshanda ngo simba kuitira isusu!
10. Zvicinyi zvatinoemurira pa basa rinoizwa ngo hama jiri kushanda inga vakuru?
10 Jehovha wakathembesa kuti waizogaja vatungamiriri vaizotikorondha, uye kuti “atisaizothya zviri zvese.” (Jer. 23:4) Johanna Hanzvaji inogara Finlandiya, yakawona kukwanirisika ko masoko aya amai wayo povakawaja maningi. Iyona yakati: “Kunyange pozvaindinesa kuti ndivhunjewo vamweni mazwire angu, mukuru umweni wandainga ndisikazivi wakava mundhu akanaka mweyo kandiri, uye wakandiitira mukumbiro nokundibesa kuwona kuti waindida maningi. Andisanasi kuzviziva zvaakabhuya, asi zvandinoziva ngo zvokuti ndakajizwa ndakangwaririka. Ndino cokwadi cokuti Jehovha wakatuma hama iyi kuti iviye koondibesa pa nguva kwayo.” Vakuru vo mu ungano yenyu vakamubesesa kudini?
11. Zvicinyi zvatingaita kuti tikhombije kubonga kedu basa rinoizwa ngo vakuru vo ungano? (Wonanyi foto.)
11 Jehovha unoda kuti tireremeje hama iji ngo “ndava yo basa rovanoita.” (1 VaT. 5:12, 13) Henrietta anogara Finlandiya, wakati: “Vakuru vanozvipira ngo mweyo wese kuti vabesewo vamweni, asi izvi azvibhuyi kuti ivona vano nguva no simba risikaperi, kana kuti avana zvineso mu upenyu wavo. Nguva imweni ndinovhunjisa kuti: ‘Munoziva? Imwimwi muri mukuru wakanaka maningi, ndinoda kuti muzvizive.’” Hanzvaji imweni yo kuTurkiya c inozwi Sera yakati: “Vakuru vanoda ‘simba’ kuti vaenderere mberi vesiita basa ravo. Ngo kudalo tingavadanija kumuzi kedu, tingaita urongwa wokubuda navo mu ushumiri.” Pano mukuru wamunoemurira muezaniso wake here? Psakanyi njira yokumubonga ndiyona ngo zvaanoita.—1 VaK. 16:18.
Ndimwi mungapa “simba” hama jaavasharuka kuti vaenderere mberi (Wonanyi ndima 7, 11, 15)
VAWONERERI VO NDHARAUNDHA VANOTIVANGISA
12. Ungano jo muzana ro kutanga ro makore jakaita nasiriro ipi? (1 VaTesaronika 2:7, 8)
12 Jesu Kristu, “wakapa ungano zvipo izvi zvo vanarume”, ivona vanoita mabasa ngo njira yakasiyana-siyana. Vesitungamirirwa ndi Jesu, vakuru vo kuJerusarema vakatumira Pauro na Bharnabhasi uye novamweni inga vawonereri vo ndharaundha. (Mabasa 11:22) Ngenyi? Mukutojanawo, vabeseri vo ungano no vakuru, vanoita ngo kugajwa kuti vavangise ungano. (Mabasa 15:40, 41) Vanarume ava, vakakanda upenyu wavo pa ngozi kuitira kuti vajijise nokuvangisawo vamweni.—Verenganyi 1 VaTesaronika 2:7, 8.
13. Vawonereri vo ndharaundha vanoita mabasa enyi?
13 Vawonereri vo ndharaundha, nguva yese vanogara vari mugwanja. Vamweni vanohamba makirometro akareba, kuvha ku ungano yavo kwenda kuimweni. Pa vhiki rimwe nga rimwe, muwonereri wo ndharaundha unoita hurukuro jakawanda, unohambira hama imwe nga imwe, unoitisa musangano wo maphiyona, wo vakuru uye no wo kooparijira. Unonasirira hurukuro no magungano ese. Iyena unojijisa pacikora co maphiyona, unoronga musangano yo maphiyona anosisira no kutonga shwiro jimweni jinodiwa ngokukasika jaanopuwa kuvha ku Bheteri.
14. Zvicinyi zvatinoemurira pa basa rinoizwa ngo hama jinoshanda inga vavonereri vo ndharaundha?
14 Ungano jinobesereka kudini ngo va wonereri vo ndhaundha? Hanzvaji imweni yo kuTurkiya yakabhuya kudai ngo pamusoro po kuhambirwa ngo vawonereri vo ndharaundha: “Kuhambirwa katinoitirwa ngo muwonereri wo ndharaundha, kunondiita kuti ndidewo kubesa hama no hanzvaji. Ndakazivana no vawonereri vo ndharaundha vakawanda, asi apana na umwe wavo aikhombija kuti wakabatikana maningi kuguma pakurega kubhuya neni.” Johanna, wabhuiwaya pakutanga, waishanda no muwonereri wo ndharaundha, asi vainga vasikawani vandhu mu mamuzi mavo. Iyena wakati: “Kunyange zvakadaro,” andikanganwi zuva iri. Hama jangu mbiri jainga jisavha kuthutha, ngokudaro ndakajizwa ndiri ndega. Muwonereri wo ndharaundha wakandivangisa maningi, wakandiita kuti ndiwone kuti mukushandira Jehovha kuparajana ngo konguva doko, munyika ipsa tinozogara tese nokusingaperi.” Vawonereri vo ndharaundha vakawanda vanoemuriravo maningi zviro zvakanaka zvatinoita.—Mabasa 20:37–21:1.
15. (a) Maererano na 3 Johani 5-8, tingakhombijisa kudini kuti tinobonga basa rovanoita? (Wonanyi foto.) (b) Ngenyi tinodikana kureremeja vakaji vo hama iji uye tingazviitisa kudini? (Wonanyi pakazwi “ Langariranyiwo vakaji vavo.”)
15 Mu Postori Johani, wakavangisa Gayo nokumubesa kuti ave mundhu ano ashira zvakanaka hama jaainga asikazivi, “no kuita kuti ashande pamwepo na ijona pa kubesera cokwadi.” (Verenganyi 3 Johani 5-8.) Njira yotingazviita ndiyona ngo yo kukoka muwonereri wo ndharaundha kuti aviye kumuzi kedu. No kubesa paurongwa wo kubuda mu basa rokuparijira pavhiki ro shanyo. Leslie, abhuiwaya pakutanga unobonga ngo njira yakasiyana-siyana. Iyena wakati: “Ndinovaitira mukumbiro ndesikumbira kuti Jehovha avape zvovanoda kuti vararame. Inini no mwamunangu, tinovanyorera tsamba tesibonga vangiso yovanotipa.” Musakanganwa kuti vawonereri vo ndharaundha vandhuwo inga imwimwi. Nguva imweni, vanowaja, vanoitawo cisuwo no ukama hwavo. Nguva imweni cipo catingavapa, masoko anovangisa atingavavhunja ngo nderemejo yese, ungatova mupingulo wo mukumbiro wavo!—Zvi. 12:25.
“VANARUME AVA ZVIPO” TINOVADA MANINGI
16. Maererano na Zvirevo 3:27, tingajiita muvhunjo jipi pacedu?
16 Mu nyika yese tinoda hama jakawanda kuti jishande inga “zvipo.” Kudai muri hama yakabhabhatijwa ‘munokwanisa kuti mubesewo vamweni here?’ (Verenganyi Zvirevo 3:27.) Manasiririka kuti mushande inga mubeseri wo ungano here? Maakuita here kuti mubese hama jenyu ngo kushanda inga mukuru? d Munokwanisa kuita cinjo mu upenyu wenyu kuti muende ku Cikora co Vapariji vo Masoko o Umambo here? Cikora ici cinozomuita kuti mushandiswe maningi ndi Jesu. Kudai mesiwona kuti amukwanisi, itanyi mukumbiro kuti Jehovha amubese. Kumbiranyizve Jehovha kuti amupe mweya mupsene kuti umubese kuita zvakanaka mabasa amunopuwa mu ungano.—Ruka 11:13; Mabasa 20:28.
17. Ngo kutipa “zvipo” izvi. Tingati Jesu ndi Mambo wakadini?
17 Vanarume ava vakagajwa ndi Jesu, varipo ngokuti iyena ari kutitungamirira mu mazuva ano okupejisira. (Mat. 28:20) Iyemwi amudakari here ngo kuziva kuti muna Mambo anokova, anorudo, wakatipa hama jakanasiririka kuti jitibese? Ngo kudalo, psakanyi mukana kuti mukhombije kuti munobonga maningi vanarume ava. Musamboeja henyu kukanganwa kubonga Jehovha, “cinyuke co zvipo zvese zvakanaka”. —Jak. 1:17.
NGOMA 99 Zvuru zvo Hama
a Vakuru vanoshanda inga umwe wo voDare Rinotungamirira no vabeseri vavo, na vaya vanoshanda kucikwata co Khomiti uye kusanganisiravo na vaya vanoita mabasa akasiyana-siya ‘zvipo’ zvinovha ka Mwari.
b Mazina amweni akacinjwa.
c Kare kaidanijwa kuti Turkiya.
d Kuti muwone zvamungaita kuti mushande inga mubeseri no mukuru wo ungano wonanyi cijijo cinoti “Hama—Muri Kushanda ngo Simba Kuti Muve Mubeseri wo Ungano Here?” no pakazwi “Hama— Murikushanda ngo Simba Kuti Muve Mukuru wo Ungano Here?” pa Mungwaji wa Novembro wo 2024.
