Apokaripsi 13:1-18
13 Irona* rakaima mu musanga wo jombe. Ndakavona cikara cecibuda mu jombe. Icona cainga cino gumi ro nyanga no musoro munomwe. Mu munyanga jaco mainga muno gumi ro majunguja, mu musoro jaco mainga muno mazina anotuka Mwari.
2 Cikara candakavonaro caiezana no khamba. Murenje jaco jaiezana no murenje jo cinyama cinodanijwa kuti, ursu. Muromo waco waiezana no muromo wo mbhondoro. Zinyoka riya rakapa cikara ici simba raro no cigaro caro co umambo no utongi hukuru.
3 Inini ndakavona kuti musoro umwe waco, waiita inga wakakhuvazwa zvo kuti coda kufa. Asi civonje cawo cakaraphwa. Vandhu vese* vaiteverera cikara ciya vecikahamara.
4 Ivona vainamata zinyoka ngokuti rakapa simba cikara. Vainamatazve cikara vecinanga kuti: “Ndiyani wakaezana no cikara? Ndiyani anokwanisa kuhwisana na icona?”
5 Cakapuwa muromo wo kubhuya zviro zvokujikuja no zvinotuka Mwari. Copuwazve simba kuti cirishandise ko makumarongomuna o mweji no mweji muviri.
6 Icona cakafunungura muromo kuti cituke Mwari, cituke zina rake, cituke kwaanogara na vayani vanogara kudenga.
7 Icona cakatendehwa kuhwisana no vakasanwa, covanyisa. Cakapuwazve simba panyezuru po mavhumbo ese no vandhu vese no ndimi jese pomwe no majinja ese.
8 Vandhu vese vanorarama* pasi pano vanozocinamata. Kuvhira pa kusikwa ko nyika, akuna zina ravo na rimwe haro rakatahwa mubhuku ro upenyu ro Vhuta rakaurawa.
9 Ka wiya ano njeve ngaazwe.
10 Kudari aripo anodikana kwenda kuuranda, anozoenda kuuranda. Kudari aripo anoda kuuraya ngo banga, anodikanavo kuurawa ngo banga. Izvo zvinoda kucungirira no rutendo ku vakasanwa.
11 Ndakavonazve cikara cimweni cecivha pasi pano. Icona cainga cino nyanga mbiri jaiezana no jo vhuta. Asi cakatanga kubhuya inga zinyoka.
12 Icona cinoshandisa simba rese ro cikara co kutanga ceciita madiro aco. Cinoita kuti vandhu vese vo pasi pano vanamate cikara co kutanga cainga cino civonje cinouraya cozorapiwa.
13 Icona cinoita zvitatijo zvikuru, cotombhwejesa muriro kuvha kudenga, vandhu vese vakasota.
14 Icona cinocengeja vandhu vanorarama* pasi pano, ngo ndava yo zvitatijo zvacakatendehwa kuita pamberi po cikara. Icona cinovhunja vandhu kuti vaite cithombi co cikara cakakhuvazwaya ngo banga, asi coraramazve.
15 Cikara ciya cakatendehwa kupa mwiha cithombi co cikara, kuti cithombi co cikara ciya, cibhuye no kuita kuti vandhu vese vanoramba kunamata cithombi co cikara vaurawe.
16 Icona cinovangirija vandhu vese; vadoko no vakuru, vakapfuma no varombo, varanda no vaciripi varanda kuti vadihwe cidhindho pa mukono muho kana pa huma.
17 Kuti patame kuwanika mundhu anotenga no kutengesa, kuciripi wiya ano cidhindho, kana kuti zina ro cikara kana civerengo co zina raco.
18 Panoda uzivi nga apa: Wiya ano zivo, ngaapsake kuziva civerengo co cikara. Ngokuti civerengo co cikara ici ngo co mundhu. Civerengo cakona nga ici: Mazana matandhatu na makumatandhatu na tandhatu.*
Masoko o Pasi
^ Kana kuti, zinyoka.
^ Gama ngo Gama: “Pasi pese.”
^ Kana: “vanopona.”
^ Kana: “vanopona.”
^ 666.
