Apokaripsi 2:1-29
2 “Tarai kudari ku ndhumwa* yo mu ungano yo ku Efeso: Wiya wakabata ndhondho nomwe mu nyara yake yo mukono muho, wofamba pakati po zvigajikiro zvinomwe zvo zvibani* zvo goridhi, anonanga kuti:
2 ‘Ndinoziva zviito zvako, kushanda kwako ngo simba no kucungirira kwako, iwewe auregereri vandhu vakashata. Wakaeja vanojiita vapostori kuveni andivopi, wovavona kuti vanyepi.
3 Iwewe uri kucungirira no kucijikira zviro zvakawanda ngo ndava yo zina rangu, ucikarembi.
4 Pikija zvakadaro, ndinonesana na iwewe ngokuti wakasiya rudo hwo wainga nahwo pakutanga.
5 “‘Asi ceujai powakaposera, ukhauye, uite zvowaiitaya pakutanga. Ukatama kuzviita ndinozoviya kouri ndovhisa cigajikiro co cibani* cako pa ndau yaco, ukatama kukhauya.
6 Asi unoita ciro cimwe cakanaka, co kunyenya zviito zvo cikwata ca Nikorau, zviito izvi inini ndinozvinyenyavo.
7 Wiya ano njeve ngaazwe zvinonanga mujimu ku ungano, weciti: Mundhu wiya anonyisa ndinomutendera kuti ahe miti wo upenyu uri mu paradhiso ya Mwari.’
8 “Tarai kudari ku ndhumwa* yo ungano yo mu Esmirna: ‘Wokutanga no wo Kupejisira’ waingaya akafa womuswa ari kunanga kudari:
9 ‘Ndinoziva dambujiko rako no urombo hwako asi iwewe uri mukhupuki. Ndinozivazve vandhu vanotuka vecinanga kuti ivona Vajudha kuveni asipi Vajudha, ndivona sinagoga ya Sathana.
10 Ucathya matambujiko auri kuda kusongana nawo. Dhiyabhu anozoenderera mberi ecidira vamweni venyu mu kadheya kuti munase kuejwa, imwimwi munozova no dambujiko mukati mo gumi ro njiku. Garai wakagondeka mbhera kufa, inini ndinozokupa junguja ro upenyu.
11 Mundhu ano njeve ngaazwe zvinonanga mujimu ku ungano: Mundhu anonyisa, aazofi kocipiri.’
12 “Tarai kudari ku ndhumwa* yo ungano yo ku Pergamo: Wiya ano banga rakareba rorojwa mativi maviri ari kunanga zviro izvi:
13 ‘Ndinoziva powakagara, iwewe wakagara pa cigaro ca Sathana, pikija zvakadaro, uri kuenderera mberi ucibatisisa zina rangu, auzivi kuramba rutendo hwako kwandiri. Pikija mu njiku ja Antipa capupu cangu cakagondeka, wakaurawa pa mutivi penyu panogaraya Sathana.
14 “‘Pikija zvakadaro, pano zviro zvandinonesana na iwewe, iwewe uri kugara no vandhu vari kutevera jijiso ja Bharamu, wiyana wakajijisaya Bharaki kuti apause vana vo Vaiziraeri, kuti vahe zviro zvakapihwa ku zvithombi no kuita uhure.*
15 Iwewe uri kugarazve no vandhu vari kutevera cikwata ca Nikorau.
16 Ngo kudaro, khauyai. Kudari ukatama kukhauya, ndiri kuviyeyo ngo kukasika, ndinozoita hondo na ivona ndecishandisa banga rakareba riri pa muromo wangu.
17 “‘Wiya ano njeve ngaazwe zvinonanga mujimu ku ungano, weciti: Mundhu wiya anonyisa, ndinozomupekeja manaa akavigwa. Ndinozomupekejazve cipuwe cokucena cakatahwa zina ibza. Zina iri, apana anokwanisa kuriziva kuciripi wiya anociashira.’
18 “Tarai kudari ku ndhumwa* yo ungano yo ku Tiyatira: Mwana wa Mwari wiya ano ku meso kwakatojana no murazvu wo muriro no soka jakatojana no utare hwakanaka ari kunanga zviro izvi:
19 ‘Ndinoziva zviito zvako, rudo hwako, kutenda kwako, mabasa ako no kucungirira kwaunoita. Ndinozivazve kuti, zviito zvako zva wari zvakawanda kupinda zvo kutanga.
20 “‘Asi, pano zviro zvandinonesana na iwewe. Iwewe uri kutendera mwanakaji wiya Jezabheri, anojiita muporofeti, ecijijisa no kupausa varanda vangu. Iyena ari kuvaitisa kuti vaite zvo uhure* no kuha zviro zvakapihwa ku zvithombi.
21 Inini ndakapekeja mwanakaji uwu mukana kuti akhauye, asi iyena aadi kukhauya pa uhure* hwake.
22 Ngo kudaro, ndiri kuda kumuhwajisa mbhera akonehwe kumuka. Vaakahuraya navo, ndinoda kuvaviisira dambujiko guru kudari vakatama kukhauya ngo zvavakaitiswaro ndiyena.
23 Inini ndinozouraya vana vo mwanakaji uwu, ngo mutungu wakashata maningi, zvokuti ungano jese jinozoziva kuti inini ndinopsaka zviri mukati mo murangariro no mu mwoyo mo mundhu. Inini ndinozopangira umwe nga umwe wenyu mukuzwirana no zviito zvake.
24 “‘Asi mwese mwasarari ku Tiyatira, mwese mucikatevereri wari jijiso iyi, mwese mucizivi wari kuziva zvinodanijwa kuti “zviro zvakajika zva Sathana,” ndiri kumuvhunja kuti: Andiripi kumuengejera mutoro umweni.
25 Asi batisisanyi zvamunazvo mbhera ndaviya.
26 Mundhu wiya anozonyisa, wongwarira makwanja angu mbhera pa mugumo, ndinozomupekeja simba ro kutonga majinja.
27 Ndirona simba rondakapuwa ndi Babangu. Mundhu wondhowo anozohavisa vandhu ngo ndonga yo simbi, wozovagura-gura kuita zvitimbu, inga mujiyo wo dongo.
28 Ndinozomupekeja ndhondho yo mangwanani.
29 Wiya ano njeve ngaazwe zvinonanga mujimu ku ungano.’
Masoko o Pasi
^ Gama ngo Gama: “ngirozi.”
^ Zvigabhu-gabhu.
^ Cigabhu-gabhu
^ Gama ngo Gama: “ngirozi.”
^ Gama ngo Gama: “ngirozi.”
^ Vonanyi Kudurujihwa ko Magama.
^ Gama ngo Gama: “ngirozi.”
^ Vonanyi Kudurujihwa ko Magama.
^ Vonanyi Kudurujihwa ko Magama.
