Apokaripsi 6:1-17
-
Vhuta rinofunungura zvinamiro zvitandhatu zvo kutanga (1-17)
6 Inini ndakavona Vhuta parakafunungura cinamiro cokutanga pa zvinomwe, ndozwa cisikwa cimwe co zvisikwa zvirongomuna zvinopona cecinanga ngo izwi rakaezana no kupaja ko mbheni ceciti: “Izai!”
2 Inini ndakavona haci yokucena, yaipakihwa ngo mundhu ano uta. Iyena wakapuwa junguja, wobuda ecinyisa kuti apejise kunyisa kwake.
3 Paakafunungura cinamiro cocipiri, ndakazwa cisikwa cocipiri cinopona ciciti: “Izai!”
4 kwakabuda haci imweni yomushovo wo muriro, mupakiri wayo wakavhunjwa kuti avhise runyararo pa nyika, kuti vandhu vaurayane ngocavo, wopuwa banga guru.
5 Paakafunungura cinamiro cocitatu, ndakazwa cisikwa cocitatu cinopona ciciti: “Izai!” ndakavona haci yakasvipa, yakapakihwa ngo mundhu ano mupimo mu nyara jake.
6 Ndakazwa zvaiita inga izwi pakati po zvisikwa zvirongomuna zvinopona, reciti: “Ritru imwe yo tirigu inotengwa ngo dhenariyo* rimwe, ritru ndhatu jo sevhadha jinotengwa ngo dhenariyo* rimwe; ucashakera* mafuta no vhinyu.”
7 Paakafunungura cinamiro cocirongomuna, ndakazwa izwi ro cisikwa cocirongomuna, reciti: “Izai!”
8 Ndakavona haci yakacenerukira. Iyona yaipakihwa ngo mundhu ano zina raidanijwa kuti Rufu. Guva* raimutevera ngo phedo. Vakapuwa simba pa divi ro cirongomuna ro pasi pano, kuti vauraye ngo banga, njara, ndhenda yakashata no zvikara.
9 Paakafunungura cinamiro cocishanu, ndakavona pasi po artari, pano ngazi yo vakaurawa ngo ndava yo soko ra Mwari no ucapupu hwavakaita.
10 Ivona vaikhuwa* veciti: “Mambo Mukuru-kuru wakacena no wo cokwadi, munozoregera kutonga no kuhwirijira vandhu vo panyika vakatiurayaya mbhera rini?”
11 Umwe na umwe wavo wakapuwa nguvo yakareba, yo kucena, vovhunjwa kuti vavetere padoko mbhera ukwane mutengo wo varanda doni vavo no hama javo jaida kuurawa inga zvavakaithwa.
12 Ndakavona paakafunungura cinamiro co citandhatu, kwakaita kuzungunyika kukuru ko nyika; zuva rakasvipa inga nguvo yo rutu,* mweji wese wakaita inga ngazi,
13 ndhondho jo kudenga jakambhwera pa nyika, inga mukuyu paunozungunyisa ngo zibepo, wombhweja makuyu mavishi.
14 Denga rakafunduruka inga muphukutu uri kupetwa, matundhu ese no zvirundu zvese zvakavhiswa pa ndau yazvo.
15 Majimambo o nyika, vakuru, vatungamiriri vo masoca, vakhupuki, vandhu vakavanga, varanda vese no vandhu vese vakasujunuka vakafindara mu mabambha* no pakati po mapuwe o matundhu.
16 Ivona vaindovhunja matundhu no mapuwe kuti: “Tiwirenyi mutifindarise kuna Wiya wakagara pa cigaro co umambo no ku ushungu hwo Vhuta,
17 ngokuti njiku huru yo ushungu hwavo yaguma, ndiyani angakwanisa kuima?”
Masoko o Pasi
^ Zingwenjere Rociroma rairema mutengo wo 3, 85g.
^ Zingwenjere Rociroma rairema mutengo wo 3, 85g.
^ Kana: “ucatamba no.”
^ Kana: “haidhesi.” Kufa kunoita vandhu vese.” Vonanyi kudurujihwa ko magama.
^ Kana: “vaimima.”
^ Kusvipa.
^ Kana: “mapako.”
