Apokaripsi 9:1-21
9 Ngirozi yocishanu yakarija mbhayapaya yayo. Ndakavona ndhondho yainga yakawa kuvha kudenga kwenda pasi. Iyona yakapuwa shavhi yo rindi rakajikisisa.
2 Ndhondho yakafunungura rindi rakajikisisa, mu rindi miya makabuda usi. Usi hwondhohwo, hwaiezana no usi hunobuda pa coto cakakura. Zuva no mbhepo zvakasvipa ngo ndava yo usi hwaivhaya mu rindi.
3 Mu usimo makabuda ndere. Nderejo jakandhandhanika pasi pese. Ijona jakapuwa simba rakaezana no simba ro zvinyamuthwa* zviri panyika.
4 Ijona jakarambiswa kukhuvaza sora no muti iri yese yo panyika, asi jakatendehwa kukhuvaza vandhu vacina cinamiro ca Mwari pa huma pavo.
5 Ndere ajizivi kutendehwa kuti jiuraye vandhu, asi jakatendehwa kuti jivahwajise mukati mo mweji mushanu. Kuhwajisa kondhoko kunoezana no kuhwajisa kunoita cinyamuthwa* cikaruma mundhu.
6 Mu njiku jondhojo vandhu vanozopsaka kufa, asi avazokuwani. Vandhu vanozoda kufa, asi rufu hunozovatiza.
7 Ndere iji jainga jakaita inga haci jakanasirira kuti jiende ku hondo. Mu musoro majo mainga muno zvakaezana no junguja ro goridhi. Mu meso majo mainga makaezana no mu meso mo vandhu.
8 Ijona jainga no vhuji rakaezana no vhuji ro vanakaji. Meno ajo aiezana no meno o mbhondoro.
9 Jaingazve jino muthavo yakatojana no muthavo yo simbi. Kubhabhama kwajo kwaiezana no ngoro jecikweviwa ngo haci jecienda ku hondo.
10 Kusiyapo izvi, ijona jainga jino mushe jinoruma inga zvinyamuthwa.* Mu mushemo ndimona mainga no simba ro kukhuvaza vandhu mukati mo mweji mushanu.
11 Ijona jainga jina mambo. Mambo uwu, ingirozi yo murindi rakajikisisa. Mu Cihebheru zina rake raidanijwa Abhadhoni,* mu Cigiriki zina rake raidanijwa Aporiyoni.*
12 Dambujiko rokutanga rapera. Bhasopanyi! Kuri kuviya matambujiko maviri sure ko zviro izvi.
13 Ngirozi yocitandhatu yakarija mbhayapaya yayo. Ndakazwa izwi raivha pakati po manyanga o artari yo goridhi iri pamberi pa Mwari,
14 recivhunja ngirozi yocitandhatu yainga ino mbhayapaya kuti:“Sujunurai ngirozi murongomuna jakasungihwa ku murambo mukuru unodanijwa kuti Eufrate.”
15 Ngirozi murongomuna jaingaya jakanasirihwa kuti igume nguva, njiku, mweji no gore, jakasujunuhwa kuti jiuraye divi doko* ro vandhu.
16 Mutengo wo zvikwata zvo masoca aipakira haci, ainga mazana maviri o zviuru zvakawandisisa,* inini ndakazwa civerengero ici.
17 Inini ndakavona haci no vandhu vainga vakajipakira, ivona vainga vakadari: Ivona vaisimira muthavo jokujivirira pa diti, muthavo iji, jainga jino kori yokupsuka, yo safarau no yo khowa. Haci javaipakira jainga jino musoro yakaezana no yo mbhondoro, pa muromo pajo paibuda muriro, usi no enshofre.
18 Vandhu vashoma* vakaurawa ngo matambujiko matatu aya, muriro, usi no enshofre yaibuda pa muromo pajo.
19 Ngokuti simba ro haci iji riri mukanwa majo no mushe yajo, ngokuti mushe yajo yakatojana no nyoka, yova no musoro. Ijona jinokhuvaza ngo mushe yajo.
20 Asi vandhu vacikazivi kuuraiwa ngo matambujiko aya avazivi kukhauya pa zviito zvavo. Ivona avazivi kuregera kunamata madhimoni, zvithombi zvo goridhi, sirivha, utare,* mapuwe no matabwa, zvicikakwanisi kuvona nee kuzwa nee kufamba.
21 Ivona avazivi kukhauya ngo kuuraya kwavanoita no kuita zvomujimu no kuita uhure* no kuba kwavanoita.
Masoko o Pasi
^ Kana: “zvinyavada.”
^ Kana: “cinyavada.”
^ Kana: “zvinyavada.”
^ Kana kuti “Kuparaja.”
^ Kana kuti “Muparaji.”
^ Gama ngo Gama: “1/3.”
^ Kana: “20.000 x 10.000.” Zvinoreva kuti, 200.000.000.
^ Gama ngo Gama: “1/3.”
^ Mu ciputukezi i kobhre.
^ Mu Cigiriki, por·nei′a. Vonanyi Kudurujihwa ko Magama.
