Genesisi 7:1-24
7 Pasure pa izvo Jehovha wakavhunja Nowa kuti: “Nghwinai mu arka, iwewe no mbhuri yako. Ngokuti ndiwe wondavona wakarurama pamberi pangu pakati po mubarihwa uwu.”
2 Unodikana kutora mukhaindi wese wo zvinyama zvakacena zvinomwe zvinomwe, zvorume no zvokaji.* Mukhaindi wese wo zvinyama zvicizivi kucena, torai zviviri basi; corume no cokaji.
3 Utorezve zvisikwa zvinomburuka ku matenga zvinomwe zvinomwe, zvorume no zvokaji,* kuti uponese mubarihwana yazvo pasi pese.
4 Ngokuti pasara njiku nomwe kuti ndinise nvura pa nyika ko 40 o njiku, usiku no masikati. Inini ndinozopeja zviro zvese zvinopona zvondakasika pa nyika.”
5 Perapo Nowa wakaita zvese zvaakavhunjwa ndi Jehovha.
6 Nowa wainga no 600 o makore, ndambi* poyakaitika.
7 Ngo kudaro, Nowa, vana vake, mukaji wake no nyamwana* jake, vakanghwina mu arka ndambi* icito yatanga.
8 Ku zvinyama zvese zvakacena, zvinyama zvese zvicizivi kucena, zvisikwa zvese zvinomburuka no zviro zvese zvinofamba pasi pano,
9 zvakanghwina mu arka mainga na Nowa, zviviri zviviri; corume no cokaji, inga zvaakavhunjwa Nowa ndi Mwari.
10 Pa njiku nomwe jakatevera nvura yakatanga kuna.
11 Nowa paakava no makore anokwana kuita 600, mu njiku 17 yo mweji wo cipiri, mu njiku iyi, kumwa yakawanda yo kudenga, yakafununguhwa no musuvo jo mugore jakafununguhwavo.
12 Nvura yakana 40 o njiku; usiku no masikati.
13 Pa njiku yondhoyo kamare, Nowa wakanghwina mu arka no vana vake vanodanijwa kuti Semi, Kami na Jafeti no mukaji wake no nyamwana* jake ndhatu.
14 Ivona vakanghwina pamwepo no zvinyama zvese zvo musora mukuzwirana no mukhaindi wazvo, zvifuyo zvese mukuzwirana no mukhaindi wazvo, zvinyama zvese zvinogwezva pa nyika mukuzwirana no mukhaindi wazvo, zvisikwa zvese zvinomburuka mukuzwirana no mukhaindi wazvo, zvakadari inga shiri jese, no zvisikwa zvese zvino mapapiro.*
15 Mukhaindi wese wo zvinyama zvino upenyu,* zvaienderera mberi zvecinghwina mu Arka mwainga muna Nowa, zviviri zviviri.
16 Ngo kudaro, mukhaindi wese wo zvinyama wakanghwina zvorume no zvokaji, inga zvakanangwa ndi Mwari ecivhuja Nowa. Perapo Jehovha wakafunga musuvo ngo kunja.
17 Nvura yakaenderera mberi icina ko 40 o njiku. Kumwa yakaenderera mberi yeciengejeka yothwara arka. Arka yakatanga kutumbaira panyezuru po kumwa.
18 Kumwa yakawanda maningi, yoenderera mberi yeciengejeka pasi pano, asi arka yaitumbaira panyezuru po kumwa.
19 Kumwa yakazara maningi panyika, zvoita kuti matundhu ese apere kubobojwa* pasi pano.
20 Kumwa yakazara kupindirija matundhu pa mutengo wo metru ndhandhatu no meya.
21 Ngo kudaro, zvisikwa zvese zvinopona zvaifamba pa nyika, zvakapera kufa, kubatanija zvisikwa zvinomburuka, zvifuyo, zvinyama zvo musora, zvinyama zvidoko zvinofamba pa nyika ngo cikwata, kubatanijavo no vandhu vese.
22 Zviro zvese zvainga pa nyika zvinopona no zvinofema, zvakafa.
23 Iyena wakapeja zviro zvese pasi pano zvinopona, kubatanija vandhu, zvinyama, zvinyama zvinogwezva pa nyika no zvisikwa zvinomburuka mugore. Zvese zvakapera. Nowa basi no vaainga navo mu arka ngo vakapona.
24 Kumwa yaindofukija pasi pese mukati mo njiku jinokwana kuita 150.
Masoko o Pasi
^ Kangaije: “zvinomwe zvorume no zvinomwe zvokaji.”
^ Kangaije: “zvinomwe zvorume no zvinomwe zvokaji.”
^ Kana: “guwe.”
^ Kana: “vakajimwana.”
^ Kana: “guwe.”
^ Kana: “vakajimwana.”
^ Kana: “mapapa.”
^ Gama ngo gama: “zvino mbhepo yo kufema yo upenyu.”
^ Kana: “kubobonijwa; kubobomejwa.”
