Isaya 50:1-11
50 Jehovha anoti:
“Iri kwapi tsamba inokhombija kuti ndakarambana na mai wako, avo vandakapindisa?
Ngovapi vandhu vangu vandakamutengesera?
Izwanyi! Imwimwi makatengeswa ngo ndava yo zvishaishi zvenyu,Mai wenyu vakarambiwa ngo ndava yo zvishaishi zvenyu.
2 Waro ngenyi andizivi kuwana mundhu pandakaviya?
Pandakadaninja, ngenyi apazivi kudavira mundhu ari wese?
Kureva kuti nyara yangu yakafupika maningi kuti ndisujunure?Kana kuti andina simba rokusujunura?
Izwanyi! Ngo masoko angu ndinovomesa jombe;Ndinocinja murambo yova ndau yakaoma.
Hove jemo jinofa ngo nyota,Jovora ngo kutama kumwa.
3 Ndinofukija matenga ngo cidima,Ndomasimija ngo mapendera o saku.”
4 Mambo Mukuru-kuru Jehovha wakandipa rurumi wo vandhu vakajijiswa,Kuti ndizive kubhuya masoko anotondhoja ku mundhu wakaremba.
Iyena anondimusa mangwanani ega ega;Anobeura njeve jangu kuti ndizwe ngo maitiro o vandhu vakajijiswa.
5 Mambo Mukuru-kuru Jehovha wakabeura njeve yangu,Inini andizivi kumupandukira.
Inini andizivi kumufuratira.
6 Ndakapa musana wangu ku vandhu vaya vainditakaNdopa kumeso kwangu ku vandhu vaya vaivhita mupungu wangu.
Andizivi kufindarisa kumeso kwangu ku vandhu vaya vaiindituka no kundipfirira mata.
7 Asi Mambo Mukuru-kuru Jehovha anozondibesa.
Ngo kudaro, andizojizwi kuti ndiri kudodokeswa.
Ngo ndava yazvo, ndakavangisa kumeso kwangu inga buwe,Ngokuti ndinozviziva kuti andizopserujwi.
8 Wiya anondizivisa kuti ndakarurama, ari phedo.
Ndiyani angandipa ndava?
Ngatimuke tese tiime.
Ndiyani ano ndava na inini?
Ngaandikhwederere.
9 Izwanyi! Mambo Mukuru-kuru Jehovha anozondibesa.
Ndiyani angandipa ndava?
Izwanyi! Vese vanozosakara inga nguvo.
Zvifundho, zvinozovafundha.
10 Ndiyani pakati penyu anothya Jehovha?Opurukira izwi ro mushandiri wake?
Ndiyani ari kufamba mucidima cikuru, mucina ruvheneko?
Ngaathembe zina ra Jehovha, onasa kuthemba kubeswa ndi Mwari wake.
11 “Imwimwi mwese muri kubwakija muriro,Mecimburusa murazvu,Fambanyi muruvheneko wo muriro wenyu,Pakati po murazvu womakabwakija.
Izvi ndizvona zvamunoashira kuvha mu nyara jangu:
Mwese munozovata pasi ngo kuhwajihwa.
