Isaya 59:1-21
59 Izwai! Nyara ya Jehovha aizivi kufupika maningi zvokuti ingakonehwa kukuponesa,Njeve yake aina mandondo kuti itame kuzwa.
2 Kuposa kwenyu, ndikona kwaita kuti imwimwi muparajane na Mwari wenyu.
Zvishaishi zvenyu zvaita kuti Mwari afindarise kumeso kwake pamberi penyu,Iyena anoramba kumuzwa.
3 Ngokuti nyara jenyu jakazara ngo sangiZvikunwe zvenyu zvakazara ngo kuposa.
Muromo jenyu jinobhuya manyepo, rurimi hwenyu unobhuya zviro zvakashata.
4 Pakati pavo, apana ari kupsaka ururami,Apana anobhuya cokwadi paanoenda kootongwa.
Ivona vanothemba zviro zviciripi zvokadi, vobhuya zviro zvicina musoro.
Ivona vanorangarira kuita zvakashata mukuwo wese, vobara ushati.
5 Ivona vanososova mazanda o buura,Vanoruka madandemutande.
Wiya anoha mazanda avo anofa,Zanda rakasosohwa rinobuda vhumbi.
6 Madandemutande avo aazoiti nguvo,Nee avazofukijwi ngo zvavanoita.
Mabasa avo akashata,Nyara javo jinoenderera mberi jeciita zvakashata.
7 Murenje javo jinogogoma kuti jiite zvakashata,Ivona vanouraya vandhu vacina ndava ngo kukasika.
Vanorangarira zviro zvakashata;Mu makwanja avo muno dambujiko no khombo.
8 Ivona avazivi gwanja ro runyararo,Mavanofamba amuna ururami.
Ivona vanokombamisa makwanja avo;Apana anofamba ndimona anozoziva runyararo.
9 Izvo ndizvona zvinoita kuti ururami uve ndhambo nesu,Urungami utame kutigumira.
Tiri kuenderera mberi teciimira ruvheneko, asi kuno cidima;Tiri kuimira kuti kunja kueje, asi tiri kuenderera mberi tecifamba mu makwiti.
10 Tinombhambhasira mabiravira inga mapofu;Toenderera mberi tecimbhambhasira inga ticina majiso.
Tinokhugunyika comasikati inga usiku;Pakati po vandhu vano simba, takaita inga takafa.
11 Itusu tese tinobhonga inga ursuTinorira inga njiva.
Tiri kuvetera ururami asi iwona ahuko;Tiri kuvetera ruponeso, asi iwona uri ndhambo nesu.
12 Ngokuti zviito zvo kupanduka kwedu, zvakawanda maningi pamberi penyu;Zvishaishi zvedu zvinotiitira ucapupu.
Ngokuti tinonasa kuziva ushoni kupanduka kwedu;Tinonasa kuziva ushoni kuposa kwedu.
13 Takashaisha no kuramba Jehovha;Takafuratira Mwari wedu.
Takabhuya ngo pamusoro po kubzinyirira no kupanduka.Takava no mimba yo manyepo, tobhuya zvokunyepa zvecivha ngo mu mwoyo.
14 Ururami uri kusiiwa sure,Urungami uri kudihwa ndhambo;Ngokuti cokwadi cakakhugunyika pa bazari,Zvakanaka azvikwanisi kunghwina.
15 Cokwadi, cangarangaka,Wiya anosiya kuita zvakashata anotohwa.
Jehovha wakavona izvi wotama kuzvidakarira,Ngokuti painga pacina ururami.
16 Iyena wakavona kuti painga pacina mundhu,Wakakahamara ngo kuvona kuti apana wakazvinghwinira,’Ngo kudaro, mukono wake kamare wakaviisa ruponeso,Ururami hwake kamare wakaita kuti iyena awine.
17 Ngo kudaro, iyena wakasimira ururami inga nguvo yo simbi yo musocaWosimira cigoko co ruponeso mu musoro mwake.
Iyena wakasimira nguvo* yo kuhwirijiraWosimirazve ciro cakavanga cokudira zviro zvakanaka inga nguvo.
18 Iyena anozohwirijira mukuzwirana no zvavakaita:
Anozocamwira vavengi vake no kuhwirijira vavengi vake.
Anozopekeja zvirundu zviya zvazvinofanera.
19 Zina ra Jehovha rinozothyiwa kuvha kumaviriraKukujwa kwake kunozoreremejwa kuvha kumavhazuva,Ngokuti iyena anozoviya inga kumwa yo murambo ino simba,Inondundwa ngo mujimu wa Jehovha.
20 “Muponesi anozoguma ku Ziyoni,No kuno vaya vari pakati pa Jakobe vakasiya zvakashata,” izvi ndizvona zvinonanga Jehovha.
21 “Ici ndicona citenderano candinozoita navo,” izvi ndizvona zvinonanga Jehovha. “Mujimu wangu uri pakati pako, no masoko angu andakadira pa muromo pako, aazovhiswi pamuromo pako nee pamuromo po vana vako nee pamuromo po vazukuru vako.” Izvi ndizvona zvinonanga Jehovha, “kuvhira wari mbhera narini.”
Masoko o Pasi
^ Kana: “tunika.”
