Isaya 7:1-25
7 Mu njiku ja Akazi mwana wa Jotami mwana wa Uziya mambo wo Judha, Rezini mambo wo Siriya na Peka mwana wa Remariya mambo wo Iziraeri, vakaviya kuzohwisa Jerusarema, asi ivona avazivi kukwanisa kuritora.
2 Vandhu vo nyumba ya Dhavhidhi vakaziviswa kudari: “Siriya yabatana no Efraimi.”
Mwoyo wa Akazi no mwoyo jo vandhu vake jakatanga kutetemera, inga muti jo musora jinovhunguzwa ngo mbhepo.
3 Ngo kudaro, Jehovha wakavhunja Isaya kudari: “Ndabata murenje, endai iwewe no mwana wako Sheari-jashubhi* koosongana na Akazi, panogumira mugere* wo kumwa unovha mudenga. Phedo no gwanja guru ro munda wo mupaji.
4 Muvhunjei kudari: “Ivai no cokwadi cokuti unozogara wakagajana. Ucathya, mwoyo wako ucaneseka ngo ndava yo zvica zviviri izvi zviri kupfukuta ngo ndava yo ushungu unobwaka wa Rezini, wa Siriya no wo mwana wa Remariya.
5 Ngokuti Siriya, Efraimi no mwana wa Remariya vapangana kukuitira zvakashata vecinanga kudari:
6 Ngatende koohwisa Judha tiigure-gure. Ngatiitore, tigaje mwana wa Tabheeri kuti ave mambo wayo.”
7 “‘Mambo Mukuru-kuru Jehovha anonanga kudari:
“Izvi azvizobudiriri,Nee azvizoitiki.
8 Ngokuti Dhamasko musoro wo Siriya,Rezini musoro wo Dhamasko.
Mukati mo makumatandhatu o makore no makore mashanuEfraimi anozoguhwa-guhwa, vandhu vake vanozopejwa.
9 Samariya ndiyena musoro wo Efraimi,Mwana wa Remariya ndiyena musoro wo Samariya.
Mukatama kuva no rutendo hwakavanga,Umambo hwenyu ahuzovangi.”’”
10 Jehovha wakaenderera mberi ecibhuya na Akazi eciti:
11 “Kumbirai citatijo kuna Jehovha Mwari wako; pikija cakajika inga Guva* kana cakareba inga gore.”
12 Asi Akazi wakadavira kudari: “Andizokumbiri, andizoeji Jehovha.”
13 Isaya wakananga kudari: “Ndizwenyi ndapota, imwimwi vo nyumba ya Dhavhidhi. Azvikwani kueja kusengerera ko vandhu? Munodazve kueja kusengerera kwa Mwari here?
14 Ngo kudaro, Jehovha pacake anozomupa citatijo. Izwanyi! Musikane anozova no mimba, perapo wobara mwana. Ozomudura zina rokuti Emanuweri.*
15 Pa mukuvo waanozokwanisa kuziva kuramba zvakashata osana zvakanaka, anozoha basi mantega no uci.
16 Asi mwana mudoko uu acito aziva kuramba zvakashata osana zvakanaka, nyika yo majimambo maviri aunothya iwewe inozoita mathere.
17 Jehovha anozosiya iwewe, vandhu vako no nyumba ya baba wako mecipona mu mukuvo ucizivi kumbovepozve kuvhira pa njiku yakasiyana Efraimi na Judha. Ngokuti iyena anozoviisa mambo wo Asiriya kuti akuhwise.
18 “Pa njiku yondhoyo, Jehovha anozorija mundozwa kuti adaninje ndhunji jiri ndhambo ku mugere wo Niro ku Ejipita no nyuci jiri ku nyika yo Asiriya.
19 Ijona jese jinozoviya jozomata mu mapani akajika, mu mapuwe akamweka, mu ndau jese jino muzwa no mu ndau jese jinomwira kumwa zvinyama.
20 “Pa njiku yondhoyo, Jehovha anozomupara musoro wake ecishandisa cirezi cakashongwa ku mutundhu wo murambo Eufrati. Anozoshandisavo mambo wo Asiriya kuti apare makwindi* o makumbo ake no ndevhu jake ngo cirezi.
21 Pa njiku yondhoyo, vandhu vanozorera cimwana co n’gombe cokaji* ciri mu phandu* no mavhuta maviri.
22 Ngo ndava yo kuwanda ko mukaka,* ivona vanozoha mantega. Vanozosara munyikemo, vanozoha basi mantega no uci.
23 “Pa njiku yondhoyo, pa ndau jese jainga jino muti yo muuvha inokwana kuita 1.000 inoita mutengo unokwana kuita 1.000 yo mangwenjere o sirivha, basi panozova no muzwa no sora.
24 Vanarume vanozonghwinemo vano uta no mupasha, ngokuti nyika yese inonga yakazara ngo muzwa no sora.
25 Ngo ndava yo kuthya muzwa no sora, iwewe auzokhwedererizve matundhu ainga ecirimwa kare ngo mapaja. Ngokuti iwona anozova ndau yokuhavira n’gombe no ndau yokucikwa-cikwa ngo mavhuta.”
Masoko o Pasi
^ Zvinoreva: “Panozova no Vashoma Vanozohwirira.”
^ Kana: “museri.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Zvinoreva: “ Mwari Ana Itusu.”
^ Kana: “vhuji, manviri.”
^ Kana: “buru, thoyo.”
^ Kana: “cibaya.”
^ Kana: “reti.”
