Nduyo 80:1-19
Ku mutungamiriri. Inobhuya ngo pamusoro po mafirori. Kuti vandhu vaceukije. Nduyo ya Azafi.
80 Izwanyi, imwimwi Muhavisi wo Vaiziraeri,Imwimwi munotungamiriraro Josefa inga mushambi.
Imwimwi makagararo pacigaro co umambo panyezuru po makerubhi,Khombijanyi ruvheneko hwenyu.
2 Khombijanyi simba renyu,Kuna Efraimi, Bhenjamini na Manase;Viyanyi mutiponese.
3 Mwari wedu, tikhombijirenyizve unyasha;Itanyi kuti kumeso kwenyu kumonikire pakati pedu kuti tiponeswe.
4 Jehovha Mwari wo hondo, munozoenderera mberi makanyangajwira vandhu venyu mucikapurukiri mukumbiro javo mbhera rini?
5 Imwimwi makaita kuti musoji javo jiite inga zvokuha kwavari,Makaita kuti ivona vamwe musoji javo inga kumwa.
6 Imwimwi munotendera kuti vocigarisano vedu vatukane ngo ndava yedu;Vavengi vedu vari kuenderera mberi vecitishora mu njira yavanoda.
7 Mwari wo hondo, tikhombijirenyizve unyasha;Itanyi kuti kumeso kwenyu kumonikire pakati pedu kuti tiponeswe.
8 Makaita kuti mu Ejipita mubude muti wo muuvha,
Imwimwi makagogomera vandhu vo majinja mu nyika yavo, mosima muti wo muuvha mondhomo.
9 Imwimwi makarima ndau kuti musime muti wo muuvha,Muji jawo jakatanda, iwona wakazaja nyika.
10 Matundhu akafukijwa ngo munvuriri wawo,Muti ya Mwari yo sedhro yakafukijwa ngo matavi awo.
11 Matavi awo akaguma mbhera ku jombe,Zvimatavi zvawo zvakaguma mbhera kumurambo.
12 Ngenyi imwimwi makaphwanya mupfimbiji wo mapuwe waijivirira muti wo muuvha,Kuti vandhu vese vanokhirira vakave mucero jawo?
13 Nguruve jo musora jakauha,Zvinyama zvo musora zvinouha.
14 Mwari wo hondo, tapota viyanyi.
Sotanyi muri kumatenga, muvone zviri kuitika!
Korondhanyi muti uwu wo muuvha.
15 Muti wamakasima ngo mukono wenyu wo muho,Sotanyi mwana* wamakapa simba kuti imwimwi pacenyu mukujwe.
16 Iwona wakaguhwa, wopiswa pa muriro.
Ivona vanofa pamunovapangira.
17 Nyara yenyu, ngaibese mundhu ari ku mukono wenyu wo muho,Mwana wo mundhu wamakapa simba kuti imwimwi pacenyu mukujwe.
18 Mukaita kudaro, itusu atizomusiyi.
Tiponesenyi, kuti itusu tidaninje zina renyu.
19 Jehovha Mwari wo hondo, tikhombijirenyizve unyasha;Itanyi kuti kumeso kwenyu kumonikire pakati pedu kuti tiponeswe.
Masoko o Pasi
^ Kana: “davi ramakapa.”
