Ruka 12:1-59
-
Mbijo yo Vafarisi (1-3)
-
Kuthya Mwari, kuciripi vandhu (4-7)
-
Anotenda kuti anomuziva Kristu (8-12)
-
Muezaniso wo mukhupuki wakaita rethe (13-21)
-
Mucathimwa-thimwa (22-34)
-
Mushambi mudoko (32)
-
-
Kurinda (35-40)
-
Muvonereri wakagondeka no acizivi kugondeka (41-48)
-
Andizivi kuviisa runyararo, ndakaviisa kuparajana (49-53)
-
Munodikana kuziva zviri kuitika (54-56)
-
Kutonga zvineso (57-59)
12 Pa mukuvo uwo, mbungano yo vandhu yo zviuru no zviuru payainga yakaungana pamwepo, veciita no kucikana, iyena wakatanga kuvereketa ecivhunja vajiji vake kuti: “Ngwariranyi mbijo yo Vafarisi. Kana kuti, ngwariranyi macengejere avo.
2 Apana cakavigika cicikazovoneswi pambhene. Akuna cakafisika cicikazoziviki.
3 Ngo kudaro, zvese zvamunovereketa mucidima, zvinozozika mu ruvheneko. Zvamunozovereketa ngo ciweye-weye* mumba mwenyu, zvinozocumaehwa pamberi po vese.
4 Ngo kudaro, shamwari jangu, ndinomuvhunja kuti: Mucathya vanouraya muviri basi, vacikakwanisi kuitazve ciri cese.
5 Asi ndinomuvhunja wamunodika kuthya: Ithyanyi Wiya anouraya perapo wo khandira* mu Gehena.* Hina, ndinomuvhunja kuti, Ndiyena wamunodikana kuthya.
6 Ndaka* shanu ajitengeswi ngo macereni maviri o mutengo mushoma here? Apana na imwe yajo inokanganiwa ndi Mwari.
7 Asi vhuji rese ro mu musoro menyu rakaverengwa. Mucathya, imwimwi muno mutengo mukuru maningi kupinda ndaka.
8 “Ndinomuvhunja kuti: Ariwese anonditokotesa pamberi po vandhu, Mwana wo mundhu anozomuzivisavo pamberi po ngirozi ja Mwari.
9 Asi, wiya anodiramba pamberi po vandhu, anozorambhwavo pamberi po ngirozi ja Mwari.
10 Wese anobhuya masoko akashata ngo pamusoro po Mwana wo mundhu, anozoregerehwa. Asi wiya anotuka mujimu mucena, aazoregerehwi.
11 Kudari vakamuendesa koita muvhunjo pakazara vandhu,* ku majimambo no vatongi, mucadothimwa-thimwa ngo mavereketere amunozoda kuita no zvamunozoda kuvereketa kuti mujijivirire.
12 Ngokuti mujimu mucena unozomujijisa zvamunozoda kunanga pa nguva yondhoyo.”
13 Perapo mundhu umweni wainga pakati po mbungano, wakati kwaari: “Mujijisi, vhunjanyi hama yangu kuti tipungurirane utaka hwa baba wedu.”
14 Jesu wakamuvhunja kuti: “Nandi, ndiyani wakandigaja kuti ndiite mutongi kana mukovanisi pakati penyu?”
15 Perepo Jesu wakati kwavari: “Bhasopanyi. Ngwariranyi mushovo wese wo kuemura,* ngokuti pikija mundhu akava no zviro zvakawanda, zviro zvaanazvo waro, azvimupi upenyu.”
16 Ngo kudaro, Jesu wakavaitira muezaniso eciti: “Painga no mukhupuki wakakotora mbeu zinji mu maminda ake.
17 Ngo kudaro, iyena wakatanga kurangarira ngo mu mwoyo make kuti: ‘Waro ndoitenyi? Ngokuti andina pokudira mbeu jangu.’
18 Perapo wakati: ‘Ndicaita kudari: Ndinozophwanya zvitumba zvangu, ndovaka zvitumba zvakakura. Ndinozodira mondhomo mbeu jangu no mujiyo jangu,
19 perapo, ndinozojivhunja kuti: “Uno upfumi huzinji hwakavigwa, hwaungapeja nahwo makore mazinji. Zororai, ihai, imwai, udakare.”’
20 Asi Mwari wakati kwaari: ‘Uri benji, unozourawa usiku huno.* Waro ndiyani anozosara no zviro zvawaunganijari?’
21 Ndizvona zvinozoitika no mundhu anojiunganijira upfumi, asi iyena aazovi mukhupuki pamberi pa Mwari.”
22 Perapo wakavhunja vajiji vake kuti: “Ngo ndava yazvo, ndimomuvhunja kuti: Mucathimwa-thimwa ngo pamusoro po upenyu hwenyu; kuti munozohenyi kana ngo pamusoro po muviri wenyu; kuti munozosimirenyi.
23 Ngokuti upenyu hunosisira manigni kupinda zvokuha, no muviri kupinda zvokusimira.
24 Vonanyi magunguvo:* Iwona aasimi mbeu nee aakotori; aana zvitumba nee nyumbu; asi Mwari anomapekeja zvokuha. Imwimwi amusisiri maningi kupinda shiri kani?
25 Ndiyani wenyu anokwanisa kuengejera upenyu hwake ngo kuthimwa-thimwa?
26 Kudari imwimwi mecikakwanisi kuita ciro cidoko cakadari, waro ngenyi munothimwa-thimwa ngo zviro zvimweni?
27 Vonanyi makurire anoita maruva: Iwona aabati basa nee aasoni; asi ndinomuvhunja kuti pikija Soromona no nduma yaaingaya nayo, aazivi kusimira zvaiezana na rimwe rawo.
28 Imwimwi vandhu vo kutenda padoko, kudari Mwari ecisimija sora, rinomera nyamasi mangwana ro khandihwa pa muriro, iyena aazomusimijivo maningi?
29 Ngo kudaro, mucapsaka zvamunozoha no zvamunozomwa, mucadothimwa-thimwa maningi;
30 ngokuti zviro izvi ndizvona zvinopsakwa maningi ngo vomajinja o nyika, asi Baba wenyu vanoziva kuti munozvida zvese izvi.
31 Kaveta, endereranyi mberi mecipsaka Umambo hwake, zviro zvese izvi munozozviengejehwa.
32 “Mucathya, mushambi mudoko, ngokuti Baba wenyu vakada kumupa Umambo.
33 Tengesanyi zviro zvenyu muzvipe varombo.* Jiitirenyi mukhwama jicikamweki, uhu ndihona upfumi hucingaperi kumatenga, kucikagumi mbavha, zvifundho azvifundhi.
34 Ngokuti, pano upfumi hwenyu, ndipona pano mwoyo jenyu.
35 “Garanyi makasunga zvihunu,* makanasirira. Garanyi no zvibani* zvenyu zvakabwaka,
36 meciita inga vandhu vari kuvetera kuviya ka patarau wavo kuvha ku mucadho, kuti vamufunungurire ngo kukasika paanozotaka musuvo.
37 Vanodakara varanda vanokhandika ndi patarau vakarinda! Ndinomuvhunja zvokadi kuti: Iyena anozosunga cihunu* kuti aperekere, no kuvagajika pa meza kuti avashandire.
38 Kudari akaguma majiisa,* dangani sure ko mahungu,* wovakhanda vakamuvetera, vanomudakaro kamare!
39 Asi zivanyi kuti: Kudari mune wo muzi naaiziva nguva yainoguma mbavha, waizogara akangwarira, aacaizotendera kuti nyumba yake iphwanyiwe.
40 Na imwimwivo, garanyi makanasirira, ngokuti Mwana wo mundhu anoguma pa nguva yamainga mucikarangariri.”
41 Pedhru wakamuvhunjisa kudari: “Mambo, muezaniso uwu, unoshandira itusu basi, kana kuti no vamweni vese?”
42 Mambo wakamudavira kuti: “Ndiyani muvonereri wakagondeka, wakangwara, anozodihwa ndi mambo pambeji po vashandi vese, kuti aenderere mberi ecivapa zvokuha zvavanoda pa nguva kwayo?
43 Anodakara muranda wiya anokhandika ndi mambo wake eciita kudaro!
44 Ndinomuvhunja zvokadi kuti, iyena anozomugaja kuti avonerere zviro zvake zvese.
45 Asi kudari muranda akananga ngo mu mwoyo mwake kuti: ‘Mambo wangu ari kunonoka kuviya,’ wotanga kutaka varanda doni vake, vokaji no vorume, eciha, ecimwa no kudhakwa,
46 mambo wake anozoviya pa njiku yaacikaveteri no nguva yaacikazivi. Iyena anozomutambuja maningi, perapo anozomudira pamwepo no vacizivi kugondeka.
47 Muranda wakazwisisa zvinoda mambo wake, asi wotama kunasirira no kuita zvaakakumbihwa ndiyena, mambo anozomutaka maningi.
48 Asi, wiya acizivi kuzwisisa, woita zviro zvinomuitisa kuti atakwe, aazotakwi maningi. Zvokadi, mundhu wese wakapuwa mutoro muzinji, anodikana kujikwanirisa; mundhu wakapuwa mutoro wo kungwarira zviro zvizinji, vandhu vanomuvetera kuti anase kuzvingwarira ushoni.
49 “Inini ndakaviya kuzobwakija muriro panyika, ndaizodenyizve kudari no wainga wabwakijwa kare?
50 Zvokadi, ndiri kuda kubhabhatijwa, ndakacamwa maningi mbhera ndipere kubhabhatijwa.
51 Munorangarira kuti ndaviya no runyararo pasi pano here? Haiwa, asi ndinomuvhunja kuti, ndakaviya kuzoparajanisa.
52 Ngokuti, kuvhira wari, mu nyumba imwe munozova no vandhu vashanu vakakashana, vatatu vanozohwisana no vaviri, vaviri vozohwisana no vatatu.
53 Ivona vanozoparajana, baba vanozomukira mwana, mwana anozomukira baba, mai vanozomukira mwana wokaji, mwana wokaji anozomukira mai, nezvara vanozomukira nyamwana, nyamwana inozomukira nezvara.”
54 Iyena wakavhunjazve mbungano kuti: “Pamunovona gore recivha ngo kumavirira, imwimwi munonanga kuti: ‘Kuri kuviya zibepo,’ zvondhozvo zvinoitika.
55 Pamunovona mbhepo yo kakusi yecivhunguza, imwimwi munonanga kuti: ‘Kunozopisa maningi,’ zvondhozvo zvinoitika.
56 Imwi vacengejeri, munokwanisa kupopora magariro o kunja no o makore, waro ngenyi amukwanisi kuziva zviri kuitikari mukuvo uno?
57 Ngenyi amukwanisi kuziva mwega zvakarurama?
58 Inga muezaniso, paunonga wecifamba mugwanja no mundhu anoda kokukeshari, tonganai naye pamunonga mecienda ku banje kuti atame kukudira munyara jo mutongi, mutongi wokuendesa ku mungwariri, mungwariri akudire mukadheya.
59 Ndinokuvhunja kuti auzobudimo, ucito wapera kupagari gava rese.”
Masoko o Pasi
^ Kana: “makwete-kwete; cipasi-pasi.”
^ Gama ngo Gama: “perapo anosimba ro kukhandira.”
^ Vonanyi Kudurujihwa ko Magama.
^ Zvishiri zvidoko.
^ Kana: “pamberi po Masinagoga.”
^ Kana: “kudisisa zviro zvakawanda.”
^ Gama ngo Gama: “vanozopsaka kukuvhisira upenyu hwako usiku huno.”
^ Kana: “magunguhwe.”
^ Kana : “itanyi mupiro jo usizi.”
^ Gama ngo Gama: “bhande.”
^ Zvigabhu-gabhu.
^ Gama ngo Gama: “ngo bhande.”
^ Gama ngo Gama: “nguva yocipiri yokurindira.” Pajaikhwedera nguva 9 jo usiku.
^ Gama ngo Gama: “nguva yocitatu yokurindira.” Kuvha pakati po usiku mbhera pajaikhwedera nguva 3 jo mangwanani.
