Ruka 21:1-38
21 Paakamusa musoro,* wakavona vakhupuki vecidira zvipo zvavo mu mabhokiso.
2 Wakavonazve noni yainga murombo yecidira zvimangwenjere zviviri zvo mutengo* mushoma,
3 perapo wakananga kuti: “Ndinomuvhunja zvokadi kuti, noni iyi itori murombo, yadira mare yakawanda kupinda vese.
4 Ngokuti vese vadira mare yainga yasara kushandiswa pa upfumi hwavo, asi noni iyi yadira zvese zvayainga nazvo.”
5 Tevere, vamweni pavaibhuya ngo pamusoro po themberi no kusejeswa kwayakaithwa, ngo mapuwe akaseja no zviro zvakapihwa kuna Mwari,
6 Jesu wakati: “Ngo pamusoro po zviro izvi zvamuri kuvonari, jinozoguma njiku jokuti apana buwe rinozosara panyezuru po rimweni ricizivi kuwiswa.”
7 Perapo, ivona vakamuvhunjisa kudari: “Mujijisi, tivhunjenyi, zviro izvi zvinozoitika rini kamare? Ngocapi cinozova citatijo cokuti zviro zvese izvi zvoda kuitika?”
8 Iyena wakati: “Bhasopanyi kuti mutame kucengejwa, ngokuti vandhu vazinji vanozoviya ngo zina rangu veciti: ‘Inini ndini Kristu.’ Vanozonangazve kuti: ‘Magumo aaphedo.’ Mucadovatevera.
9 Cimwenizve, pamunozozwa ngo pamusoro po hondo no joweyowe, mucatetemera. Ngokuti zviro izvi zvinodikana kutanga kuitika, asi, magumo aazoitiki panguva yondhoyo kamare.”
10 Perapo wakavavhunja kuti: “Majinja no majinja anozomukirana, umambo no umambo hunozomukirana.
11 Kunozova no kuzungunyika kukuru ko nyika, kunozovazve no njara no ndhendha mu ndau jakasiyana-siyana; vandhu vanozovona zviro zvinothyisa no zvitatijo zvikuru zvinovha kudenga.
12 “Zviro zvese izvi zvicito zvaitika, vandhu vanozomusunga no kumuteverera vecimuendesa mu masinagoga no mukadheya. Imwimwi munozodihwa pamberi po majimambo no magovhernadhori ngo ndava yo zina rangu.
13 Izvi zvinozomupa mukana wo kuita ucapupu ku vamweni.
14 Ngo kudaro, mucakanganwa kuti: Amudikani kujijira nguva iciripo madavirire amunodikana kuita,
15 ngokuti inini ndinozomupa masoko no uzivi hwokuti vavengi venyu vese vakabatana pamwepo, avazokwanisi kuhucijikira kana kuhuphikiza.
16 Kusiyapo izvo, munozoendeswa ku utongi ngo vabari, hama, ukama no shamwari. Ivona vanozouraisa vamweni venyu.
17 Imwimwi munozonyenywa ngo vandhu vese ngo ndava yo zina rangu.
18 Asi apana no vhuji rimwe haro riri mu musoro mwenyu rinozoruzika.
19 Munozoponesa upenyu hwenyu ngo kucungirira kwamunoita.
20 “Pamunozovona Jerusarema rakatendenejwa ngo zvikwata zvo masoca, zivanyi kuti kuparajwa kwaro kwaaphedo.
21 Vari mu Judheya, ngavatizire ku matundhu, vari pakati paro ngavabude, vari kumaminda vacadonghwina mukati maro,
22 ngokuti jinozova njiku jo kuita ururami* kuti zviro zvese zvakatahwa zvikwanirisike.
23 I nyatwa ku vanakaji vano mimba no vanomwisa mu njiku jondhojo! Ngokuti kunozova no dambujiko guru mu nyika iyi no ushungu hunozogumira vandhu ava.
24 Ivona vanozowa ngo kutemwa ngo banga, vanozotohwa veciendeswa ku majinja ese kuti vaithwe varanda. Jerusarema rinozocikwa-cikwa ngo majinja* mbhera mukuvo wakagajwa wo majinja* ukwane.
25 “Kunozovazve no citatijo pa zuva, mweji no ndhondho. Pasi pano, vandhu vanozohwajihwa, votama no zano ro kuita ngo pamusoro po kutindhira ko jombe no mavimbi aro.
26 Vandhu vanozopera simba ngo kuthya, pavanovetera zviro zvinozoviya pasi pano, masimba okumatenga anozozungunyiswa.
27 Ivona vanozovona Mwana wo mundhu eciviya mu makore no simba pamwepo no nduma.
28 Zviro izvi pazvinotanga kuitika, imanyi mumuse musoro yenyu, ngokuti ruponeso hwenyu huri kukhwedera.”
29 Ngo kudaro, iyena wakavaitira muezaniso eciti: “Vonanyi mukuyu uwu no muti jimweni jese.
30 Mukajivona jecipfikitira, zivanyi kuti cirimo ciri phedo.
31 Na imwimwivo, mukavona zviro izvi zveciitika, zivanyi kuti Umambo hwa Mwari hwaaphedo.
32 Zvokadi ndinomuvhunja kuti: Mubarihwana uwu auzoperi zviro zvese zvicito zvaitika.
33 Denga no nyika zvinopera, asi masoko angu aazoperi.
34 “Bhasopanyi kuti mwoyo yenyu itame kuremehwa ngo kuhisa, kumwisa no kuthimwa-thimwa ngo upenyu, njiku iyi yozomugumira ngo civhumbu
35 inga murawu. Ngokuti inozogumira vandhu vese vanogara pasi pano.
36 Waro garanyi makamuka mecideketera mu mukumbiro mukuvo wese, kuti mupone pa zviro zvese zvinodari kuitika, mukwanise kuima pamberi po Mwana wo mundhu.”
37 Comasikati iyena waijijisa mu themberi asi cousiku waibuda woenda kogara ku dundhu rinodanijwa kuti Dundhu ro Maorivhe.
38 Vandhu vese vaiviya kwaari comangwanani kuti vamuzwe mu themberi.
Masoko o Pasi
^ Gama ngo Gama: “meso.”
^ Gama ngo Gama: “mareputoni maviri, anoezana no kwadhrani imwe.”
^ Kana: “njiku jo kuvonesa ushungu hwake.”
^ Kana: “vonyikanja.” Vaciripi Vajudha.
^ Kana: “vonyikanja.” Vaciripi Vajudha.
