Pakupera ko nguva yakati kuti Mambo Nebhukadhinezari wakaita mufananijo wo cithombi co ndarama. Perepo, wakadanija vandhu vese vanosisira vo Bhabhironi kuti vaende kovona cithombi cainga waiitisa, kubatanija Shadreki, Misheki na Abhedhenego. Mambo wakapa mupango okuti: ‘Mukazwa kurira ko mbayapaya, mutoriro, mbira, no mufumbo wese wo zviro zvinorijwa, munodikana kugwadama kuti muromberere cithombi! Wiya anozoramba kugwadama no kunamata cithombi, anozokhandihwa ngo kukasika mu gomba ro muriro.’ Kureva kuti vaHeberi vatatu vaizongwadamira cithombi kana kuti vaizonamata Jehova?

Mambo wakapa mupango kuti marimba arijwe. Vese vakagwadama zve vakanamata cithombi, kunja kwa Shadreki, Misheki na Abhedhenego. Vanarume vamweni vakazvivona zve vakaenda kobvunja mambo kuti: ‘Vaheberi ava vatatu varikuramba kugwadamira cithombi cenyu.’ Mambo Nebhukadhinezari wakavadanijisa zve wakavabvunja kuti: ‘Ndinomupa mukana umweni kuti mugwadamire cithombi cangu. Asi kudari mukatama kugwadama ndinozomukhandira mu gomba ro muriro. Akuna mwari angakwanisa kumuponesa kwandiri.’ Ivona vakapingura kuti: ‘Itusu atidi mukana umweni. Mwari wedu angatiponesa. Asi kudari iyena akatama kutiponesa, atizonamati cithombi cenyu, mambo.’

Mambo Nebhukadhinezari wakacamwa maningi. Iyena wakabvunja vandhu vake kuti: ‘Itanyi kuti gomba ro muriro ripise kanomwe kupinda cirovejeso!’ Perepo wakabvunja  masoca ake kuti: ‘Sunganyi vanarume ava zve vakhandirenyi mu gomba ro muriro!’ Gomba riya raipisa maningi zvokuti masoca paakaguma phedo naro akamukira kufa. Vaheberi vatatu vakawira mu muriro. Asi Mambo Nebhukadhinezari paakaringisa mukati, wakavona kuti kwainga no vanarume varongomuna vecifamba mukati mu gomba ro muriro kunja ko vatatu. Iyena wakatanga kutetemera wobvunjisa masoca kuti: ‘Atizivi kukhandira vandhu vatatu mu muriro? Ndiri kuvona varongomuna zve umwe wavo wakadari inga ngirozi!’

Mambo Nebhukadhinezari wakakhwedera pa gomba ro muriro zve wovadaninja kuti: ‘Budanyi kunja, imwimwi vashandiri va Mwari wokadi-kadi!’ Vandhu vese vaikahamara ngo kuvona Shadreki, Misheki na Abhedhenego vecibuda mu gomba ro muriro. Muviri wavo, bvuji ravo no nguvo javo jainga jicizivi kupsa, pikija no kutozika munuhi wo usi.

Mambo Nebhukadhinezari wakati: ‘Mwari wa Shadreki, Misheki na Abhedhenego i mukuru. Iyena wakatumira ngirozi yake zve yavaponesa. Akuna mwari wakadari inga wavo.’

Inga vaHeberi vatatu, iwewe wakasunga kuva wakagondeka kuna Jehovha azvinenyi zvinozobudirira here?