CIJIJO 07

Ngo Zvapi Zvamunorangarira ngo Pamusoro pa Jehovha?

RIJANYI

Pamunorangarira ngo pamusoro pa Jehovha Mwari, ngozvapi zvinoviya mu murangariro wenyu? Kureva kuti iyena ari ndhambo maningi na imwimwi, kudari inga ndhondho jiri ndhambo na itusu? Kana munorangarira kuti iyena ano simba maningi asi aana mazwiro, kudari inga zvinoita mbheni? Jehovha wakadini kamare? Ecishandisa Soko rake Bhaibheri, Jehovha anovonesa jimwe jo mugariro jake, pamwepo no kuvonesa kuti anomutaja.

1. Ngenyi atikwanisi kuvona Mwari?

“Mwari, Mujimu.” (Johani 4:24) Jehovha aana muviri wakadari inga wedu. Iyena ano muviri wo Mujimu, anogara kudenga, ku ndau yokuti atikwanisi kuivona.

2. Ngojapi mugariro jimweni jina Jehovha?

Ngo zvokadi kuti atikwanisi kuvona Jehovha. Asi patinomuziva, tinomudisisa maningi ngokuti i Mundhu wokadi ano mugariro jinoshamaisa maningi. Bhaibheri rinoti: Jehovha “anodisisa bzakarurama, aarasi vatendi vake.” (Nduyo 37:28) Iyenazve “wakazara ngo pena no usizi,” maningi-ningi kuno vandhu vari kutambujika. (Jakobo 5:11) “Tenji Mwari ari phedo no mwoyo yakakhuvazwa; anoponesa vese vakapera simba.” (Nduyo 34:19) Munozviziva kuti Jehovha anodakara kana kunyangajwa ngo manera atinoita zviro? Vandhu vanosana kuita zviro zvakashata vanomucamwisa no kumunyangajisa. (Nduyo 78:40, 41) Asi mundhu anoita zvaushoni anomudakajisa.—Verenganyi Mazwi Akangwara 27:11.

3. Jehovha anokhombijisa kudini kuti anotida?

Mugariro mukuru wa Jehovha i rudo. Zvokadi, “Mwari i rudo.” (1 Johani 4:8) Tingavona rudo hwa Jehovha ngo kuverenga Bhaibheri, no kuvona zviro zvakasikwa. (Verenganyi Mabasa o Vapostori 14:17.) Inga muezaniso, vonanyi kuti takaitiswa kudini. Iyena wakatiita ngo njira yokuti tinokwanisa kuvona kori jakaseja, kuzwa mumbo jinodakajisa no kuravira zvokuha zvinonaka. Iyena anoda kuti tidakare mu upenyu.

NASANYI KUPSAKISISA

Jijiranyi kuti Jehovha anoshandisenyi kuti akwanise kuita zviro zvinoshamaisa. Perapo vonanyi kuti kuitisa kudini kuti Jehovha anovonesa mugariro jake jakanaka.

4. Mujimu mucena i simba rinoita basa ra Mwari

Patinoita basa ririrese, tinoshandisa nyara jedu. Waro Jehovha anoshandisenyi? Iyena anoshandisa mujimu mucena wake. Bhaibheri rinovonesa kuti mujimu mecena asipi mundhu, asi i simba ra Mwari raanoshandisa kuti aite zviro zvaanoda. Verenganyi Ruka 11:13 na Mabasa o Vapostori 2:17, perapo bhuisananyi ngo muvhunjo iji:

Mwari ‘anodurura’ mujimu mucena wake kuna vaya vanoukumbira. Asi munorangarira kuti mujimu mucena i mundhu, kana kuti i simba rinoita basa ra Mwari? Ngenyi munonanga zvondhozvo?

Jehovha anoshandisa mujimu mucena kuti akwanirise zviro zvinoshamaisa. Verenganyi Nduyo 33:6 na 2 Pedhru 1:20, 21, perapo bhuisananyi ngo muvhunjo uwu:

Jehovha wakashandisa mujimu mucena kuti aitenyi?

5. Jehovha ano mugariro jinodakajisa

Mosi wainga mundhu waigondeka kuna Mwari. Asi pikija zvakadaro, iyena waida kunasa kuziva Musiki wake. Ngo kudaro Mosi wakati: “Nditatijenyi gwanja, ndimuzive.” (Exodo 33:13) Jehovha wakadavira Mosi ngo kumuvonesa mugariro jimweni jo undhu Hwake. Verenganyi Exodo 34:4-6, perapo bhuisananyi ngo muvhunjo iji:

Mugariro japi jakatatija Jehovha kuna Mosi?
Ngojapi mugariro jina Jehovha jamunodakarira maningi?

6. Jehovha anotaja vandhu

Vahebheru vainga vandhu va Mwari vo munguva yo kare, ivona vainga varanda ku Ejipita. Jehovha wakazwa kudini paakavona vandhu vake vecitambujika? Rijanyi AUDHIYO perapo tevereranyi, kana verenganyi Exodo 3:1-10. Perapo bhuisananyi ngo muvhunjo jinotevera.

AUDHIYO: Jehovha Wakaneseka Ngo Kutambujika Kwavo (2:45)

Inga zvamavona paciitiko ici, Jehovha anozwa kudini paanovona vandhu vecitambujika?—Vonanyi vhesi 7 no 8.
Munorangarira kuti Jehovha anodadi kubesera vandhu? Munovona kuti iyena anokwanisadi kuzviita here? Ngenyi muri kunanga zvondhozvo?

7. Zviro zvakasikwa zvinotijijisa ngo mugariro ja Jehovha

Jehovha anovonesa mugariro jake kuvha ku zviro zvaakasika. Rijanyi VHIDHIYO. Perapo verenganyi Varoma 1:20, no kubhuisana ngo muvhunjo unotevera.