CIJIJO 11

Mungaitenyi Kuti Mubesereke Pamunonga Meciverenga Bhaibheri?

RIJANYI

Makambocamwa ngo kuda kutangisa kuita mabasa akawanda maningi? Kuti ave akareruka kangaije makadikana kumapaura-paura. Imwimwi mungaitavo zvondhozvo pamunonga meciverenga Bhaibheri. Mungatojivhunjisa kudari: ‘Waro ndotangira ngo kwapi?’ Pa cijijo cino, tinozovona zviro zvinganani zvamungaita kuti kuverenga kwenyu no kujija Bhaibheri kuve kunodakajisa.

1. Ngenyi zvinosisira kuverenga Bhaibheri njiku jese?

Mundhu anoverenga Bhaibheri njiku jese kana ‘mutemo wa Mwari,’ anova wakadakara, upenyu hwake hunova hunodakajisa. (Verenganyi Nduyo 1:1-3.) Kuti mutange, ejanyi kuverenga Bhaibheri njiku jese pa museswa munganani. Pamunoengejera kuziva Soko ra Mwari, munozogumavo pakudakarira maningi kuverenga Bhaibheri.

2. Mungaitenyi Kuti Mubesereke Pamunonga Meciverenga Bhaibheri?

Kuti tibesereke pa kuverenga kwedu Bhaibheri, tinodikana kurangarijisisa zvatinongaro teciverenga. Izvi zvinoreva kuti tinodikana kumboima perapo torangarira zvatinongaya tapera kuverenga. (Joxwa 1:8) Pamunonga meciverenga, jivhunjisenyi kudari: ‘Izvi zvinondijijisenyi ngo pamusoro pa Jehovha? Ndingazvishandisa kudini mu upenyu hwangu? Ndingashandisa kudini zvandiri kuverengari kuti ndibeserevo vamweni?’

3. Mungaitisa kudini kuti muwane nguva yo kuverenga Bhaibheri?

Munorangarira kuti zvinonesa maningi kuwana nguva yo kuverenga Bhaibheri? Vandhu vazinji vanorangarira kudaro. Ejanyi ‘kushandisa nguva yenyu’ ngo njira yakanaka. (Vaefeso 5:16) Imwimwi mungakwanisa kuita izvi ngo kusana nguva pa njiku yamunoda kuverenga Bhaibheri. Vandhu vamweni vanodakarira kuverenga Bhaibheri comangwanani. Vamwenivo vanodakarira kuverenga comasikati, kangaije pa nguva yo kusvusvura. Vamweni vanodakarira kuverenga cousiku, pamukuvo mushoma vacito vaenda kovata. Kuzoti imwimwivo keni, ngo yapi nguva yakanaka kwamuri?

NASANYI KUPSAKISISA

Vonanyi manera amungaita kuti kuverenga kwenyu Bhaibheri kuve kunodakajisa. Vonanyizve manera a munganasirira kuti mubesereke ngo jijo yo Bhaibheri.

Inga manera amungajijira kudakarira zvokuha zvamucito mukaha, mukufananavo, mungadakariravo kuverenga Bhaibheri ramucito mukaverengazve

4. Jijiranyi kudakarira kuverenga Bhaibheri

Ngo zvokadi kuti azvizivi kureruka kutanga kuverenga Bhaibheri. Imwimwi mungajijira kuva no cido cokuzviita, kana kuti mungajijira kudakarira kuverenga Bhaibheri. Ndizvona zvinoitika pamunotanga kujijira kudakarira zvokuha zvamucizivi kumboha cingozvo. Verenganyi 1 Pedhru 2:2, perapo bhuisananyi ngo muvhunjo uwu:

Munorangarira kuti kuverenga Bhaibheri njiku jese kungamubesera kuti muridakarire?

Rijanyi VHIDHIYO, perapo vonanyi zvakaithwa ngo vandhu vamweni kuti vatange kudakarira kuverenga Bhaibheri. Tevere bhuisananyi ngo muvhunjo jinotevera.

VHIDHIYO: Vocidoko Jijiranyi Kuda Soko ra Mwari (5:33)

Mukuzwirana no vhidhiyo, ngo zvapi zvaiphingaija vocidoko ava pavaida kuverenga Bhaibheri?
Ngo zvapi zvakavabesera kuti vatame kusiya kuverenga Bhaibheri njiku jese?
Zvicinyi zvavakaita kuti kuverenga kwavo Bhaibheri kuve kunodakajisa?

Manera angamubesera kuti mutangise:

Sananyi Bhaibheri rino sandujo icikanesi kuverenga. Rimwe rawo i Sandujo yo Nyika Imbza inowanika mu ndumi jakawanda.
Tanganyi kuverenga mativi amunodakarira maningi. Vonanyi kwadhru inoti, “Tanganyi Kuverenga Bhaibheri.”
Tariranyi zvamunodakarira pamunonga meciverenga. Shandisanyi kwadhru inoti, “Mucaceukija Pamakaimira Kuverenga Bhaibheri?” inowanika mubhuku iri.
Shandisanyi Aprikativho JW Library^®. Mondhomo mungakwanisa kuverenga no kuzwa audhiyo jo Bhaibheri ngo foni kana komputadhori.
Shandisanyi apêndices jo Shanduro yeNyika Itsva. Imona munonga muno mapa, matabhera no ma glossário, izvi zvinoita kuti kuverenga kwenyu Bhaibheri kuve kunodakajisa.

5. Nasiriranyi kuitira jijo yenyu yo Bhaibheri

Verenganyi Nduyo 119:34, perapo bhuisananyi ngo muvhunjo uwu:

Ngenyi zvakanaka kutanga taita mukumbiro ticito taverenga Bhaibheri kana kunasirira kuitira jijo yo Bhaibheri?

Mungaitenyi kuti mubesereke pa cijijo cimwe nga cimwe? Pamukuvo wamunonga mecinasirira kuitira jijo yenyu, ejanyi kuita izvi:

Pakutanga verenganyi ndima jo cijijo condhoco.
Verenganyi matsamba o Bhaibheri perapo moeja kuzwisisa kuti zvinozwirana papi no shwiro yamuri kujijaro.
Makanyi magama anodavira muvhunjo umwe nga umwe. Izvi zvinozomubesera pamunonga mecibhuisana cijijo condhoco no mujijisi wenyu.

Imwimwi maizviziva?

Zvapupu zva Jehovha zvakashandisa sandujo jakasiyana-siyana jo Bhaibheri. Asi, itusu tinodakarira maningi kushandisa Sandujo yo Nyika Imbza yo Matahwa Akacena ngokuti irona ngo rokadi, arinesi kuzwisisa nokutizve rinoshandisa zina ra Mwari.—Vonanyi musoro uri mu saite “Será que as Testemunhas de Jeová têm uma Bíblia diferente?”

VANDHU VAMWENI VANOTI: “Kujija Bhaibheri kunonesa maningi. Kusiyapo izvo, njiku yese ndinonga ndakabatikana.”

Imwimwi munovonavo kudini?

ZVOTAJIJA

Kuti mubesereke ngo zvinonanga Soko ra Mwari, wananyi nguva yo kuverenga Bhaibheri, itanyi mukumbiro kuti muzwisise zvamuri kuverengaro no kunasirira ushoni cijijo cimwe nga cimwe.