Itusu atina bhishopi anopocereswa mu ungano yedu. Mu kusiyana, inga zvaiitwa apo ungano yo maKristu po yakatanga, vakuru vanokwanirisa vanogajwa kuti ’vahavise vo gungano ra Mwari’. (Maitiro o Vapostori 20:28) Vakuru ava vanarume vakaibva mu mujimu vanotungamirira zve no kuhavisa ungano ‘ngo mwoyo wese, vacikavangirijwi, vacikapsaki upfumi, kaveta ngo rupfaro hwese.’ (1 Pedru 5:1-3) I basa renyi ro vanoita kuti vatibesere?

Ivona vanotikorondha zve vanotivonerera. Vakuru vanotungamirira zve vanobesera ku jivirira mujimu wo ungano. Mukuziva kuti Mwari wakavathemba pa basa rinodikana, vakuru avacikiriri vandhu vavo, asi vanobesera kuti tigare zvakanaka zve tive no mudakaro. (2 VaKorinto 1:24) Inga vahavisi vanongwarira ngo simba umwe nga umwe wo mushambi, vakuru vanopsaka kuziva ku ndhengo imwe nga imwe yo ungano.—Mazwi Akangwara 27:23.

Vanotijijisa maitire o tingaita zvinoda Mwari. Mabviki ese, vakuru vanotungamirira musongano jo ungano mu kuitira kuvangisa rutendo hwedu. (Maitiro o Vapostori 15:32) Vanarume ava vanojipira vanotungamirirazve basa ro kucumaera, vecishanda na itusu zve no kutiroveja mu mativi ese o basa ro kucumaera.

Vanovangisa umwe na umwe. Kuitira kuti vangwarire zvinodiwa zvo umujimu zvo umwe na umwe wedu, vakuru vo pa ungano vangatibvakacira mu mamuzi mwedu kana kunyumba jo umambo kuti vape besero zve no kutondhojwa kunobva mu Matahwa.—Jakobo 5:14, 15.

Mukuengejera ku basa ravo mu Ungano, vakuru vazinji vano mabasazve o kunyama zve mutoro wo mbhuri, izvi zvinoda nguva yavo kuti vazvivonerere. Hama iji jinoshandari ngo simba tinofanera kujireremeja.—1 VaTesalònika 5:12, 13.

• Ngo rapi basa ro vakuru vo ungano?

• Mu njira japi vakuru vanokhombijira kutidakarira?