DIVI 9
Namatanyi Jehovha inga Mbhuri
“Rombereranyi [kana kuti namatanyi] wiya wakaita nyezuru no pasi.”—Apokalipsi 14:7
Inga zvamakajija mu bhurushura iri, Bhaibheri rino zviambi zvizinji zvinozobesera imwimwi no mbhuri yenyu. Jehovha anoda kuti muve anodakara. Iyena anogondesa kuti kudari mukadira kumunamata pakutanga, “bzimweni munozopuwa ngo kuengejehwa.” (Mateu 6:33) Iyena anoda kamare kuti muve shamwari yake. Nasanyi kushandisa mukana uri wese kuti musakurire ushamwari hwenyu na Mwari. Aya makomborero makuru maningi kupinda ese aangava nawo mundhu.—Mateu 22:37, 38.
1 VANGISANYI USHAMWARI HWENYU NA JEHOVHA
BHAIBHERI RINOTI KUDINI: “‘Ndozoita baba wenyu. Imwimwi munozoita vana vangu vorume no vokaji,’ anonanga [Jehovha]” (2 VaKorinto 6:18) Mwari anoda kuti muve shamwari yake. Mukumbiro i njira imwe yo kuita kudaro. Jehovha anomukoka kuti ‘munamate [kana kuti kukumbira] mucikazorori.” (1 VaTesalònika 5:17) Iyena anodisisa maningi kuzwa murangario jenyu no zvinomutambuja mu mwoyo. (VaFilipi 4:6) Pamunoita mukumbiro no mbhuri yenyu, ivona vanozovona kuti Mwari i mundhu kamare kwamuri.
Mukuengejera pa kubhuya na Mwari, munodikana kumupurutana. Mungaita izvi ngo kujija Soko rake zve mabhuku akacijikira mu Bhaibheri. (Nduyo 1:1, 2) Rangarijisisanyi ngo zvamajija. (Nduyo 77:11, 12) Kupurukira Mwari zvinodazve kuti muende ku musongano jo ciKristu nguva jese.—Nduyo 122:1-4.
Kubhuya no vamweni ngo pamusoro pa Jehovha i njira imweni inosisira maningi kuitira kuvangisa ushamwari hwenyu nae. Pamunoita izvi kazinji, ngo pamunozwavo maningi kukhwedera kwaari.—Mateu 28:19, 20.
ZVAMUNGAITA:
-
Njiku jese psakanyi mukuvo kuitira kuverenga Bhaibheri no kuita mukumbiro
-
Inga mbhuri, diranyi mabasa o kumujimu pa mbuto yokutanga kuciripi mabungaijo zve kumbozorora
2 DAKAJIHWANYI NGO KUNAMATA KO MBHURI
BHAIBHERI RINOTI KUDINI: “Khwederanyi kuna Mwari iyena anozomukhwedereravo.” (Jakobo 4:8) Munodikana kuita urongwa hwo kunamata ko mbhuri zve mohuteverera nguva jese. (Genesi 18:19) Asi kuno zvizinji zvinodiwa. Mwari anodikana kuva divi ro upenyu hwenyu hwo njiku ngo njiku. Vangisanyi ushamwari hwo mbhuri yenyu na Mwari ngo kuvereketa ngo pamusoro pake ‘mecigara pa muzi penyu, no mecifamba mu gwanja renyu, mecivata no meciima.’ (Deuteronòmio 6:6, 7) Ngacive cidisiso cenyu kuita inga ndi Joshuwa, wakananga kuti: “Inini no mbhuri yangu, tinozoxandira [Jehovha].—Joxwa 24:15.
ZVAMUNGAITA:
-
Ivanyi no urongwa hwo rovejo yo nguva yese kunozwirana no zvinodiwa zvo umwe na umwe wo mbhuri yenyu
