Zvineso zvo Mare
Vandhu vazinji vano zvineso zvishoma zvo mare ngo kushandisa ndhungamiriro jo Bhaibheri.
IVANYI NO URONGWA WAUSHONI
CIAMBI CO MU BHAIBHERI: “Murangariro yo mundhu ano hwiru, inozisa upfumi; kuna wiya anokasikira, urombo basi!”—Mazwi Akangwara 21:5.
ZVINODA KUREVENYI: Zvinosisira kuita urongwa mucito matenga ciri cese. Perapo, vangisiranyi kuti muteverere urongwa hwenyu. Ceukijanyi kuti amukwanisi kuva no zvese zvamunoda. Ngokudaro, shandisanyi mare yenyu ngo ungwaru.
NGOZVAPI ZVAMUNGAITA:
-
Tariranyi zvamunoda kuita. Itanyi mu nda-nda-nda wo zviro zvese zvamunoda kutenga zve nasanyi kuzvironga. Perapo, zivanyi mare yamunoda kupeja pa urongwa umwe nga umwe. Kudari mukashandisa mare yakawanda pa urongwa umwe, toranyi mare yo pa urongwa umweni kuitira kufakeya yamashandisa. Inga muezaniso, kudari makashandisa mare yakawanda kupinda yainga pa urongwa hwenyu kuti mutenge mafuta o karu, mungatora mare yo pa urongwa umweni ucikasisiri maningi—inga muezaniso, mare ya maizoshandisa kuti muende koha kunja.
-
Mucaita magava. Kudari zvecikwanisika, mucaita magava. Kunja kokuita magava, viganyi mare yenyu kuti mutenge zvamunoda. Kudari mecishandisa khadhi kuti mutenge zviro, zvinosisira maningi kupagari magava ese kuti mutame kupagari kaviri. Kudari muno magava, mungaita urongwa umweni kuti mupagari magava enyu.
Imwe jijo yakatatija kuti, vandhu vazinji vanopeja mare yavo ngo kushandisa khadhi. Ngokudaro, kudari muno khadhi, rishandisenyi ngo ungwaru.
BHASOPANYI MUGARIRO JINOKHUVAZA
CIAMBI CO MU BHAIBHERI: “Pa cirimo nyanungu aabati basa; pa kukotora, anopsaka, asi aawani ciro.”—Mazwi Akangwara 20:4.
ZVINODA KUREVENYI: Nungu inoita kuti mundhu ave murombo. Ngokudaro, ivanyi mushandi waushoni zve viganyi mare kuitira ngozi jo civhumbu.
NGOZVAPI ZVAMUNGAITA:
-
Ivanyi mushandi waushoni. Mukava mushandi waushoni, patarau wenyu vanozomudakarira zve avazomuvhisi pa basa.
-
Ivanyi makagondeka. Mucabira patarau wenyu. Kuva mundhu acizivi kugondeka zvingasvipisa mugariro wenyu zve zvinozomunesera kuti muwane basa.
-
Mucadisa mare. Kudari mecirangarira basi kuwana mare yakawanda, ngo kufamba ko nguva munozokhuvaza uhomi hwenyu no ushamwari wamunawo no vamweni. Ceujanyi, mare asipi zvese.
ZVIAMBI ZVIMWENI
Verenganyi Bhaibheri Online rinowanika mu ndumi jakawanda mu jw.org
MUCAPEJA NGUVA NO MARE NGO ZVIRO ZVICIKASISIRI.
“Ngokuti wiya anomwisisa no kuhisisa anozoita murombo; kuvata kunosimija mundhu ngo mapendera.”—MAZWI AKANGWARA 23:21.
MUCANESEKA MANINGI NGO MARE.
“Mucathimwa-thimwa ngo maponero enyu kuti munozoha cinyi munozomwa cinyi; ngo muviri wenyu: kuti munozosimira cinyi.”—MATEU 6:25.
MUCAITA THIMA.
“Mundhu anobzukisa majiso kuti apsakisise upfumi, aarangariri kuti urombo hunozomugumira.”—MAZWI AKANGWARA 28:22.
