Makambojizwa mucicakakwanisi kuembezera mudoni wenyu waisuruvara ngo kutamikihwa ngo mundhu anodiwa here? Nguva jimweni tingakonehwa co kuita kana kunanga—totonyarara kana kugara hedu. Asi pano zvinoshanda no zvinobesera zvatingaita.

Kazinji, zvinodiwa kuvepo kwenyu basi no magama mashoma, inga kuti “ndino urombo.” Mu maponero mazinji, kukumbatira mundhu wafihwaro kana kutatija kuva mundhu wakathiva ndi njira inobudirira pa kutatija kutaja kwenyu. Kudari wafihwaro anoda kubhuya, muzwisisenyi kamare. Kupinda zvese, itanyi ciri cese ku mbhuri yafihwaro, kangaije cibasa cokuti wafihwaro aakwanisi kuciita, inga kubika, kupenda mwana kana kubesera pa nasiriro jo kuviga mundhu wafaro kudari zvecidiwa. Zviito izvi zvinovereketa maningi kupinda magama o uzivi.

No kufamba ko nguva, kangaije mungandundihwa kubhuya ngo pamusoro po mundhu wafaro, kangaije ngo mugariro jake jakanaka kana zvakaitika zvinodakajisa. Nguva jimweni mabhuyo akadari angaviisa mudakaro mu meso mo vandhu vari pa ciriro. Inga muezaniso, Pam—wakaruza mwamuna wake, Ian, mu makore matandhantu apera—wakati: “Pa nguva yakati kuti vandhu vakandibvunja zviro zvakaithwa ndi lan zvo kuti andicaizviziva, zve izvi zvakaita kuti mwoyo wangu uzwe ushoni.”

Ripoti jokupsakisisa jinonanga kuti vandhu vazinji vakasuruvara vanoashira besero rokutanga asi vanokasika kukanganiwa apo shamwari jinobatikana pa zviro zvajo. Ngo kudaro, vangisiranyi kudavijana no shamwari ya fihwa nguva jese. * Vandhu vazinji vakasuruvara vanobongesera maningi mukana uu kuitira kuvarerusira kuremehwa kwavo.

Vonanyi muezaniso wa Kaori, umwe musikane wocidoko wo ku Japão wainga wakaparajika murangariro ngo kuruza mai wake tevere ngo kuruza hambzaji yake yainga yakakura kupinda iyena wo 15 o makore pa mweji jakatevera. Zvinodakajisa kamare, iyena wakaashira besero ricikanangiki kubva ku shamwari jakagondeka. Imwe yakona yaidanijwa Ritsuko yaamukuru kamare kupinda Kaori zve yakazvipira kuti ive shamwari yo phedo—kudari inga ndi mai wake. Kaori wakati: “Kunasa kunanga kamare, inini andizivi kudakara ndizvona. Andicaidepi kuti mundhu ariwese atore ndau ya mai wangu zve andicaidepi kuti mundhu andirangarije zvovaikwanisa kuita. Ngo kudaro, ngo ndava yo kuti Mama Ritsuko vainditaja ushoni, ndakava no mazwiro o phedo naivona. Mabviki ese, ndaivetera kuti tibude tese mu basa ro kucumaera no kwenda tese ku musongano jo ciKristu. Vaindikoka kuti ndiende komwa ica, vaindiviisira zvokuha, vainditarira karata zve kazinji vainditumira makadhi. Mugariro wakanaka wa Mama Ritsuko wakandipsasa ushoni.”

No pakhirira makore gumi no maviri make Kaori novafa, nyamasi iyena no mwamuna wake i vacumaeri vo nguva yakazara. Kaori wakati: “Mama Ritsuko, vakaramba vacitatija kuneseka kwavo. Pondakahwirira kumuzi, mazuva ese ndaienda kovavhakacira no kubusa ushamwari hwavo hunovaka.”

Muezaniso umweni wo mundhu wakabesereka kubva ku besero iri ndi Poli, umwe wo Zvapupu zva Jehovha wo ku Chipre. Poli no wainga mwamuna wakanaka mwoyo, waidanijwajwa Sozos, uwo wakagaja muezaniso wakanaka inga muKristu pa kuhavisa ngo kukoka kazinji ndherera no noni ku nyumba kwake kuitira kushamwarijana no kuha navo. (Jakobo 1:27) Zvinozwisa urombo ngo zvo kuti pa makore 53 Sozos wakafa ngo kuti wainga no tumor mu uruzvi. Poli wakati: “Ndakaruza mwamuna wangu vakagondeka vaya vondakapeja navo 33 o makore o mucadho.”

Pakupera ko njaumba, Poli wakaenda Kanadhaa no mwana wake mudoko, Dhanieri wo makore 15. Kundhoyo vakatanga kusonganira no ungano yo Zvapupu zva Jehovha. Poli ari kuceuja kuti “shamwari jangu mu ungano imbza ajicaizivepi ciri cese ngo pamusoro po zvakatiitikira no kunesa ko mugariro  jedu. Asi izvo azvizivi kuvaphinga kuti vatikhwederere no kutiembejera ngo magama o kunaka mwoyo no besero rinoshanda. Kusisira kwakadini kwakaita besero iro, maningi-ningi pa mukuvo wondhowo, mwana wangu paaidisisa maningi baba wake! Ijona jicitungamirihwa ngo ungano, jakatatija kudakarira maningi Dhanieri. Shamwari imwe yaibatanija Dhanieri pa mabungaijo no shamwari kana povaienda kotamba bhora.” Vovaviri mai no mwana vari kubudirira ushoni nyamasi uno.

Zokadi kamare, kuna njira jakawanda jotingabesera no kuembejera ndijona vaya vari pa ciriro. Bhaibheri rinotiembejeravo ngo vetero inodakajisa yo kumbeji.