Kangaije munoceuja kuti Gail, wakanangwaya pa kutanga mu mutevejwana uu, pacina kukana-kana ari kundohwisana no kufa ko mwamuna wake. Pikija zvakadaro, iyena ari kusota kumbeji kuti avonezve Rob ngo papsa mu nyika imbza yakagondiswa ndi Mwari. Iyena wakati: “Tsamba yandinodakarira maningi ndi Apokalipsi 21:3, 4.” Iyona inoti: “Mwari wozogara na ivona, wozoita Mwari wavo. Anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare bzakapinda.”

Gail wakati: “Cigondiso ici cinonanga zvese. Zvokadi kamare mazwiro angu anobuda kunja apo vandhu vanoruza ari wese wo vanoda asi avana vetero yo kuti vanozovonazve vadiwa vavo.” Gail wakaita zvinozwirana no zvaanotenda ngo kuita basa ro kuzvipira inga mucumaeri wo nguva-yakazara, ecikovana no vocigarisano vake cigondiso ca Mwari kuitira kumbeji apo pokuti “akucazovizve no kufa.”

Kangaije mungati ‘andizvitendi!’ Asi vonanyi muezaniso wo mwanarume waidanijwa Jobe. Iyena wainga ari kuneseka ngo kuhwaja. (Jobe 2:7) Pikija Jobe wakakumbira kufa, iyena wainga ana gonda rakavanga kuna Mwari ro kuti acazomuswa kuti araramezve pasi pano. Ngo kuthemba kwese wakati: “Ndingada kuti mundiaxire mu iba . . . Mungandidanija, inini ndingadavira; mungada kuvonabze basa ro nyara jenyu.” (Jobe 14:13, 15) Jobe waithemba kuti Mwari aacaizomusia zve aacaizokanganwa kumuviisa ku upenyu.

Sambi sambi, Mwari acazozviita—kuitira Jobe no vamweni vacikaverengeki—paanozocinja nyika ino kuva paradhiso. (Luka 23:42, 43, Shanduro yeNyika Itsva) Bhaibheri rinokhohwesa izvi pana Maitiro o Vapostori 24:15 reciti: “Kunozowanika kumuka ko vakafa.” Jesu wakatigondesa kuti: “Mucakahamara nga ibzi, ngokuti inozoguma ngari yokuti vaya vari mu makuva vanozozwa izwi rake . . . vanozomuka.” (Johani 5:28, 29) Jobe anozovona cigondiso ici cakwanirisika. Iyena anozova no vetero yo ‘kuzohwirira ku mukuvo wo ujaha hwake’ ngo kudaro nyama yake inozoramba iripo zvokuti “muviri wake unozovangiswabze.” (Jobe 33:24, 25) Zvondhozvo zvicazoitikavo ku vese vaya vanobongesera unyasha hwa Mwari hwo nasiriro yo kumusa vakafa kuti vararame pasi pano.

Kudari muri kutambujika ngo kuruza ari wese wamunoda, zvokadi kamare zvotabhuyari azvingapeji kucamwa kwenyu. Asi, ngo kurangarijisisa zvigondiso zva Mwari zvinobva mu Bhaibheri, mungava no vetero zve moramba makavanga.—1 VaTesalònika 4:13.

Mwaidakarira kujija zvizinji ngo pamusoro po kuti mungahwisana kudini no kusuruvara ngo kurusa mudoni? Kana kuti muna mubvunjo wakadari inga “Ngenyi Mwari anoregerera ushati no kutambujika?” Tapota vonanyi saite yedu, jw.org, muvone kuti Bhaibheri rinomuembezeresa kudini no kumupa mupinguro jinoshanda.