Pa musoro waperari, tavona zvitatijo zvakananga Jesu. Zvitatijo izvi zvinovonesa kuti Jesu Kristu Mambo wo Umambo hwa Mwari wakagajwa kudenga.

Bhaibheri rinonanga kuti Jesu paakava Mambo, wakagogomera Sathana no madhimoni ake kudenga. Wari uno, Sathana no madhimoni ake vari pasi pano, ngo iyo ndava zviro zviri kucinja maningi pasi pano kuvhira mu gore ro 1914.—Apokalipsi 12:7, 9.

Pikija mugariro wecinesa pasi pano, Jesu, Mambo wo Umambo hwa Mwari ari kubesera vandhu vazinji mu nyika yese. Ngo ndava yo basa ro kujijisa riri kuithwa mu nyika yese, vandhu vazinji vari kujija no kushandisa ndhungamiriro jo Bhaibheri mu upenyu hwavo. (Isaia 2:2-4) Mamiriyau o vandhu ari kujija kuva vashandi vakanaka, kuva no mbhuri yakadakara no kuva no mavonero akaezanana ngo pamusoro po zvo zviro zvo kunyama. Vandhu ava, vari kujija kuva vakadakara nyamasi uno zve vari kuva mukhaindi wo vandhu vanoda Mwari kuti vazopone mu nyika kumbejiyo.

Jesu ari kutonga kudenga. Asi nyika iri kutongwa ngo vandhu. Ngo kudaro, Mwari wakati kuna Jesu: “Unotonga pakati po vavengi vako.” (Nduyo 110:2) Ngo kukasika, Jesu anozotonga no kuparaja vavengi vake zve anozoviisa tondhojo ku vaya vanozwira Mwari.

Mukuvo uu ukazoguma, Umambo hwa Mwari

• Unozopeja zviara zvo kunyepa. Zviara zvinojijisa manyepo ngo pamusoro pa Mwari no kuviisa matambujiko kuno vandhu, zvinozoparajwa. Ngo ndava yo zvishaishi izvi, Bhaibheri rinoezanisa zviara izvi no hure. Kuparajwa ko zviara izvi kunozoshamaisa vazinji.—Apokalipsi 17:15, 16.

• Unozopeja utongi hwo vandhu. Umambo hwa Mwari hunozokwiya-kwiya umambo hwese hwo vandhu.—Apokalipsi 19:15, 17, 18.

• Unozoparaja vandhu vakashata. Zvicinyi zvinozoitika na vaya vanoita zvakashata no vacikadi kuzwira Mwari? “Vakaxata vanozojingwa mu nyika.”—Mazwi Akangwara 2:22.

• Unozoparaja Sathana no madhimoni. Sathana no madhimoni ake ‘avazocengejizve vandhu.’—Apokalipsi 20:3, 10.

Zvicinyi zvinozoitika kuno vaya vanozwira ndhungamiriro jo Umambo hwa Mwari?

Zvinozoithwa ndi Jesu inga Mambo azviezaniswi no ciri cese cakamboithwa ngo utongi hwo vandhu. Jesu anozobesehwa ngo vo 144.000, vakasanwa pasi pano kuti vatonge naye kudenga. (Apokalipsi 5:9, 10; 14:1, 3) Jesu anozoita kuti kuda Mwari kuitike pasi pano. Ngo kudaro, Umambo hwa Mwari:

• Unozopeja ndhenda no rufu. “Apana na umwe wo vagari vo guta angazonanga kuti: ‘Ndiri kuhwaja’” zve “akucazovi no kufa.”—Isaia 33:24; Apokalipsi 21:4.

• Unozoviisa runyararo no kugarisika. “Kunyarara kwavo kunozoita kukuru,” zve “umwe nga umwe anozogara pasi, akagarisika, mu munvuri wo muuva, no wo mukuyu; apana anozovathisa.”—Isaia 54:13; MIKEYA 4:4.

• Unozopa vese mabasa anodakajisa. “Vasanwi vangu vanozoha mucero yo mabasa o nyara javo. Avazorembi mahara.”—Isaia 65:22, 23.

• Unozopeja zvineso zvo zviro zvakatitendeneja. “Bzipare no mabvu akaoma bzidakare, bani ritambe no kutumbuka; ritumbuke ngo maruva akaseja.”—Isaia 35:1.

• Unojijisa vandhu kuti ngozvapi zvovanodikana kuita kuti vazopone no kucingaperi. “Uhomi hucingaperi nga uhu: kuti vamuzive imwimwi, Mwari umwe ega wokadi-kadi, na wiya wakatumwa ndimwi: Jesu Kristu.”—Johani 17:3.

Mwari anoda maningi kuti imwimwi muashire makomborero aya. (Isaia 48:18) Musoro unotevera unozosanangura ngo pamusoro po zvamungaita kuti muwane makomborero aya anodakajisa.