KUNO Vahebheru mu Nyika Yakagondeswa, gore kamare raitangira mu mweji wa Setembro kana Outubro, mu mukuvo wo kuti vaitanga kurima no kusima.

Vandhu vaiverenga njiku jino mweji umwe nga umwe ngo kuvona mafambire unoita mweji wo buwe, (uno njiku jinokwakwana kuita 29 kana 30). Vaizivazve kuti gore rapera vakacijikira pa mafambire aiita zuva. Asi gore raiverengwa vakacijikira pa mweji wo buwe rainga rakafupika maningi tikaezanisa no gore raiverengwa vakacijikira pa mafambire anoita zuva. Ngo kudaro, vaidikana kuwana manera aushoni okuzwiranisa manera aya okuverenga gore no mweji. Vaiita izvi ngo kuengejera njiku nganani kana kuengejera mweji umwe ricito ratanga gore ibza. Izvo zvaiita kuti madhata anase kukhwajana no mukuvo wo kusima pomwe no wokukotora.

Mu njiku ja Mosi, Mwari wakavhunja vandhu vake kuti gore raidikana kutanga mu mweji wa Abhibhi, kana kuti Nisani, mu nguva yo cipepo. (Exodo 12:2; 13:4) Mu mweji uwu wa Nisani vandhu vaiita mabuso aizwirana no kukotohwa ko sevhadha.—Exodo 23:15, 16.

Mujijisi umweni wakananga kudari mu bhuku rake: “Mutemo wokuti pangaengejehwa mweji kana kuti haiwa, wainga wakareruka maningi. Mabuso o Phasika aiitwa mu njiku 14 ya Nisani, mweji wo buwe powainga wakazara. Kazinji izvi zvaiitika pakutanga ko cipepo, pa mukuvo wokuti nguva yo masikati yainga yakaezana no nguva yo usiku. Asi gore poraipera vozwisisa kuti Phasika yo gore rinotevera yaizoitika mukuvo uwu ucito waguma, ivona vaiengejera mweji umwe pa gore iri.”

Zvapupu zva Jehovha zvinoshandisavo njira iyi kuti zvikwanise kuziva njiku inozoitwa Majisa o Cirariro ca Mambo. Awo anoitwa mu nguva yo cipepo, inozwirana kamare no njiku 14 ya Nisani mukuzwirana no karendariyo yo Cihebheru. Ungano jese pa nyika, jinoziviswa mukuvo uciripo ngo pamusoro po njiku iyi. *

Waro Vaiziraeri vaizvizivisa kudini kuti wari mweji wapera, uri kuda kutanga umweni? Nyamasi uno zviro zvakareruka maningi, mungasota basi pa karendariyo kana mu foni mwenyu. Asi mu nguva jo kare, zviro azvicaengepi zvakareruka kudari.

Pa mukuvo wakaitika Ndambi, mweji jese jainga no 30 o njiku. (Genesi 7:11, 24; 8:3, 4) Asi kuno Vaiziraeri asipi mweji jese jainga no 30 o njiku. Kuno Vahebheru, mweji waitanga paya povaikwanisa kuvona kubahwa ko mweji mupsa wo buwe. Ngo kudaro, mweji umwe nga umwe wainga no 29 kana 30 o njiku.

Pa vhaza imweni, Dhavhidhi na Jonatani vakabhuya ngo pamusoro po mweji veciti: “Mangwana i . . . mweji mupsa.” (1 Samueli 20:5, 18) Ngo kudaro, mu nguva ya Dhavhidhi kutanga ko mweji kwainga kwecizivika nguva iciripo. Asi Vaiziraeri vaizvizivisa kudini kuti mweji mupsa unoda kutanga? Tingawana masoko manganani anobesera mu Mishina. Mishina ndi kubatanijwa ko mutemo no zvirovejeso zvainangwa ngo Vajudha. Iyona inovonesa kuti Vajudha povakavha ku uranda ku Bhabhironi, Sinedhriyo (dare guru ro Vajudha) ndirona rainanga zviri zvese ngo pamusoro pazvo. Pa njiku 30 yo mweji umwe nga umwe pa mweji munomwe jaiitwa mabuso, Sinedhriyo yaiungana. Vanarume ava ndivona vaitema civaringo co kuti mweji umweni waizotanga rini. Waro, vaicijikira papi kuti vateme civaringo ici?

Vanarume vamweni vaigara pa ndau jakakhwirira ku Jerusarema, vecisota kumatenga, kuti vavone ciri cese cinovonesa kuti mweji mupsa uri kuda kubahwa. Povaivona ciri cese, vaizivisa Sinedhriyo ngo kukasika. Pavaiva no cokwadi cokuti mweji umweni uri kubahwa, vaizivisa kutanga ngo mweji mupsa. Zvicinyi zvovaiita kudari kumatenga kwainga no makore, zvoita kuti varindiri vaigara vecisota vatame kuvona kubahwa ko mweji umweni?  Ivona vainanga kuti mweji wovaingaro wainga no 30 o njiku, mweji mupsa waizotanga.

Mishina inosanangura kudari, kuti Sinedhriyo izivise kutanga ko mweji mupsa ku vandhu vaigara Jerusarema, vaibhwakija muriro pa Dundhu ro Maorivhe, rainga phedo no Jerusarema. Mu Iziraeri yese muriro waibhwakijwa mu ndau jakakhwirira kuti vazivise masoko aya. Pa kufamba ko nguva, zvinonangwa kuti paitotumwa vandhu kuti vazivise masoko aya. Ngo kudaro, vandhu vese vaigara Jerusarema, Iziraeri kana mu ndharaundha jimweni jiri ndhambo, vaiziva kuti mweji mupsa watanga. Izvo zvaiita kuti vese vakwanise kuita mabuso pa mukuvo wondhowo.

Zvingaita kuti bhokiso riri mu musoro uwu, ringamubesera kuzwisisa kuti mweji jo karendariyo yo Cihebheru, mabuso no mukuvo zvakabatana papi.