KUDARI nomakaenda kovhakacira cirundu co Sangiri Bhezari ku Indoneziya, pamakore adarika, imwimwi maizodari makavona hambzaji ndhatu ku jombe. Ivona vanonasa kuzivika maningi ku cirundu ici ngo basa ravo rokubesera vandhu kuti vazwisise Bhaibheri. Asi pamukuvo wovaingari kujombe vainga veciita zviro zvakasiyana.

Cokutanga ivona vakaenda mukumwa vowana mapuwe airema vomathwara no kuenda komahwirijazve. Mapuwe amweni ainga makuru akadari inga bhora. Tevere vanakaji ava vakagara pasi pa zvimabhanka zvo matabwa no hamera kana kuti maritero veciphwanya-phwanya mapuwe aya kuita zvidimbu zvidoko maningi kupinda zanda ro huku. Perapo, vakatora zvimatimbu zvo mapuwe zviya vozvidira mu mabhardhi vothwara kuenda nawo ko vaigara. Cimwenizve, ivona vakadira mapuwe aya mu masaku akakura aizothwahwa basi ngo makamiyau kuitira kuzoshandiswa kuitira kunasirira zvitaka.

Imwe yo hambzaji iji waizwi Huridha. Mugariro wavo waivatendera kuti vapeje mukuvo wakawanda maningi veciita basa iri kupinda vamweni. Ivona vaishandisa mare yavaiwana kuti vabesere zvinodiwa pa njiku no njiku kuti vabesere mbhuri yavo. Mukusiyana, ivona wari vari kushanda kuti vavige mare yavo. Ivona vaida kutenga tabhureti kuti vakwanise kunghwina mu JW Library^®. Hambzaji Huridha vaizviziva kuti mavhidhiyo no zvimweni zvainga mu JW, zvaizovabesera kuti vaitise nane basa ravo no kuzwisisa kwavo Bhaibheri.

Hambzaji Huridha vakashanda nguva mbiri-mbiri mangwanani ese ko mutengo wo mweji umwe no meya. Ngo kudaro, vakakwanisa kuwana mare yakakwana kuti vatenge tabhureti.

“Pikija no kuremba no kuhwajihwa ngo basa iri rovaiitari,” Hambzaji Huridha vakati: “Pandaishandisa tabhureti iri ndakamuka kukanganwa kuhwajihwa kwese kwandaizwaya ngo ndava yokuti raindibesera kuti ndinasirire ushoni musongano no kuitisa nane basa rangu rokucumaera.” Ivona vakanangazve kuti tabhureti riya rakavabeserazve maningi pamukuvo wakatanga mutungu wo korona zvecivoneka kuti mabasa ese kubatanijavo no musongano zvainga zveciithwa pecishandiswa zvimucini. Takadakara maningi ngokuti hambzaji Huridha vakakwanisa kukwanirisa zvido zvavo.