“Murangariro wokuita zvopabonde unondigumira ngo civhumbu, zvikambhera ngo kuitika andikwanisi kurangarira zvimweni. Zvinodari inga kuti mundhu umweni ari kutungamirira hwiru hwangu.”—Vera

 “Zvinonesa maningi kungwarira murangariro wo zvopabode. Ndinovona zvakareruka kumera mambau kakumburuka.”—John

 Makambova no mazwiro akatojana no a Vera na John here? Musoro uwu, unozomubesera

•  Ngenyi atidikani kugara ticirangarira zvopabonde?

•  Ngenyi zvinonesa maningi?

•  Ngozvapi zvamungaita?

•  Ngozvapi zvinonangwa ngo majaha amweni?

 Mujaha umweni anodaninjwa Alex wakati: “Baba mudoko wangu vakandivhunja kuti Mwari aacaida kundipa cido cokuda kuita vatano kudari iyena wainga acikadi kuti ndizvishandise”

 Ngo divi rimweni baba mudoko va Alex vainanga zvokadi: Mwari wakatipa cido cokuda kuita ruvatano ngo thangwe raushoni. Kudari vandhu vainga vacikaiti zvopabonde, akucaizovonekepi kuno vandhu nyamasi uno. Waro ngenyi amudikani kugara mucirangarira ngo zvopabonde? Ngativone mathangwe maviri akanaka:

•   Bhaibheri rinojijisa kuti cinangwa ca Mwari ngo cokuti mwanarume no mwanakaji vakacadha ndivona basi vanodikana kuita zvovatano —Genesi 1:28; 2:24

   Kudari amuzivi kucada zve munoreremeja mutemo ja Mwari jo vatano, kugara mucirangarira ngo zvopabonde zvinozomuita kuti mugare makanyangajwa. Zvingaita kuti imwimwi mutame kucungirira kukwevejehwa uku zve zvozoita kuti mude kuita vatano no ariwese. Vazinji vakaita zvovatano vakazozvidemba.

•   Kujijira kungwarira murangariro wenyu ngo pamusoro po zvovatano kunosisira maningi kuti: mukhwijirije kuzvibata.—1 VaKorinte 9:25.

 Kuzvibata kunosisira maningi kuti muve no upenyu unodakajisa wari zve no kumbeji. Zvokadi vapsakisisi vamweni vakavona kuti vana vanotatija kujibata, vanova no mukana mushoma jo kuva no zvineso zvouhomi, zvineso zvo mare kana zvineso zvokutama kuzwira mutemo kudari vakura. a

 Murangariro wedu ungaita kuti zvitinesere kugara ticikarangariri ngo zvovatano zve tiri kupona munyika yakazara ngo zvovatano

 “Zvinovoneka inga kuti urongwa wese wo TV unoviisa murangariro wokuti azvizivi kushata kuita zvovatano ucito wacadha, zve aukhombiji zvineso zvamunozova nazvo. Zvakareruka kuva no murangariro wokuti akuna ciri cese cakashata cinoitika kudari ukaita zvovatano.”—Ruth

 “Kubasa, ndinozwa manigi vandhu vazinji vecimbhuya ngo zvovatano, izvo zvinondinyangajisa maningi.”—Nicole

 “Zvinonesa maningi kuzvingwarira kudari wecivona mafoto o vandhu vari mitu mu interinenti. Kuvona mafoto o zvovatano angatogaravhariki mu murangariro zve zvinozonesa maningi kuti mu zvikanganwe!”—Maria

 Mathangwe akadari inga aya angamuita kuti mujizwe inga mupostori Pauro. Iyena wakatara kudari: “Inini ndikada kuteveja bzauxoni, ndinogumihwa ngo uxaixi.”—VaRoma 7:21.

 Rangariranyi zviro zvimweni. Ejanyi kubatikana ngo zviro zvimweni zvicikabataniji zvovatano Zvakadari inga kugogoma, kucovha bhasikoro, kutamba bhora kana kuita zviro zvimweni zvamunovona kuti zvingashanda. Mujaha umweni anodanijwa kuti Valerie wakati: “Kuverenga Bhaibheri zvinobesera maningi. Irona rinomurangariro wakakwirira maningi kupinda wedu. Kudari murangariro uwu ukangwina mu hwiru hwako, zvinonesa maningi kungara wecirangarira zviro zvimweni.”

 Ngozvokadi kuti nguva jimweni mungarangarira ngo zvovatano. Asi ndimwi munosana kuti moitenyi no murangariro uwu. Kudari imwimwi mecida, mungasujunuka pakurangarira zvovatano.

 “Pandinotanga kurangarira ngo zvovatano, ngo kukasika ndinoita kuti murangariro wangu urangarire zviro zvimweni. Zve ndinoejazve kuvona kuti zvicinyi zvandiita kuti ndive no murangariro uwu. Pamweni ungava mumbo wandinawo, kana foto zvandinodikana kuvhisa.”—Helena

 Ndhungamiriro jo Bhaibheri: “Bzokadi bzese, bzino nderemejo, bzakarungama,  .  ngabzigare pakati penyu.”—Vafiripi 4:8.

 Nasanyi kusana vokutamba navo. Kudari shamwari jenyu jecibhuya ngo zvo vatano nguva jese, zvinozonesa komuri kudira ndhambo murangariro wenyu kuzviro zvovatano

 “Pandainga muaruki, zvainesa maningi kutama kurangarira zviro zvakashata. Zve shamwari jo ndainga najo jaiita kuti zviengejere kunesa. Paunopeja nguva no vandhu vanokukwevejera kuti uve no zvido zvakashata, zvinoita kuti utame kungwarira zvido zvako. Izvi zvinoengejera huni basi pa muriro.”—Sarah

 Ndhungamiriro jo bhaibheri: “Ndiani anofamba no vazivi, anoita muzivi; ndiani anobatana no mapenji, anoita wakaxata.”—Mazwi Akangwara 13:20.

 Tizanyi mabungaijo akashata. Vandhu vese vanoziva kuti mabungaijo mazinji ariyo wari anokwindijira zvovatano. Nicole wakananga kuti: “Ndinoneswa maningi ngo mumbo jandinopurukira. Ijona jinoita kuti mazwire angu ave akavanga maningi zvoita kuti ndikonehwe kungwarira mu rangariro wangu.”

 “Dakatanga kuvona mafirimi zve nourongwa wo TV waibhuya ngo zvovatano. Ndakazovona kuti nguva jese ndairangarira maningi ngo zvovatano. Zvakava zvakareruka ngokuti ndainga ndicatanga kuzvirangarira. Wari pandakatanga kusiya zvokuvona mafirimi aya no urongwa uwu, wari andicarangariri maningi ngo zvovatano. Pandinonasa kukheta ushoni mabungaijo angu, zvinondirerukira maningi kuti ndihwisane no murangariro wakashata.”—Joanne

 Ndhungamiriro jo Bhaibheri: “Bzo upombo nokuti psina iriyese, nokuti umbata, ngabzitame kunangwa pakati penyu.”—VaEfeso 5:3.

 Fundo guru: Vandhu vamweni vanovona kuti zvido zvokuda kuita vatano zvinosisira maningi izvona azvidikani kungwaririhwa zve atikwanisi kuzvingwaririra. Asi Bhaibheri rinonanga zvakasiyana. Irona rinothembesa vandhu kuti zvinokwanisika kungwaririra murangariro wedu.

 Ndhungamiriro jo Bhaibheri: “Muite vandhu vapsa mu murangariro no mu mwoyo yenyu.”—VaEfeso 4:23.