Baba vamweni vo ku Maraziya vecibhuya ngo pamusoro po mutevejwana wo vhidhiyo jinozwi Iva Shamwari ya Jehovha, ivona vakananga kudari: “Zvinoita inga kuti Jehovha ari kuzwa zviri kukumbihwa ngo vabari.”

Kuvhira pakatanga kubudiswa vhidhiyo jo kutanga, Zvapupu zva Jehovha zvakabudisa mutevejwana wo vhidhiyo ja Dakaranyi no mbhuri yake. Vhidhiyo jiri kuwanikari mu jw.org, jinojijisa vana vadoko zvijijo zvinosisira maningi ngo pamusoro po mugariro no zvokunamata. Inga muezaniso, ngenyi kuba kwakashata, kana, vangaitisa kudini mukumbiro kuna Mwari.

Vhidhiyo jokutanga jomutevejwana jakasandujwa mu mavereketero anokwana kuita 131 kuti jibesere vana vadoko pasi pese.

Mai vamweni vainga no vana vashanu vakatara kudari: “Kuvhira patakaashira DVD ino musoro unoti, Purutananyi, Zwiranyi Mukomborehwe pa sumana yaperari takakwanisa kuvona vhaza jinokwana kuita 50.”

Musikane umweni anodanijwa Mire ano gumi ro makore na makore maviri anogara Ingratera, wainga ano hama yake yainga no gumi ro makore no makore mashanu ino zina rokuti Tomasi ano ndhendha inodanijwa kuti sindrome yo Down. Mire wakatara kudari: “Tomasi ano vhidhiyo ja Dakaranyi mu foni yake kuti akhombije shamwari jake jokushikora. Iyena anoda maningi mumbo. Iyena anonasa kujiimba zvokuti hambzaji imweni yakacema. Kuvona zviro zvakadaro zvinoshamaisa maningi.”

Ava, ano makore masere okubahwa no mweji mupfumbamwe no makumaviri o njiku no njiku shanu jokubahwa, wakatara kudari: “Dakaranyi na yayake vanojijisa ushoni vana vadoko.”

Mikaylah wakatara kudari: “Ndina makore matandhatu okubahwa. Ndinobonga maningi ngo DVD ino musoro wokuti Purutananyi, Zwiranyi Mukomborehwe. Iyona inondijijisa kuzwira vabari vangu ngokuti zvinodakajisa Jehovha.

Mujaha umweni anoita vhidhiyo jo madhezenyo, aciripi Capupu ca Jehovha, wakavona vhidhiyo ino musoro unoti Kuba Kwakashata. Iyena wakakahamara maningi, paakaziva kuti vhidhiyo iyi yakaithwa ngo cikwata cidoko. Iyena wakananga kudari: “Inini ndinoziva vandhu vanoita basa ro vhidhiyo jo madhezenyo, mukuvo umweni ndakarangarira kuti zvainga zvakanaka kubatira mu ndau jakadari. Pakupera ko njiku, basa ravo rese no kuvangisira kwavo, vanobudisa ciro cinosekesa vandhu pa mukuvo mushoma basi. Ngo divi rimweni mavhidhiyo enyu anocinja upenyu hwo vana vadoko. Ivona vanojija zviro zvakanaka vosiya zvakashata no kuvabesera kuti vateme zvivaringo zvaushoni. Imwimwi muri kuita basa rino cinangwa, basa rinobesera vandhu.”

Vabari vo pasi pese vanozvitenda izvi. Mai vamweni vakatara kudari: “Mwana wangu, Quinn, ano makore matatu wainga ecivona vhidhiyo inoti Kuva Shamwari yaJehovha. Vhidhiyo payainga yecirira, iyena wakandisota, wodira nyara yake paditi, eciti: ‘Mamaa, vhidhiyo iyi iri kundidakajisa maningi.’”