Sin ine wild feel buiker wat dai lüür maine hailig sin, åwer dai Bijbel is dai oiwerst mank al dës buiker. Kain anerd bauk hät dai lüür eere gloobe angåe doir sofeel tijdlang. Åwer dai Bijbel is uk dat bauk wat dai lüür mëst uunersöcht häwe taum waiten wen wat forkërd dårin is un mëst slecht reert häwe dårfon.

Wek uutgelërte maine dat dai Bijbel wat wij hüüt häwe is ni gans genau soo as dat airst wat sreewe woore is. Ain schaullërer fon religion, wat arbëre däit in ain groot schaul, sägt soo: “Wij koine ni mit sicherhët waite of dai Bijbel wat wij hüüt häwe is gans genau as dat airst. Dai rule fone Bijbel wat upsreewe woore sin häwe feel fëgel dårin, un mëste fon eer sin sër feel jåre måkt woore nåheer as dat airst.”

Andrer lüür maine dat ni licht is an dai Bijbel glööwe, dat sai wirklig fon God kümt, weegen dat wat sai lërt häwe in eere kirch. Soo as passijrt is mit air kërl wat Faizal hit. Dai religion wat em sijn familg någåe däit, däit ni an Jësus Kristus glööwe. Hai hät lërt dat dai Bijbel ain hailig bauk is, åwer dai lüür häwe wat bijmåkt urer ruutermåkt dårfon. Hai sägt: “Wen air mësch mit mij fortele wul oiwer dai Bijbel, ik däir ni dår anglööwe, weegen kair mësch hät dat airst Bijbel wat sreewe woore is. Dai is ümstelt woore!”

Wat mainst duu, bliwt sich dat glijk of dai Bijbel ümstelt woore is urer ni? Dau man’s denke: In dai Bijbel stäit feel gaure daile wat bald passijre daue. Däist duu an dës gaur daile glööwe wen dat ni genau wäir as dat wat airst sreewe woore is? (Romanos 15:4) Wen dai Bijbel ful mit fëgels wäir weegen sai is feel måls upsreewe woore, däist duu an eer formånen glööwe taum arbëd krijge, dijn familg uppasse un God dijne?

Is wår dat dai airste rule woo dai Bijbel sreewe woore is, sin ni mër. Åwer hüüt sin feel Bijbels wat sër uld sin un sogår feel handsriwte wat upsöcht ware koine. Dës ul Bijbels un handsriwte sin leewig bleewe bet hüüt hen. Woo kan dat sin, lijkerst doir dës feel tijdlang, nog dat dai lüür dai uutrote wule un dat andrer dai Bijbel ümtuusche wule? Duu must dit waite weegen dat kan dij helpe dat’s duu anglööwe däist dat dai Bijbel wat wij hüüt häwe wirklig fon God kümt.