Air upwijsen däit säge dat mër as 90% fon dai juugende in Brasil beere daue, åwer bloos 16% daue bijnå jërer dag beere. Kan sin wek fon dai daue sich fråge: “Mag dat beeren bloos air dail sin dat man sich beeter befijne däit? Urer is dat nog mër?”

•  Wat is air gebeed?

•  Däit God wirklig dat beeren hööre?

•  Oiwer wat kan ik beere?

•  Wat daue dai andrer juugende säge?

 Beere is fortele mit Jehovaa, dai wat ales måkt hät. Dau ais bits andenke, wat dit ales bedüüre däit! Jehovaa is dai Grötst oiwer dai lüür in ales. Åwer, lijkerst soo, “hai is ni wijdaf fon jërer ainsig fon oos.” (Atos 17:27) Ine Bijbel fijne wij air gaur nöögen tau oos: “Kåmt näig an God, un hai kümt näig an juuch.” (Tiago 4:8)

 Åwer wosoo kast duu näig an God kåme?

•   Doir dat gebeed - is soo dat’s duu mit God fortele däist.

•   Doir dai Bijbel lëre - is soo dat God mit dij fortele däit.

 Doir dat gebeed un dai Bijbel lëre, krijgst duu mit God fortelt un soo häst duu aine gaure ümgang mit em.

 “Mit Jehovaa fortele bedüürt dat wij mit dem Alehöögst fortele, dat is dai grötst amt wat air häwe kan.” - Jeremy.

 “Tau Jehovaa fortele wat ik forneeme dau, mökt dat ik mij nog näiger bij em befijne dau.” - Miranda.

 Lijkerst dat’s duu an God glööwe däist un däist sogår tau em beere, kan ni licht sin dat’s duu glööwe däist dat hai dat gebeed höört. Åwer dai Bijbel sägt dat God is dai wat dat “Beeren hööre däit”. (Sal. 65:2) Dai Bijbel sägt uk wij koine al oos kopbreeken oiwer God smijte. Woweegen? Weegen hai däit oos uppasse. (1 Pedro 5:7)

 Denk ais: Däist duu dij ümer tijd ruuterneeme taum fortele mit dai wat’s duu lijbe däist? Duu kast dat neemlig mit God måke. Dau ümer mit em fortele un måkt dat doir sijne nåme benutse, Jehovaa. (Salmo 86:5 bet 7 un 88:9) Dai Bijbel sägt duu schast “ümer beere”. (1 Tessalonicenses 5:17)

 “Wen ik beer, ik fortel mit mijn Himlisch Fåter, un ik kan mij härts tau em upmåke.” - Moisés.

 “Ik fortel tau Jehovaa ales wat ik forneeme dau up dai neemlig årt soo as ik mit mijne mama fortel un mit aim woo ik gaure ümgang mit häw.” - Karen.

 Dai Bijbel sägt: “In ales, doir beeren un biren, t’hoop mit danken, måkt tau God bekand ales wat’s duu wist.” (Filipenses 4:6)

 Den, koine wij oiwer oos kopbreeken beere? Gans sicher! In wårhët, dai Bijbel sägt: “Smit dijn dracht oiwer Jehovaa, un hai däit dij stüte.” (Salmo 55:22)

 Åwer gewis wen wij beere, döre wij ni bloos oiwer oos kopbreeken fortele. Air määke wat Chantelle hit sägt: “Wäir kair ümgang wen ik bloos Jehovaa sijn hülp forlange däir, dat airst wat man måke mut is danke, weegen ik häw feel daile woo ik God oiwer danke kan.”

 Denk ais: Oiwer wat kast duu dankbår sin? Denk an drai daile woo’s duu hüüt Jehovaa oiwer danke kast.

 “Sogår ainfach daile soo as ain fain blaum saie kan oos dai wünsch geewe taum Jehovaa danke.” - Anita

 “Dau an air dail denke wat God måkt hät wat dij sër gefale däit urer denk an aine spruch fon dai Bijbel wat dij sër angäit, un den beer tau Jehovaa un dau em dåroiwer danke.” - Brian.