योमारा र तिनका भाइहरू मार्सेलो र आइभर ग्वाटेमालाको एउटा सानो गाउँमा बस्छन्‌। योमाराले यहोवाका साक्षीहरूसित बाइबल अध्ययन गर्न थालिन्‌ र पछि तिनका भाइहरूले पनि अध्ययन गरे। तर एउटा समस्या थियो। तिनीहरू तीनै जना दृष्टिविहीन थिए र तिनीहरूलाई ब्रेल पढ्‌न पनि आउँदैनथ्यो। त्यसैले अध्ययन सञ्चालकले अध्ययन सामग्रीबाट अनुच्छेद र बाइबल पदहरू पढेर सुनाउँथे।

मण्डलीका सभाहरूमा जान पनि तिनीहरूलाई गाह्रो थियो। तिनीहरूको घरबाट सबैभन्दा नजिकको सभाभवन ४० मिनेट टाढा थियो र तिनीहरू आफै त्यहाँसम्म जान सक्दैनथे। तर भाइहरूले तिनीहरूलाई मण्डलीका सबै सभामा लैजाने प्रबन्ध मिलाए। तिनीहरूले मध्यहप्ताको सभामा विद्यार्थीको असाइनमेन्ट पाउँदा भाइहरूले तिनीहरूलाई आफ्नो प्रस्तुति कण्ठ पार्न मदत गर्थे।

मे २०१९ मा तिनीहरूकै गाउँमा मण्डलीका सभाहरू सञ्चालन गर्न थालियो। त्यतिबेलासम्ममा तिनीहरूको गाउँमा एक नियमित अग्रगामी दम्पती सरिसकेको थियो। तिनीहरूले ती दिदीभाइहरूलाई ब्रेल पढ्‌न र लेख्न सिकाउने लक्ष्य राखे। तर त्यस दम्पतीलाई ब्रेल पढ्‌न र लेख्न भने आउँदैनथ्यो। त्यसैले उनीहरू एउटा पुस्तकालयमा गए र दृष्टिविहीनहरूलाई ब्रेल सिक्न मदत दिने किताबहरू ल्याएर पढ्‌न थाले।

केही महिनाभित्रै तीनै जनाले ब्रेल पढ्‌न सिके र यसले गर्दा तिनीहरूले छिटो आध्यात्मिक प्रगति गर्न सके। a अहिले योमारा, मार्सेलो र आइभर नियमित अग्रगामी सेवा गर्छन्‌। मार्सेलो सहायक सेवक पनि हुन्‌। तिनीहरू हप्ताभरि नै आध्यात्मिक गतिविधिमा व्यस्त रहन्छन्‌। तिनीहरूको जोस देखेर अरू पनि त्यसै गर्न उत्प्रेरित भएका छन्‌।

यी दिदीभाइहरू मण्डलीको मायालु साथ पाएकोमा कृतज्ञ छन्‌। योमारा भन्छिन्‌: “साक्षीहरूलाई पहिलो चोटि भेटेदेखि नै उहाँहरूले हामीलाई साँचो प्रेम देखाउनुभएको छ।” मार्सेलो पनि यसो भन्छन्‌: “हामीले मण्डलीमा थुप्रै असल साथीहरू पाएका छौँ र हामी प्रेमले बाँधिएको विश्‍वव्यापी परिवारको भाग पनि हौँ।” योमारा र तिनका भाइहरू यहोवाले पृथ्वीलाई प्रमोदवनमा परिणत गर्नुहुने समयको उत्सुकतासाथ प्रतीक्षा गर्दै छन्‌।—भज. ३७:१०, ११; यसै. ३५:५.