1. १. सैतान। विद्रोही स्वर्गदूत सैतान नै आज संसारमा घृणा फैलाउने मुख्य व्यक्‍ति हो। ईश्‍वरले सैतानलाई र त्यसको प्रभावमा परेर अरूलाई घृणा गर्ने सबैलाई नाश गर्नुहुनेछ।—भजन ३७:३८; रोमी १६:२०.

2. २. सैतान अधीनस्थ यो संसार। ईश्‍वरले घृणालाई मलजल गर्ने भ्रष्ट राजनीतिज्ञ र धार्मिक नेतालगायत सबै दुष्ट तत्त्व हटाउनुहुनेछ। भ्रष्टाचार गर्ने अनि मानिसहरूबाट नाजायज फाइदा उठाउने लोभी व्यापारजगत्‌ पनि नाश हुनेछ।—२ पत्रुस ३:१३.

3. ३. मानिसहरूमा भएको पाप। बाइबलले बताएअनुसार सबै मानिस जन्मजातै पापी छन्‌। त्यसैले हाम्रो सोचाइ, भावना र काम सधैँ सही हुँदैन। (रोमी ५:१२) मनमा घृणा पाल्नु र घृणा झल्किने व्यवहार गर्नु पापी झुकावकै उपज हो। ईश्‍वरले मानिसहरूलाई त्यस्ता सबै पापी झुकावमाथि विजय हासिल गर्न मदत गर्नुहुनेछ। फलस्वरूप पृथ्वीबाट घृणा भन्‍ने कुराको नामोनिसानै मेटिनेछ।—यसैया ५४:१३.

1. १. कसैले अन्याय भोग्नेछैन। यस पृथ्वीमा ईश्‍वरको राज्यले शासन गर्नेछ। यो स्वर्गमा स्थापना भएको सरकार हो। यसले न्याय कायम गर्नेछ र यो सदासर्वदा रहनेछ। (दानिएल २:४४) त्यहाँ पूर्वाग्रह र भेदभाव हुनेछैन। उहाँले सबै अन्याय सच्याउनुहुनेछ।—लुका १८:७.

2. २. सबैले शान्ति अनुभव गर्नेछन्‌। कोही पनि हिंसा र युद्धको मारमा पर्नेछैनन्‌। (भजन ४६:९) पृथ्वीमा शान्तिप्रेमी मानिसहरू मात्र बस्नेछन्‌। त्यसैले सबैले सुरक्षित महसुस गर्नेछन्‌।—भजन ७२:७.

3. ३. सबै जना सुखी भई सधैँभरि बाँच्नेछन्‌। पृथ्वीमा रहने सबैले आफ्ना छिमेकीहरूलाई साँचो प्रेम गर्नेछन्‌। (मत्ति २२:३९) कसैलाई तनाव हुनेछैन। विगतमा आफूले भोग्नुपरेको तीतो अनुभवको याद समेत आउनेछैन। (यसैया ६५:१७) त्यतिबेला कसैको मनमा घृणा हुनेछैन। नतिजास्वरूप सबैले “अपार शान्तिको आनन्द उठाउनेछन्‌।”—भजन ३७:११.

के तपाईँ त्यस्तो संसारमा जीवन बिताउन चाहनुहुन्छ? आज पनि धेरै मानिसले बाइबल सिद्धान्तहरू लागू गरेर घृणामाथि विजय हासिल गर्न सिकिरहेका छन्‌। (भजन ३७:८) संसारभरि लाखौँ यहोवाका साक्षीहरूले त्यसै गरिरहेका छन्‌। हुनत तिनीहरू विभिन्‍न संस्कृति र पृष्ठभूमिबाट आएका हुन्‌ तर तिनीहरू प्रेम र एकताको बन्धनमा गाँसिएका छन्‌ र एउटै परिवारको भाग भएका छन्‌।—यसैया २:२-४.

अन्याय र भेदभावको सामना कसरी गर्ने भन्‍नेबारे आफूले सिकेको कुरा तपाईँसित बाँड्‌न पाउँदा यहोवाका साक्षीहरू खुसी हुनेछन्‌। बाइबलबाट सिकेको कुराले तपाईँलाई मनबाट घृणा हटाउन र प्रेम विकास गर्न मदत गर्नेछ। तपाईँले सबैसित दयालु व्यवहार गर्न सिक्नुहुनेछ, यहाँसम्म कि कृतघ्न र तपाईँलाई घृणा गर्ने व्यक्‍तिहरूलाई समेत। नतिजास्वरूप तपाईँ अहिले पनि अझ खुसी हुन सक्नुहुनेछ र अरूसितको सम्बन्ध सुमधुर हुनेछ। अझ महत्त्वपूर्ण कुरा, तपाईँले ईश्‍वरको राज्यको अधीनमा बस्न सिक्नुहुनेछ, जुन राज्यमा घृणा भन्‍ने कुराको अस्तित्व नै रहनेछैन।—भजन ३७:२९.