इजकिएल १८:१-३२
१८ यहोवाको वचन फेरि मकहाँ आयो। उहाँले मलाई भन्नुभयो:
२ इस्राएलमा चलेको यो उखानको अर्थ के हो, ‘अमिलो अङ्गुर खाए बुबाले, दाँत कुँडियो छोराको’?+
३ “ब्रह्माण्डका मालिक यहोवा घोषणा गर्नुहुन्छ, ‘म आफ्नै कसम खाएर भन्छु: तिमीहरूले इस्राएलमा यो उखान फेरि कहिल्यै भन्नेछैनौ।
४ हेर, सबैको जीवन* मेरै हो। बुबाको अनि छोराको; दुवैको जीवन मेरै हो। जसले* पाप गर्छ, त्यही मर्छ।
५ “‘मानौँ, एक जना धर्मी मानिसले सधैँ न्यायसङ्गत अनि सही काम गर्छ।
६ उसले डाँडामा मूर्तिहरूसामु बलि चढाएको चिज खाँदैन;+ इस्राएलीहरूका घिनलाग्दा मूर्तिहरूलाई* ढोग्दैन; छिमेकीकी पत्नीलाई बिटुलो पार्दैन+ र महिनावारी भएकी स्त्रीसित सम्बन्ध राख्दैन;+
७ कसैलाई दुर्व्यवहार गर्दैन+ बरु ऊसित सापटी लिनेले राखेको बन्धकी फिर्ता गर्छ;+ कसैलाई लुट्दैन+ बरु भोकोलाई आफ्नै खानेकुरा दिन्छ+ र नाङ्गोलाई लुगा दिन्छ;+
८ कसैसित ब्याज लिँदैन न त धेरै नाफा कमाउन चर्को ब्याजमा ऋण दिन्छ+ अनि कसैलाई अन्याय पनि गर्दैन+ र दुई व्यक्तिबीच निष्पक्ष न्याय गर्छ+
९ अनि वफादार भएर मेरा विधिविधान तथा फैसलाहरू पालन गर्छ। यस्तो मानिस धर्मी मानिस हो र ऊ पक्कै बाँच्नेछ,’+ ब्रह्माण्डका मालिक यहोवा घोषणा गर्नुहुन्छ।
१० “‘तर मानौँ, उसको छोराचाहिँ लुटेरा+ भयो अथवा हत्यारा+ भयो अथवा यीमध्ये कुनै पनि गलत काम गर्ने भयो:
११ (तर उसको बुबाले भने यस्ता कुनै पनि गलत काम गरेको छैन) डाँडामा मूर्तिहरूसामु बलि चढाएको चिज खाने, छिमेकीकी पत्नीलाई बिटुलो पार्ने,
१२ खाँचोमा परेको मानिस र गरिबलाई दुर्व्यवहार गर्ने,+ अरूलाई लुट्ने, बन्धकी फिर्ता नगर्ने, घिनलाग्दा मूर्तिहरूलाई ढोग्ने,+ घिनलाग्दा रीतिथिति मान्ने,+
१३ ब्याज लिने वा धेरै नाफा कमाउन चर्को ब्याजमा ऋण दिने।+ यस्तो छोरा बाँच्नेछैन। उसले गरेका यस्ता घिनलाग्दा कामले गर्दा ऊ पक्कै मारिनेछ। उसको रगतको दोष उसकै थाप्लोमा पर्नेछ।
१४ “‘तर मानौँ, एउटा बुबा छ र बुबाले गरेको सबै गलत काम छोराले देख्छ। तर त्यो देखेर पनि उसले बुबाले जस्तै गर्दैन।
१५ उसले डाँडामा मूर्तिहरूसामु बलि चढाएको चिज खाँदैन; इस्राएलीहरूका घिनलाग्दा मूर्तिहरूलाई ढोग्दैन; छिमेकीकी पत्नीलाई बिटुलो पार्दैन;
१६ कसैलाई दुर्व्यवहार गर्दैन; अरूलाई लुट्दैन; बन्धकी फिर्ता दिन्छ; भोकोलाई आफ्नै खानेकुरा दिन्छ र नाङ्गोलाई लुगा दिन्छ;
१७ गरिबलाई थिचोमिचो गर्दैन; ब्याज लिँदैन वा धेरै नाफा कमाउन चर्को ब्याजमा ऋण दिँदैन र मेरा फैसलाहरू तथा विधिविधान पालन गर्छ। यस्तो मानिस उसको बुबाको गलत कामले गर्दा मर्दैन। ऊ पक्कै बाँच्नेछ।
१८ तर बुबाले भने आफ्नो गल्तीको सजाय पाउनेछ र मर्नेछ। किनकि बुबाले जालसाजी गऱ्यो, आफ्नै भाइबन्धुलाई लुट्यो र आफ्ना मानिसहरूलाई हानि पुऱ्यायो।
१९ “‘तर तिमीहरू सोधौला: “बुबाले गरेको गल्तीको सजाय छोराले किन भोग्नुपर्दैन?” छोराले न्यायसङ्गत अनि सही काम गरेकोले र मेरा विधिविधान पालन गरेकोले ऊ पक्कै बाँच्नेछ।+
२० किनकि जसले* पाप गर्छ, त्यही मर्छ।+ बुबाको गल्तीको सजाय छोराले भोग्नुपर्नेछैन। त्यसैगरि छोराको गल्तीको सजाय बुबाले भोग्नुपर्नेछैन। धर्मी मानिसले गरेको असल कामको फल ऊ आफैले पाउनेछ र दुष्ट मानिसले गरेको दुष्ट कामको फल पनि ऊ आफैले पाउनेछ।+
२१ “‘यदि कुनै दुष्ट मानिसले आफ्नो दुष्ट काम त्याग्छ अनि मेरा विधिविधान पालन गर्छ र न्यायसङ्गत अनि सही काम गर्छ भने ऊ पक्कै बाँच्नेछ, ऊ मर्नेछैन।+
२२ उसले पहिले गरेको कुनै पनि अपराधको लेखा लिइनेछैन।*+ असल काम गरिरहेकोले ऊ बाँच्नेछ।’+
२३ “ब्रह्माण्डका मालिक यहोवा घोषणा गर्नुहुन्छ: ‘दुष्ट मर्दा म खुसी हुन्छु र?+ के म उसले खराब काम त्यागेर बाँचेको हेर्न चाहन्नँ र?’+
२४ “‘तर कुनै धर्मी मानिसले असल काम त्यागेर खराब काम* गऱ्यो र दुष्ट मानिसले गर्ने सबै घिनलाग्दा काम गऱ्यो भने ऊ बाँच्नेछ र? उसले पहिला गरेको कुनै पनि असल काम याद गरिनेछैन।+ ऊ मर्नेछ किनकि उसले धोका दियो र पाप गऱ्यो।+
२५ “‘तर तिमीहरू भनौला: “यहोवाको काम न्यायसङ्गत छैन।”+ हे इस्राएलको घराना, सुन! मेरो काम न्यायसङ्गत छैन?+ मेरो होइन, तिमीहरूको काम पो न्यायसङ्गत छैन!+
२६ “‘कुनै धर्मी मानिसले असल काम त्यागेर खराब काम गऱ्यो र त्यसले गर्दा ऊ मऱ्यो भने ऊ आफ्नै गलत कामले गर्दा मरेको हुन्छ।
२७ “‘अनि कुनै दुष्ट मानिसले दुष्ट काम त्यागेर न्यायसङ्गत र सही काम गर्न थाल्यो भने उसले आफ्नो ज्यान* जोगाउनेछ।+
२८ उसले आफ्नो गल्ती स्विकाऱ्यो र पाप गर्न छोड्यो भने ऊ निश्चय बाँच्नेछ, ऊ मर्नेछैन।
२९ “‘तर इस्राएलको घरानाले यसो भन्ला: “यहोवाको काम न्यायसङ्गत छैन।” हे इस्राएलको घराना, के मेरो काम साँच्चै न्यायसङ्गत छैन?+ मेरो होइन बरु तिमीहरूको काम पो न्यायसङ्गत छैन!’
३० “ब्रह्माण्डका मालिक यहोवा घोषणा गर्नुहुन्छ: ‘हे इस्राएलको घराना, म तिमीहरू प्रत्येकको काम हेरेर इन्साफ गर्नेछु।+ त्यसैले गल्ती गर्न छोड, दुष्ट काम गर्न चटक्कै छोडिहाल। नत्र त ती दुष्ट कामले गर्दा तिमीहरूले ठेस खानेछौ र तिमीहरू दोषी ठहरिनेछौ।
३१ त्यसैकारण पहिले-पहिले जे-जति पाप गऱ्यौ, अब ती सबै गर्न छोडिहाल+ अनि आफ्नो मन र विचार परिवर्तन गर।+ हे इस्राएलको घराना, तिमीहरू किन व्यर्थै मर्छौ?’+
३२ “ब्रह्माण्डका मालिक यहोवा घोषणा गर्नुहुन्छ, ‘कोही मर्दा म खुसी हुन्नँ।+ त्यसैले दुष्ट काम गर्न छोड र बाँच!’”+
फुटनोटहरू
^ शब्दावलीमा “नेफेश; साइखी” हेर्नुहोस्।
^ शब्दावलीमा “नेफेश; साइखी” हेर्नुहोस्।
^ यहाँ प्रयोग भएको हिब्रू शब्द “जनावरको दिसा” जनाउने शब्दसित सम्बन्धित हुन सक्छ र यसलाई घृणा व्यक्त गर्न प्रयोग गरिएको छ।
^ शब्दावलीमा “नेफेश; साइखी” हेर्नुहोस्।
^ शा., “सम्झना गरिनेछैन।”
^ वा “अन्याय।”
^ शब्दावलीमा “नेफेश; साइखी” हेर्नुहोस्।
