उत्पत्ति १७:१-२७
१७ अब्राम ९९ वर्षको हुँदा यहोवा परमेश्वर तिनीकहाँ प्रकट हुनुभयो र भन्नुभयो: “म सर्वशक्तिमान् परमेश्वर हुँ। सधैँ मैले देखाएको बाटोमा हिँड अनि निर्दोष जीवन बिताऊ।
२ म तिमीसित करार गर्नेछु+ अनि तिम्रा सन्तानलाई कसैले गन्नै नसक्नेगरि धेरै बनाउनेछु।”+
३ त्यसपछि अब्राम भुईँमा घोप्टो परे। परमेश्वरले तिनलाई अझै भन्नुभयो:
४ “हेर, मैले तिमीसित करार गरेको छु+ र तिमी थुप्रै जातिका पुर्खा हुनेछौ।+
५ अबदेखि तिम्रो नाम अब्राम* होइन तर अब्राहाम* हुनेछ किनकि म तिमीलाई थुप्रै जातिका पुर्खा बनाउनेछु।
६ तिम्रा सन्तान बढ्दै जानेछन् अनि थुप्रै जाति बन्नेछन्। तिम्रै सन्तानबाट थुप्रै राजा आउनेछन्।+
७ “तिमी र तिम्रा सन्तान-दरसन्तानसित गरेको कहिल्यै नटुट्ने यो करार म पूरा गर्नेछु।+ म तिम्रो र तिम्रा सन्तानको परमेश्वर हुनेछु।
८ तिमी अहिले परदेशी भएर बसिरहेको यो कनान देशको सबै जग्गाजमिन म तिमीलाई र पछि आउने तिम्रा सन्तानलाई दिनेछु।+ यो सधैँभरिका लागि तिनीहरूकै सम्पत्ति हुनेछ र म तिनीहरूका परमेश्वर हुनेछु।”+
९ परमेश्वरले अब्राहामलाई अझै भन्नुभयो: “मैले तिमीसित गरेको यो करार तिमी र तिम्रा सन्तानले पुस्तौँपुस्तासम्म कायम राख्नुपर्छ।
१० तिमी र मबीच गरिएको यो करार पूरा गर्न तिमी र तिम्रा सन्तानले यसो गर्नुपर्छ: तिमीकहाँ भएका प्रत्येक पुरुषले खतना* गर्नुपर्छ।+
११ तिमीले पनि खतना गर्नुपर्छ। किनकि यो तिमी र मबीच गरिएको करारको चिन्ह हो।+
१२ तिम्रो घरमा जन्मेको हरेक बालक आठ दिनको भएपछि उसको खतना गर्नुपर्छ।+ विदेशीसित पैसा तिरेर किनिएका सबै दासको पनि खतना गर्नुपर्छ। यो आज्ञा सधैँ पालन गर्नू।
१३ तिम्रो घरमा जन्मेका र विदेशीसित पैसा तिरेर किनिएका सबै दासको खतना गर्नुपर्छ।+ अनि तिम्रो शरीरमा भएको यो चिन्ह तिमीसित गरेको चिरस्थायी करारको प्रमाण हुनेछ।
१४ यदि कुनै पुरुषले खतना गरेन भने त्यसलाई समुदायबाट हटाइनै पर्छ* किनभने त्यसले मेरो करार भङ्ग गरेको हुन्छ।”
१५ त्यसपछि परमेश्वरले अब्राहामलाई भन्नुभयो: “अबदेखि तिमीले आफ्नी पत्नीलाई साराई*+ भनेर नबोलाउनू किनभने तिनको नाम सारा* हुनेछ।
१६ म तिनलाई आशिष् दिनेछु र तिनीबाट तिम्रो एउटा छोरा हुनेछ।+ तिनी थुप्रै जातिकी आमा र थुप्रै राजाकी पुर्खा हुनेछिन्।”
१७ यो सुनेर अब्राहाम भुईँमा घोप्टो परे अनि मनमनै यसो भनेर हाँसे:+ “म १०० वर्ष पुगेको बूढोको पनि बच्चा होला र? अनि ९० वर्ष पुगेकी साराले बच्चा जन्माउन सक्लिन् र?”+
१८ अनि अब्राहामले साँचो परमेश्वरलाई भने: “बिन्ती छ, इस्माएललाई आशिष् दिनुहोस्!”+
१९ तर परमेश्वरले तिनलाई भन्नुभयो: “तिम्री पत्नी साराले निश्चय एउटा छोरा जन्माउनेछिन् र तिमीले तिनको नाम इसहाक* राख्नू।+ म तिम्रो छोरा अनि तिनका सन्तानसित पनि कहिल्यै नटुट्ने यही करार गर्नेछु।+
२० इस्माएलको लागि तिमीले गरेको बिन्ती मैले सुनेँ। हेर, म उनलाई आशिष् दिनेछु। उनका सन्तान पनि बढ्दै जानेछन् र उनका सन्तान प्रशस्तै हुनेछन्। उनीबाट १२ कुलका नाइकेहरू उत्पन्न हुनेछन् र उनीबाट एउटा ठूलो जाति बन्नेछ।+
२१ तर म इसहाकसित मात्र करार गर्नेछु।+ अर्को वर्ष यसै बेला साराले इसहाकलाई जन्माउनेछिन्।”+
२२ अब्राहामसित कुरा गरिसकेपछि परमेश्वर त्यहाँबाट जानुभयो।
२३ त्यसपछि अब्राहामले आफ्नो छोरा इस्माएलको अनि आफ्नो घरमा जन्मेका र पैसा तिरेर किनिएका सबै पुरुषको खतना गरे। यसरी परमेश्वरले भन्नुभएझैँ अब्राहामले आफ्नो घरमा भएका सबै पुरुषको त्यही दिन खतना गरे।+
२४ अब्राहामको खतना गरिँदा तिनी ९९ वर्षका थिए।+
२५ अब्राहामको छोरा इस्माएलको खतना गरिँदा तिनी १३ वर्षका थिए।+
२६ त्यही दिन अब्राहाम र तिनको छोरा इस्माएलको पनि खतना गरियो।
२७ अब्राहामको घरमा जन्मेका र पैसा तिरेर विदेशीबाट किनिएका सबै पुरुषको त्यही दिन खतना गरियो।
फुटनोटहरू
^ यसको अर्थ हो, “बुबा महान् हुनुहुन्छ (उच्च पारिनुभएको छ)।”
^ यसको अर्थ हो, “असङ्ख्य मानिसका बुबा; धेरैको बुबा।”
^ वा “मारिनै पर्छ।”
^ यसको अर्थ “झगडालु” हुन सक्छ।
^ यसको अर्थ हो, “राजकुमारी।”
^ यसको अर्थ हो, “हाँसो।”
