OMIMVO 3 000 nasha dha ka pita, tatekulululwa Job okwa li e shi mono kutya oondhila dhokegulu otadhi tu longo oshindji kombinga yiilonga yaKalunga. Odho hadhi longithwa momathaneko nosho wo momifethelamo, omolwiinima mbyoka hadhi ningi. Shoka Ombiimbeli ya popya kombinga yoondhila, otashi tu longo iinima ya simana monkalamwenyo nosho wo kombinga yekwatathano lyetu naKalunga. Natu tale kiiholelwa yimwepo.

Aakalimo yomuJerusalem oya li ye shi nawa omavalelanganda, ngoka haga tungile olundji iihandhila yago pombanda momingenge dhomatungo. Gamwe oga li ga tungila motempeli yaSalomo. Otashi vulika ga li ge wete kutya momingenge dhotempeli omu na egameno notaga vulu okutekulila mo uudhilona wago omumvo kehe nopwaahe na okupiyaganekwa.

Omunyoli gwEpisalomi 84, gumwe gwomoyanamati yaKora, okwa li a mono iihandhila mbyoka sho ta longo potempeli. Okwa li ha yakula potempeli uule woshiwike shimwe momukokomoko gwoomwedhi hamano. Okwa li a hala okukala a fa evalelanganda ndyoka hali kala aluhe potempeli yaJehova. Okwa nyola a ti: “Otempeli yoye onde yi hokwa ngiini, Omuwa Omunankondoawike! Omwenyo gwandje otagu yuulukwa okuya motempeli yOmuwa. Enza olya tungu oshihandhila, nevalelanganda olya mono egumbo. Omo lya kaleke oyana popepi noshiyambelo shoye, Omuwa Omunankondoawike, omukwaniilwa gwandje naKalunga kandje.” (Episalomi 84:1-3) Mbela tse noyana yetu ohatu kala twa hala okukala potempeli yaKalunga? Mbela otu hole ngaa okugongala aluhe pamwe noshigwana she? — Episalomi 26:8, 12.

Omupolofeti Jeremia okwa nyola a ti: “Oonkumbinkumbi odhi shi ethimbo lyokushuna.” Okwa li ha mono sho oondhila ndhoka tadhi tuka tadhi piti mEvi lyEuvaneko. Pethimbo lyokufu, oonkumbinkumbi dha konda po 300 000 ohadhi monika tadhi zi koAfrika dhu uka kuEuropa tadhi tuka kombanda yesilu lyaJordan. Ngele okwenye kwa thiki, ohadhi kala dhi shi shi nale kutya ethimbo lyadho lyokuvala olya thika nodhi na okushuna. Odha “tseya ethimbo lyokutembuka,” ngaashi owala oondhila dhilwe. — Jeremia 8:7.

Embo Collins Atlas of Bird Migration olya ti: “Okutembuka kwoondhila oshinima shopaunshitwe.” Jehova Kalunga okwa shitila moondhila uunongo wokutseya ethimbo lyadho lyokutembuka. Okwa pa wo aantu uukwatya wokuyoolola elunduluko lyomathimbo nonkalo yombepo. (Lukas 12:54-56) Ontseyo yokutseya Kalunga oyo hayi kwathele aantu ya ndhindhilike iiningwanima mbyoka tayi ningwa pethimbo lyetu, oshinima shoka oonkumbinkumbi ihaadhi vulu okuninga. Aaisraeli yopethimbo lyaJeremia kaya li ye shi omandhindhiliko ngoka. Kalunga okwa li e ya lombwele kutya uupyakadhi wawo owu li peni. Okwa ti: “Oye  ekelehi oohapu dhandje; nena oye na po uunongo wuni?” — Jeremia 8:9.

Atuhe otu shi iwetele nomeho getu yene kutya otu li ‘momasiku gahugunina’ ngoka ga popiwa mOmbiimbeli. (2 Timoteus 3:1-5) Mbela oto ka holela ngaa oonkumbinkumbi mokukala wu shi “ethimbo” moka wu li?

Ontsa oya popiwa lwiikando oyindji mOmbiimbeli. Oondhila ndhono odha li dha ha nale, unene tuu mEvi lyEuvaneko moka mwa li Aaisraeli. Ontsa ohayi “kala nokulengalenga oondya,” uuna yi li poshihandhila shayo shoka hashi kala pombanda puule, molwaashoka ‘omeho gayo ohaga mono kokule.’ (Job 39:27-29, OB-1954) Uuna yi li uule wokilometa yimwe pombanda, ohayi vulu nokuli okumona okalimba hoka ke li pevi.

Jehova Kalunga naye oha vulu okumona shoka tashi ka ningwa monakuyiwa a fa owala ontsa ndjoka hayi “mono kokule.” Okwa ti: “Okuza kontsapo onda hunganeke mbyoka tayi ya; onalenale nda popi mbyoka tayi ka ningwa.” (Jesaja 46:10) Ngele ohatu vulika komayele gaJehova, otatu ka mona mo uuwanawa muunongo we nomuukwatya we wokumona monakuyiwa. —  Jesaja 48:17, 18.

MOmbiimbeli, aantu mboka yi inekela muJehova otaya yelekanithwa noontsa. Otayi ti: “Mboka taa inekele Omuwa, ohaa mono oonkondo oompe. Oya fa oontsa tadhi yelutha omawawa pombanda.” (Jesaja 40:31) Opo ontsa yi kale tayi tengele nuupu, ohayi tuka tayi ileke sigo ya adha mpoka pu na ombepo ompyu. Uuna ya thiki po, ohayi yalaleke omawawa gayo, e tayi kala tayi tengele sigo ya yi mombanda muuleeleka. Uuna ontsa tayi tengele yi li mombanda ihayi longitha oonkondo dhayo yene. Sha faathana, aantu mboka yi inekela muKalunga, okuye haya kala ya tala, molwaashoka ‘oonkondo kadhi li muyo yene, ihe odhi li muKalunga.’ — 2 Aakorinto 4:7, 8.

Manga Jesus inaa sa, okwa li a tala Jerusalem, oshilandopangelo shaJudea. Okwe shi lili a ti: “Jerusalem, Jerusalem! Ongoye ho dhipaga aahunganeki noho dhipaga nomamanya aatumwa yaKalunga. Olungapi nda li nda hala okugongela aamwoye, ngaashi ondjuhwa hayi gongele uuyuhwena wayo meni lyomawawa gayo, ihe inamu hala.” — Mateus 23:37.

Iikwamawawa oya shitwa nehalo lyokugamena uunimona wayo. Mbyoka hayi utamanene pevi, ngaashi oondjuhwa, ohayi kala tayi tala kehe shoka tashi vulu okuyakula po uunimona wayo. Uuna ondjuhwa ya mono ekodhi tali tuka, ohayi londodha uuyuhwena wayo. Shampa uuyuhwena wu uvu yina te wu londodha, ohawu tondokele nziya momawawa ge. Omo wo hawu yi, ngele ku na omutenya nenge taku lokwa noonkondo. Jesus naye okwa li wo a hala okugamena pambepo aakalimo yomuJerusalem. Ote tu hiya wo kunena tu ye kuye pathaneko tu imonene evululuko, ye e tu kwathele komitenge dhetu nokiimpwiyu mbyoka tu na monkalamwenyo. — Mateus 11:28, 29.

Osha yela kutya otatu ilongo ko oshindji kiikwamawawa. Sho to tala shoka tayi ningi, kambadhala okudhimbulukwa omifethelamo ndhoka tadhi popi kombinga yayo mOmbiimbeli. Evalelanganda nali tu kwathele tu kale nolupandu lwokupandula ehala mpoka Jehova ha longelwa. Tse natu kale aluhe hatu pula oonkondo kuKalunga, opo tu vule okutengela pathaneko twa fa ontsa. Onawa wo tu ye kuJesus pathaneko, opo e tu kwathele tu tseye oshili yOmbiimbeli ndjoka tayi ke tu gamena, ngaashi ondjuhwa hayi gamene uuyuhwena wayo. Yo onkumbinkumbi ndjoka yi shi ethimbo lyayo, nayi tu kwathele tu kale twa tonatela iinima mbyoka tayi ningwa muuyuni pethimbo lyetu, mbyoka tayi tu ulukile kutya otu li momasiku gahugunina.