DHILADHILA KWAASHIKA: Natu tye ando otu ulukilwa momisiuma mu udha iikulunima. Oyindji oyi na omambondokela, oya shunduka noya kwenyuka. Yo yimwe iitopolwa yayo oyindji kayi po. Ihe omu na oshikulunima shimwe shi ihwapo nomutungilo gwasho gwa kitakana ogu li nawa natango. Owa pula ngoka te ku ulukile mo, to ti: “Shika osho oshipe kiikwawo?” Ye ota ti: “Aawe, oshikulu kwaayihe, noinashi ningululwa.” Owe mu pula to ti: “Osha kwatwa owala nawa?” Ye ota ti: “Aawe, oshe enda mombepo nomomvula. Aayonaguli oyendji oya kambadhala oku shi yonagula po.” Otashi vulika wu ipule wa kumwa to ti: ‘Osha ningwa moshike?’

Ombiimbeli oyi li ngaashi oshikulunima shoka oshikumithi. Oyo embo ekulukulu komambo ogendji. Oshoshili kutya opu na omambo galwe omakulu. Ihe ngaashi iikulunima ya kunyuka, iinyolwa oyindji iikulu oya yonagulwa nayi momukokomoko gwethimbo. Pashiholelwa, shoka ya popya kombinga yuunongononi itashi tsu kumwe nuuyelele uupe mboka wa kolekwa kuumbangi mboka wu li po. Omayele gopaunamiti ngoka ge li mo, olundji ohaga etele aantu oshiponga pehala lyoku ya kwathela. Iinyolwa oyindji yonale iipambu yowala yi li po, niitopolwa yimwe yayo oya kana nenge ya yonagulwa nayi.

Ihe Ombiimbeli oya yooloka ko kuyo. Oya nyolwa pwa pita omimvo dhi vulithe po 3 500, ihe oyi ihwa po natango. Nonando oya kala nokuponokelwa lwiikando uule womimvo omayuvi, ya fikwa po, yi indikwa okulongithwa noya dhinika, oohapu dhayo odhi ihwa po natango. Uuyelele wopashinanena inawu vula okuulika kutya Ombiimbeli oyonkuluyonale, oshoka oya popya oshindji kombinga yonakuyiwa. — Tala oshimpungu “Oyonkuluyonale nenge oyi li pethimbo?”

Otashi vulika wu ipule to ti: ‘Omalongo gOmbiimbeli oge na ngaa oshilonga kunena?’ Opo wu mone eyamukulo, ipula to ti: ‘Omaupyakadhi geni ga kwata miiti haga adha aantu kunena? Ogeni gomugo haga tilitha unene aantu?’ Otashi vulika wu dhiladhile kiita, kenyateko lyomudhingoloko, komiyonena nenge kuulingilingi. Ngashingeyi natu kundathaneni omakotampango gamwe gOmbiimbeli. Sho tatu shi ningi, ipula ngeyi: ‘Ando aantu oya li haya vulika komakotampango ngaka, mbela ando uuyuni kawu li nawa?’

OKUHOLA OMBILI

“Aanelago aakondjeli yombili, oshoka oyo taa ki ithanwa aana yaKalunga.” (Mateus 5:9) “Ne yene kombinga yeni ningeni ashihe tamu shi vulu, mu kale nombili naantu ayehe.” — Aaroma 12:18.

OHENDA NEDHIMINOPO

“Aanelago aanamutimahenda, oshoka oyo taa ka silwa ohenda.” (Mateus 5:7) “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa [Jehova *] e mu dhimine po.” — Aakolossa 3:13.

UUKUMWE WOMIHOKO

“Kalunga okwa kutha omihoko adhihe dhaantu momulumentu gumwe nokwe ya tula kombanda yevi alihe.” (Iilonga 17:26) “Kalunga aantu ayehe ohe ya tala ko ye thike pamwe. Ngoka he mu tila noha longo shoka shu uka, Kalunga ote mu taamba.” — Iilonga 10:34, 35.

OKUSIMANEKA OPULANETE YETU, EVI

“Omuwa Kalunga okwa langeke omuntu meyana lyaEden, opo e li longe ye e li keelele.” (Genesis 2:15) Kalunga ota ka ‘hanagula po mboka taa yonagula evi.’ — Ehololo 11:18.

OKUTONDA OLWIHO NOLUHONDELO

“Angaleni ne mu ikotokele kombinga yuuhalu weliko, oshoka okukalamwenyo kwomuntu kombanda yevi itaku lelepekwa kowindji weliko lye.” (Lukas 12:15) “One aantu yaKalunga, onkee itashi vulika, mokati keni tamu uvika oluhondelo niilonga ya nyata yoludhi kehe nolwiho.” — Aaefeso 5:3.

OKUKALA OMUNASHILI NOKULONGA NUUDHIGININI

“Otwa hala aluhe okulonga shoka shi li mondjila” nenge okukala aanashili miinima ayihe. (Aahebeli 13:18) “Omufuthi na ethe po okuyaka kwe, ye a tameke okwiilongela sha.” — Aaefeso 4:28.

ESIMANO LYOKUKWATHELA MBOKA YE NA OMPUMBWE

“Tseni aambanda omukumo, ambidhidheni aankundi ne mu idhidhimikile ayehe.” (1 Aatessalonika 5:14) ‘Sileni oshimpwiyu oothigwa naaselekadhi muudhigu wawo.’ — Jakob 1:27.

Ombiimbeli inayi tumbula owala omakotampango ngoka. Otayi tu longo momikalo dhi na oshilonga tu kale twe ga lenga notu ga tule miilonga esiku kehe. Ando aantu oyendji oya li haya tula miilonga omakotampango ngoka, ando muuyuni kunena kamu na omaupyakadhi ogendji. Osha yela kutya omakotampango gOmbiimbeli oga simana noonkondo noge li pethimbo. Ihe mbela omalongo gOmbiimbeli otage ku kwathele ngiini kunena?

Omuntu gumwe omunandunge a shiga ko okwa tile: ‘Uunongo ohawu hololwa kiilonga.’ (Mateus 11:19) Mbela ito tsu kumwe nasho? Uunongo washili ohawu imonikila momukalo moka hawu longithwa. Onkee ano, otashi vulika wu ipule to ti: ‘Ngele Ombiimbeli oyi na oshilonga, mbela kayi na okulundulula onkalamwenyo yandje? Otayi kwathele ndje ngiini nomaupyakadhi gandje?’ Tala koshiholelwa shimwe.

Onkalamwenyo yaDelphine  * oya li yi ipyakidhila noyinyanyudha. Ombaadhilila, okwa mono omaupyakadhi ga landulathana. Okamwanakadhona komimvo omulongo nasha oka si, ondjokana ye oya teka nuuhupilo we owa tameke okushongola. Okwa ti: “Kanda li we ndi shi kutya onkalamwenyo yandje oyu uka peni, oshoka kandi na we okamwandjekadhona, omusamane negumbo. Onda li ndu uvite kaandi na oshilonga, kaandi shi we kutya onda thikama peni, kaandi na omukumo nokaandi na etegameno lyonakuyiwa.”

Delphine okwa li a mono uushili woohapu ndhika tadhi ti: “Oomvula dhokukalamwenyo kwetu omilongo heyali, nongele odhindji, omilongo hetatu, ihe odhi na uudhigu noluhodhi; otadhi piti po mbala twa fa twa tuka.” — Episalomi 90:10.

 Delphine okwa kwathelwa kOmbiimbeli sho a li muudhigu. Shoka ye mu ningile oshindhindhilikwedhi. Ngaashi iitopolwa itatu ya landula ko tayi ke shi ulika, aantu yalwe oya mona wo kutya Ombiimbeli oye ya kwathela sho ya tula omayele gayo miilonga, opo ya kandule po omaupyakadhi gawo. Oyu uvite kutya Ombiimbeli oyi li ngaashi oshikulunima shoka sha hokololwa petameko. Yo inayi fa omambo ogendjigendji ngoka haga kulupa nokungushuluka. Mbela Ombiimbeli oya yooloka ko kugo, molwaashoka oohapu dhayo dhi ili? Mbela oyi na omadhiladhilo gaKalunga, ihe hagaantu? — 1 Aatessalonika 2:13.

Otashi vulika nangoye wa mona kutya onkalamwenyo ofupi noyu udha omaupyakadhi. Uuna wa gwililwa po komaupyakadhi oho kongo peni ehekeleko, eyambidhidho nomayele ge shi okwiinekelwa?

Natu taleni omikalo ndatu dha simana moka Ombiimbeli tayi vulu oku ku kwathela monkalamwenyo. Otayi vulu oku ku longa nkene wu na

1. okuyanda omaupyakadhi mpoka tashi wapa.

2. okukandula po uudhigu ngele wa holoka po.

3. okwiidhidhimikila oonkalo ndhoka itoo vulu okulundulula.

Iitopolwa tayi landula otayi ka kundathana omikalo ndhoka ndatu.