Omukiintu gwedhina Blessing * okwa li a thiki moEuropa e na etegameno lyokukala ta longo moSalona. Ihe konima yomasiku omulongo ngoka a kala ta dhengwa nokutilithwa kutya yaandjawo otaya ka monithwa oshiponga, okwa li a kondjithwa a ninge ombwanda.

Blessing okwa li a tegelelwa a longe oshimaliwa shi thike pooeuro 200 sigo 300 uusiku kehe, opo a vule okufuta oongunga dhomuhona gwe ndhoka dhi vule pooeuro 40 000. * Blessing okwa ti: “Olundji onda li handi kala nda hala okufadhuka po. Ihe onda li nda tila shoka tashi vulu okuningilwa yaandjetu. Onda li nda mangwa shili.” Shoka a ningilwa osha ningilwa wo yalwe omamiliyona gane, mboka ya falwa muupikwa wokulandithwa po momilalo.

Omugundjuka Josef okwa li a landithwa po kaamwahe, ngashingeyi pwa pita omimvo 4 000 lwaampono. Okwe ki iyadha e li muupika, megumbo lyelenga muEgipiti. Petameko Josef ka li a ningwa nayi kumwene gwe, ngaashi Blessing. Ihe sho Josef a tindi okuya momilalo nomukulukadhi gwamwene gwe, okwi iyadha ta lundilwa kutya okwa li a hala oku mu kwata onkonga, e ta tulwa mondjedhililo nomomalyenge. — Genesis 39:1-20; Episalomi 105:17, 18.

Josef okwa li omupika muuyuni wonale; ihe Blessing omuuyuni wetu. Ayehe oya li iihakanwa yoshinima oshikulukulu shokukondjithila aantu omilalo, oshinima shoka sha ningitha aantu ya kale owala ye na ko nasha noshimaliwa shoka taya mono, ihe hanaantu.

Iita oye shi ningitha oshipu, opo aantu yi imonene aapika. Omukwaniilwa gwaEgipiti, Thutmose omutitatu, okwa li a fala oonkwatwa 90 000 kuEgipiti, okuza miita mbyoka ya kondjwa muKaanan. Aaegipiti oya  li haya longitha aapika moomina, mokutunga ootempeli nomokufula omikanka dhomeya.

Pethimbo lyUukwaniilwa waRoma, iita oye etitha pu kale aapika oyendji. Omathimbo gamwe uuna ya hala aapika oya li haya tukula iita. Otaku tengenekwa kutya sho kwa thikwa momumvo 1-100 lwaampono, omwaalu gwaapika ogwa li tagu ihilile petata lyaakalimo yomuRoma. Aapika oyendji muEgipiti nomuRoma oya li haya ningwa onyanya. Aapika muRoma oya li owala haya kala nomwenyo sigo olwopomimvo 30.

Mokweendela ko kwethimbo, uupika inawu hwepopala nando. Okuza momumvo 1501-1900 lwaampono, okulanditha aapika pokati kaAfrika naAmerika, okwa kala taku dhana onkandangala. O-UNESCO oya ti: ‘Otaku tengenekwa kutya aalumentu, aakiintu naanona ye li pokati koomiliyona 25 noomiliyona 30 oya li kwatwa po nokulandithwa po.’ Aantu omathele omayuvi, otaku tiwa kutya oya si sho taya taaguluka efuta lyaAtlantika. Omulumentu gwedhina Olaudah Equiano, ngoka a li a hupu muupika, okwa ti: “Eyayagano lyaakiintu, nokukema kwaantu taya si, oku li oshinima oshinyanyalithi noshitilithi okuhokolola.”

Shinikitha oluhodhi, uupika kawu shi owala oshinima shopandjokonona. Ehangano lyIilonga muuyuni awuhe olya ti kutya aalumentu, aakiintu naanona oomiliyona 21 lwaampono, oye li natango aapika nohaya futwa oshimaliwa oshishona nenge nokuli ihaaya futwa sha. Pethimbo lyetu aapika ohaya longo moomina, moofabilika dhiiyata, haya tholoma oondhopi, nenge haya longo momagumbo. Uupika mboka otawu tsikile, nonando kashi li paveta.

Aapika oyendji oya kondjele emanguluko lyawo, oshoka ohaya ningwa onyanya. Methelemumvo lyotango K.E.N., omukondjelimanguluko gumwe naapika ooyakwawo yalwe 100 000, oya li ya tukulile Roma oshipotha, ihe inaya pondola. Okuza momumvo 1701-1800, aapika kokatuntu kaHispaniola oya li ya tukulile oshipotha mwene gwawo. Okumonithwa iihuna kwaapika miikunino yoomweenge, okwa ningitha moshilongo mu tukuke iita mbyoka ya li ya kwata uule womimvo 13, shoka she ke eta sigo omemanguluko lyoshilongo shaHaiti mo 1804.

Sho Aaisraeli ya zi muupika waEgipiti, osha li esindano enene lyokumangululwa muupika mondjokonona ayihe. Aantu omamiliyona gatatu, tashi vulika oshigwana ashihe oya li ya mangululwa muupika. Oshi li nawa lela sho ya mangululwa. Ombiimbeli oya ti kutya Aaegipiti oye “ya tsike iilonga iidhigu yuupika  taye ya longitha nonyanya.” (Eksodus 1:11-14) Farao okwa li nokuli a gandja oshipango, uunona awuhe uumati wu dhipagwe, opo Aaisraeli kaayi indjipale. —  Eksodus 1:8-22.

Okumangululwa kwAaisraeli okwa li kwi ikalekelwa, oshoka Kalunga oye mwene a yi mo olunyala. Okwa li a lombwele Moses a ti: “Onda mono, nkene aantu yandje taa hepekwa . . . , onkee nda kuluka ndi ya mangulule.” (Eksodus 3:7, 8) Sigo okunena, Aajuda ohaya dhana Opaasa omumvo kehe, opo ya dhimbulukwe oshinima shoka. —  Eksodus 12:14.

Ombiimbeli oya ti kutya “Omuwa, Kalunga ketu, iti idhidhimikile omakoto” notayi tu shilipaleke kutya ina lunduluka. (2 Ondjalulo 19:7; Maleaki 3:6) Kalunga okwa li a tumu Jesus i “igidhile oonkwatwa emanguluko . . . , okumangulula oonakuhepekwa.” (Lukas 4:18) Mbela shika osha hala okutya emanguluko kuupika wo wenewene? Ahawe. Jesus okwa li a tumwa a mangulule aantu muupika wuulunde neso. Konima okwa ka popya a ti: ‘Oshili otayi ke mu mangulula.’ (Johannes 8:32) Oshili ndjoka Jesus a longo aantu ohayi ya mangulula momikalo odhindji kunena. —  Tala oshimpungu “ Okumanguluka muupika woludhi lulwe.”

Kalunga okwa li nokuli a kwathele Josef naBlessing ya manguluke muupika momikalo dha yoolokathana. Oto vulu okulesha ehokololo lyaJosef montopolwa 39 sigo 41 muGenesis. Eindilo lyaBlessing a mangululwe nalyo endhindhilikwedhi.

Sho Blessing a tidhwa moshilongo shimwe shokoEuropa, okwa yi koSpania. Hoka oko a tsakanene nOonzapo dhaJehova e ta tameke okukonakona Ombiimbeli nadho. Molwaashoka okwa li a tokola toko a tule onkalamwenyo ye melandulathano, okwa mono iilonga nokwa pula omuhona gwe ngwiyaka a shunithe pevi oongunga ndhoka ha futu komwedhi. Esiku limwe Blessing okwa dhengelwa komuhona ngoka. Okwa li a hala e mu kuthile po oongunga dhe e te mu pula e mu dhimine po. Oshike sha li she mu ningitha a ninge ngawo? Naye okwa li wo a tameke okukonakona Ombiimbeli nOonzapo dhaJehova. Blessing okwa ti: “Oshili ohayi mangulula omuntu momikalo omikumithi.”

Jehova okwa li u uvu nayi sho Aaisraeli taya monithwa iihuna muEgipiti; oku na wo okukala u uvite nayi, omolwokwaanuuyuuki hoka taku ningwa kunena. Uushili owo kutya opo uupika woludhi kehe wu hule po, opwa pumbwa okuningwa elunduluko enene muulikumwe waantu. Kalunga oku uvaneka kutya ote ke eta po elunduluko lya tya ngaaka. “Otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.” —  2 Petrus 3:13