MBELA opu na esiku wa li wu uvite nayi noonkondo, e to kala wa hala okwiikutha omwenyo? Ngele osho, otashi vulika wu uvite ko kutya Adriana okwa li u uvite ngiini. Okwa li e na uupyakadhi wokukala e na oshimpwiyu sha pitilila nokwa li ha kala a yemata nokee na etegameno lyasha. Andriana okwa li a monika omukithi gwepolimano ngoka hagu mu ningitha a kale a yemata ethimbo alihe.

Dhiladhila wo komulumentu Omujapani, Kaoru, ngoka a li ha sile oshimpwiyu aavali ye aakokele mboka ya li taya ehama. Okwa ti: “Pethimbo mpoka, onda li nda gwililwa po komathiminiko kiilonga. Mokweendela ko kwethimbo, onda kanitha ehalo lyokulya, nokanda li handi kotha nawa. Onda tameke okudhiladhila kutya otandi ka mona owala epepelelo komaupyakadhi gandje, ngele onda si.”

Omulumentu Ojebode gwokoNigeria ota ti: “Onda li handi kala aluhe nda yemata notandi lili. Onkee ano, onda kala nokukonga omukalo moka tandi vulu okwiikutha omwenyo.” Nonando Ojebode, Kaoru naAdriana oya li ya hala okwiidhipaga, inaye shi ninga. Ihe omumvo kehe aantu oyendji ohaye shi ningi.

Oyendji mboka hayi idhipaga aalumentu, molwaashoka ohaya kala ya sa ohoni okupula ekwatho. Jesus okwa ti kutya aavu oya pumbwa omwaaludhi. (Lukas 5:31) Onkee ano, ngele owa polimana noto dhiladhila okwiidhipaga, ino kala wa sa ohoni yokukonga ekwatho. Aantu mboka ya polimana oya mona kutya ekwatho lyopaunamiti ohali ya kwathele yi idhidhimike. Ojebode, Kaoru naAdriana oya mona ekwatho lyopaunamiti ndyoka lye ya kwathela noya hwepopala ngashingeyi.

Oondohotola otashi vulika dhi gandje omiti nenge omayele komuntu ngoka a polimana. Mboka ya polimana oya pumbwa yaandjawo nookuume kawo yu uve ko onkalo yawo, ye yi idhidhimikile, ye ya sile oshimpwiyu noku ya ambidhidha. Ihe kuume kopothingo ngoka omuntu ta vulu okukala e na, oJehova Kalunga, ngoka he tu pe ekwatho ewanawa okuziilila mOohapu dhe.

Aantu mboka ye niwe kepolimano, olundji ohaya pumbwa epango tali tsikile noye na okuninga omalunduluko monkalamwenyo yawo. Ihe ngele oto kondjo nepolimano, oto vulu okukala netegameno lyonakuyiwa ombwanawa ngaashi Ojebode. Okwa ti: “Onda tegelela oku ka mona sho Jesaja 33:24 tayi gwanithwa, ndjoka tayi ti kutya ethimbo otali ya uuna kaapu nando ogumwe ta ka tya: ‘Otandi ehama.’” Ngaashi Ojebode, hekelekwa keuvaneko lyaKalunga ‘lyevi epe’ moka itaamu ka kala we “uuwehame.” (Ehololo 21:1, 4) Euvaneko ndyoka otali ti kutya itapu ka kala we uuwehame wopamadhiladhilo nowopamaiyuvo. Uuwehame woye wopamadhiladhilo itawu ka kala po we nandonando, otawu “ka dhimbiwa thiluthilu.”​— Jesaja 65:17.