Kalunga okwa shita omalutu getu haga vulu okwaaluka uuna twa ningi oshilalo. Uuna olutu lu na uundjolowele lwa tetwa, lwa kwalwa nenge lwa tsuwa, ‘ohalu tameke okwiiyaludha momukalo gumwe gwa kitakana.’ (Johns Hopkins Medicine) Nziya olutu ohalu tameke okulonga opo, ombinzi kaayi tondoke we, lu ningithe omithipa dhombinzi dhi tamunuke, lu aludhe oshilalo nokunkondopaleka ehwata lyoosele.

DHILADHILA KWAASHIKA: Ngele Omushiti okwa shita omalutu getu taga vulu okwaaludha iilalo, mbela itatu vulu okukala neinekelo meuvaneko lye kutya ote ke tu kwathela tu aluke wo pamaiyuvo? Omupisalomi okwa nyola a ti: “Ota aludha mboka ye ehamekwa koomwenyo, nota manga iilalo yawo.” (Episalomi 147:3) Ngele owa uvithwa nayi monakuziwa, ongiini to vulu okukala nuushili kutya Jehova ota ka aludha iilalo yoye ngashingeyi nosho wo monakuyiwa?

Kalunga ote tu uvanekele ta ti: “Ino tila — ongame ndi li pungoye! Ongame Kalunga koye — ino limbililwa! Otandi ku kankameke e tandi ku kwatha; otandi ku gamene notandi ku hupitha.” (Jesaja 41:10) Omuntu ngoka e shi kutya Jehova oku na ko nasha naye, oha kala e na ombili yopamadhiladhilo noonkondo dhokuungaunga nomashongo galwe. Omuyapostoli Paulus onkalo ndjoka okwe yi ithana engungumano lyomomutima, ‘ombili yaKalunga, ndjoka yi vule uunongo auhe wopantu.’ Paulus okwa gwedha ko a ti: “Ngame otandi vulu shaa shoka, oshoka Kristus ota koleke ndje.” — Aafilippi 4:4-7, 9, 13.

Omanyolo ohage tu kwathele tu kale tu na eitaalo momauvaneko gaJehova kombinga yonakuyiwa yaantu. Pashiholelwa, Ehololo 21:4, 5 (ndyoka lya tothwa pepandja tali landula ko) otali tu lombwele shoka ta ka ninga nosho wo kutya omolwashike tatu vulu okukala neinekelo kutya ote ke shi ninga:

• “Ota ka theta omahodhi agehe” momeho gaantu. Jehova ota ka hulitha po okumona iihuna kwetu akuhe niimpwiyu yetu, nokuli niinima mbyoka tayi monika ya fa yaa na oshilonga kuyalwe.

• Omukwaniilwa Omunankondoadhihe gweshito alihe, “ngoka a kuutumba koshipangelapundi” megulu, oku na oonkondo dhokukeelela okumona iihuna nodho ku tu kwathela.

• Jehova okwe tu shilipaleka kutya omauvaneko ge ‘ogoshili noge shi okwiinekelwa.’ Sha hala okutya, edhina lye otali gandja uushili kutya ita kala inaa gwanitha shoka u uvaneka.

“‘Ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.’ Nena ngoka a kuutumba koshipangelapundi, okwa popi a ti: ‘Tala, ngashingeyi iinima ayihe otandi yi ningi iipe!’ Okwa lombwele ndje wo a ti: ‘Nyola oohapu ndhika, oshoka odhoshili nodhi shi okwiinekelwa.’” — Ehololo 21:4, 5.

Eshito nosho wo Ombiimbeli, otayi holola uukwatya waTate yetu gwomegulu. Manga eshito tali tu ulukile kutya Kalunga okwa hala tu mu tseye noku ninge kuume ketu, Ombiimbeli otayi tu lombwele shu ukilila tayi ti: “Hedheni kuKalunga, oye nota hedha kune.” (Jakob 4:8) Iilonga 17:27 otayi ti: “Ke li kokule nomuntu nando ogumwe.”

Sho to longitha ethimbo wi ilonge kombinga yaKalunga, oto ka kala wa tompwa kutya ‘oye omusilishimpwiyu gwoye.’ (1 Petrus 5:7) Uuwanawa wuni hawu zi mokukala twi inekela muJehova?

Dhiladhilila kuToru, gwokoJapani. Okwa tekulwa kuyina Omukriste, ihe okwa li a ningi oshilyo shongenga hayi longo uukolokoshi hayi ithanwa yakuza, yomoJapani. Okwa ti: “Onda li ndi itaala kutya Kalunga oku tonde ndje, nonda li ndi wete kutya omaso gaamboka yopopepi nangame, unene tuu mboka nda li ndi hole, oga li egeelo lyandje.” Toru okwa ti kutya molwaashoka okwa li e na omadhiladhilo ga tya ngaaka, “okwa teya omutse, nokwa ningi epulangunga.” Ota dhimbulukwa nkene a li a hala okukala a simana, okwa ti: “Onda li nda hala okusa ndi li omugundjuka uuna nda dhipaga omuntu a simana e vule ndje, opo ndi iningile edhina.”

Ihe sho ye nomukulukadhi gwe Hannah ya konakona Ombiimbeli, Toru okwa ningi omalunduluko omanene monkalamwenyo ye. Hannah ota ti: “Ondi imonene ko ngaye mwene sho omusamane gwandje ta ningi omalunduluko.” Ngashingeyi Toru ota vulu okupopya e na uushili kutya “oku na Kalunga ngoka e na ko nasha shili nakehe gumwe gwomutse. Ina hala nando ogumwe a se, nokwi ilongekidha okudhimina po mboka tayi iyele ombedhi omolwomapuko gawo. Oha pulakene kukehe  shoka tatu mu lombwele shoka itaatu vulu okulombwela omuntu gulwe nosho wo shoka yalwe itaaya vulu okuuva ko. Monakuyiwa yi li popepi, Jehova ota ka hulitha po omaupyakadhi agehe, okumona iihuna nuuwehame awuhe. Nokuli nongashingeyi, ohe tu kwathele momikalo ndhoka kaatwa li twa tegelela. Ohe tu sile oshimpwiyu nohe tu kwathele uuna twa teka omukumo.” — Episalomi 136:23.

Oshimoniwa shaToru otashi ulike kutya okukala tu shi kutya Kalunga ota vulu nota ka hulitha po iinima ayihe iiwinayi nokutheta omahodhi agehe momeho gaantu itashi tu pe owala etegameno lyonakuyiwa, ihe otashi tu kwathele wo tu kale tu na onkalamwenyo ombwanawa ngashingeyi. Nokuli nomuuyuni mbuka wu udha emono lyiihuna, oto vulu okumona uuwanawa mesiloshimpwiyu lye.