Oyendji oya limbililwa ngele otaya ka kala ngaa nonakuyiwa ombwanawa. Omolwashike mbela? Omolwiinima mbyoka hayi holoka po ombaadhilila, ngaashi omukithi gwo-Corona ngoka gwa faalela oomwenyo dhaantu oyendji. Ogwa guma wo nayi onkalamweyo yaantu nosho wo eliko muuyuni awuhe. Iinima yoludhi ndono ohayi ningitha aantu ya kale ya tila kutya onakuyiwa yawo itayi ka kala ngaashi ya hala.

Molwaashono aantu oya halelela onakuyiwa ombwanawa, ohaya kondjo ya mana mo, opo ye yi mone. Yamwe oyi itaala kutya opu na oonkondo ihaadhi monika, ndhoka hadhi utha kutya onkalamwenyo yoye otayi ka kala ya tya ngiini. Pashiholelwa, oyi itaala kutya omuntu otashi vulika a kale e na elago nenge onkalamwenyo ya nunwa nale. Opu na oyendji mboka taya lalakanene elongo nosho wo uuyamba, oshoka oye wete kutya iinima mbyono otayi ke ya kwathela yi imonene shoka ya hala. Omanga yalwe ye uvite kutya ngele oye na omikalo omiwanawa otaya kala nonkalamwenyo ombwanawa.

Mbela iinima mbyono otayi vulu ngaa oku ku etela onakuyiwa ombwanawa? Opo wu mone omayamukulo, ipula to ti:

• Oshike hashi utha lela kutya omuntu ota ka kala nonakuyiwa ya tya ngiini?

• Mbela elongo nosho wo iimaliwa otayi vulu tuu okweetela omuntu onkalamwenyo ombwanawa?

• Ngele owu na omikalo omiwanawa, mbela shono otashi ti kutya oto ka kala nonakuyiwa ombwanawa?

• Openi to vulu okwaadha omayele ngoka tage ku kwathele, wu ka mone onakuyiwa ombwanawa?

Oshungolangelo ndjika otayi ke ku kwathela wu mone omayamukulo.