1. Abraham oku ulike ngiini einekelo muuyuuki waJehova? (Tala kethano lyopetameko.)

OMBIIMBELI otayi ti: “Omupanguli guuyuni auhe ita longo ando pauyuuki?” (Gen. 18:25) Abraham okwa li e na einekelo kutya Jehova ota ka pangula Sodom naGomorra pauyuuki. Okwa li a tompwa kutya Jehova ke na esiku a longe uuwinayi, ‘a dhipage omuyuuki pamwe nomunandjo.’ Abraham okwa li e wete kutya “itashi vulika” Kalunga a longe uuwinayi. Konima yomimvo 400, Jehova okwa li i ipopi ye mwene a ti: “Oye emanya; iilonga ye oyolela, noondjila dhe adhihe odhu uka. Kalunga omudhiginini kee na uugoyoki, omuyuuki nomunashili.” — Deut. 31:19; 32:4.

2. Omolwashike taku vulu okutiwa kutya Jehova omuyuuki a shiga ko?

² Omolwashike Abraham a li e na einekelo kutya Jehova ota ka pangula aluhe pauyuuki? Molwaashono Jehova oye oshiholelwa sha dhenga mbanda mokulonga uuyuuki, netaloko lye li na ko nasha niinima aluhe oli li pauyuuki. Oshikwawo, Ombiimbeli otayi ti: “Oku hole uuyuuki nuunoshili.” —  Eps. 33:5.

3. Gandja oshiholelwa shi na ko nasha nokwaanuuyuuki hoka ku li muuyuni kunena.

 ³ Ohashi hekeleke aanamitima omiwanawa okutseya kutya Jehova omuyuuki aluhe, molwaashoka uuyuni mbuka owu udha okwaanuuyuuki. Aantu yamwe ohayu ungaungwa nayo shaa li pauyuuki. Pashiholelwa, ohaya tulwa moodholongo molwiinima mbyoka inaaya ninga. Yamwe ohaya ka za mo owala pwa pita omimvo odhindji ngele o-DNA (uuthigululwakwatya) wawo wa konakonwa e taya monika shili kutya kaye na ondjo. Okwaanuuyuuki hoka ohaku ningitha aantu ya kale ya yemata noye na ongeyo. Aakriste otashi vulika nokuli ya mone oshidhigu kuyo okwiidhidhimikila okwaanuuyuuki kulwe hoka taya ningilwa.

4. Eitaalo lyOmukriste otashi vulika li makelwe momukalo guni?

⁴ Aakriste ihaya kala ya tegelela okuningilwa okwaanuuyuuki megongalo. Onkee ano, eitaalo lyetu otashi vulika li makelwe ngele otwa mono nenge twa ningilwa oshinima shoka tashi monika sha fa kaashi li pauyuuki megongalo. Oto ki inyenga ngiini ngele owa ningilwa okwaanuuyuuki megongalo nenge to ungaunga nokwaanuuyuuki hoka kwa holoka pokati koye nOmukriste omukweni? Mbela oto ke etha ku ku pundukithe?

5. Omolwashike kaashi na oku tu kumitha ngele Omukriste a mono nenge a ningilwa okwaanuuyuuki megongalo?

⁵ Molwaashono atuhe inatu gwanenena nohatu ningi omapuko, otwa mona kutya okwaanuuyuuki otaku vulu oku tu ningilwa nenge ku ningilwe gulwe megongalo. (1 Joh. 1:8) Nonando shika otashi vulu okuningwa, Aakriste aadhiginini ihaya kala ya kumwa nenge ya pundukithwe ngele okwaanuuyuuki kwa holoka po. Jehova okwa gandja omayele taga longo okupitila mOohapu dhe ge tu kwathele tu kale aadhiginini, nonando otwa ningilwa okwaanuuyuuki kooyitaali ooyakwetu. —  Eps. 55:12-14.

6, 7. Omumwatate gumwe okwa li a ningilwa okwaanuuyuuki kuni megongalo, noshike sha li she mu kwathele u ungaunge nonkalo ndjono momukalo omwaanawa?

⁶ Natu taleni koshiholelwa shomumwatate Willi Diehl. Okutameka mo 1931, omumwatate Diehl okwa kala ta longo nuudhiginini moBetel yaBern, moSwitzerland. Mo 1946, okwa li a hiti ongundu ontihetatu yosikola yaGilead moNew York, moAmerika. Sho a piti, okwa li a tumwa a ka longe e li omutonatelishikandjo koSwitzerland. Mondjokonona ye, omumwatate Diehl okwa ti: “MuMei mo 1949, onda li nda tseyithile kombelewa onene koBern kutya onda hala okuhokana.” Mbela okwa yamukulwa ko ngiini? “Okwa lombwelwa kutya ita ka kala we e na iinakugwanithwa yasha, kakele owala kokukokola ondjila.” Omumwatate Diehl okwa ti: “Kanda li nda pitikwa ndi gandje iipopiwa . . . Oyendji kaya li haye tu popitha noya li hayu ungaunga natse twa fa twa kondwa.”

⁷ Mbela omumwatate Diehl okwa li u ungaunga ngiini nonkalo ndjono? Okwa ti: “Otu shi shi kutya okuya mondjokana oshi li pamanyolo, onkee, otwa kala tatu galikana notwa kala twi inekela muJehova.” Konima yethimbo etaloko lya puka li na ko nasha nondjokana ndyoka lya li lya ningitha aantu yu ungaunge natse shaa li pauyuuki, olya pukululwa. Omumwatate Diehl okwa li a shunithilwa iinakugwanithwa ye. Omolwuudhiginini we, Jehova okwe mu yambeke. * Otatu vulu okwiipula ngeyi: ‘Mbela ngele onda ningilwa okwaanuuyuuki, otandi ka ulika ngaa uupambepo  wa fa womumwatate Diehl? Mbela otandi ki idhidhimika ngaa e tandi etha Jehova u ukithe iinima nenge otandi ka ungaunga nayo kungaye mwene?’ —  Omayel. 11:2; lesha Mika 7:7.

8. Omolwashike tashi vulika wu thike pehulithodhiladhilo lya puka kutya owu ungaungiwa nangoye shaa li pauyuuki nenge gulwe oku ungaungwa naye shaa li pauyuuki?

⁸ Pompito yimwe, otashi vulika wu dhiladhile papuko kutya owu ungaungwa nangoye shaa li pauyuuki nenge gulwe megongalo oku ungaungwa naye shaa li pauyuuki. Shika otashi vulu okuningwa omolwetaloko lyetu lyokwaagwanenena nenge molwaashoka kaatu shi naanaa uuyelele awuhe moshinima shontumba. Pompito yimwe, kutya nduno otu na uuyelele wa yela moshinima nenge katu wu na, osha simana tu galikane kuJehova notu igameke kuye. Shono otashi ke tu kwathela tu yande ‘okutsa ondumbo nOmuwa.’ —  Lesha Omayeletumbulo 19:3.

9. Otatu ka kundathana iiholelwa yini moshitopolwa shino nomwaashono tashi landula?

⁹ Natu kundathaneni iiholelwa itatu mbyoka ya popiwa mOmbiimbeli yi na ko nasha naapiya yaJehova mboka ya li ya ningilwa okwaanuuyuuki. Moshitopolwa shika otatu ka kundathana kombinga yomutekulululwa gwaAbraham, Josef nkene a li u ungaungwa naye shaa li pauyuuki kaamwahe. Moshitopolwa tashi landula otatu ka konakona nkene Jehova a li u ungaunga nomukwaniilwa gwaIsraeli Abab nosho wo shoka sha li sha ningilwa omuyapostoli Petrus sho a li muAntiokia shomuSiria. Sho tatu konakona iiholelwa mbika tala kutya oto ilongo mo shike shoka tashi ku kwathele wu gandje eitulomo kuupambepo woye nowu kaleke po ekwatathano lyoye naJehova, unene tuu ngele owu na uushili kutya owu ungaungiwa nangoye shaa li pauyuuki.

10, 11. (a) Josef okwa li a ningilwa okwaanuuyuuki kuni? (b) Okwa li a mono ngiini ompito a popye onkalo ye sho a li mondholongo?

¹⁰ Josef ngoka a li omupiya omudhiginini gwaJehova okwa li a ningilwa okwaanuuyuuki. Ka li owala a ningilwa okwaanuuyuuki kaantu yokondje, ihe unene tuu kaamwayina. Sho Josef a li e na omimvo omulongo nasha, aamwayina oya li ye mu yaka po e taye mu landitha po ongomupika. Okwa li a falwa kuEgipiti, kaashi li pahalo lye. (Gen. 37:23-28; 42:21) Konima yethimbo sho a kala moshilongo shaa shi shaandjawo, okwa li a lundilwa kutya okwa kwata omukulukadhi gwaFarao onkonga nokwa li a tulwa mondholongo inaa pangulwa. (Gen. 39:17-20) Josef okwa kala mondholongo ongomupika ta mono iihuna, uule womimvo 13. Oshike tatu ilongo kwaashoka sha li sha ningilwa Josef shoka tashi tu kwathele uuna tatu ningilwa okwaanuuyuuki kooitaali ooyakwetu?

¹¹ Josef okwa li a mono ompito yokupopya onkalo ye komunandholongo omukwawo. Omunandholongo ngoka okwa li nale elenga lyokupindila omukwaniilwa Farao omaviinu. Josef nomupindi gwomaviinu sho ya li mondholongo, omupindi gwomaviinu okwa lala ondjodhi ndjoka ya li ya fatululwa kuJosef. Josef okwa yelitha kutya omupindi gwomaviinu ota ka shuna muulenga we mombala yaFarao. Sho Josef a fatulula ondjodhi yomupindi gwomaviinu, okwa mono ompito yokupopya onkalo ye. Otatu vulu okwiilonga oshindji mwaashoka sha popiwa kuJosef nomwaashoka inaa popya. —  Gen. 40:5-13.

12, 13. (a) Shoka Josef a popi komupindi gwomaviinu otashi ulike ngiini kutya Josef ka li u uvitile nawa okwaanuuyuuki hoka a li a ningilwa? (b) Oshike shono Josef kaa li a kwatele moonkundathana dhe nomupindi gwomaviinu?

¹² Lesha Genesis 40:14, 15. Ndhindhilika kutya Josef okwa longitha oshitya ‘okuyakwa  po’ a yelithe shoka a li a ningilwa. Osha yela kutya, okwa li a ningilwa okwaanuuyuuki. Josef okwa li wo a popi kutya ke na ondjo yasha mwaashoka she mu tulitha mondholongo. Okwa li a lombwele omupindi gwomaviinu e mu popile kuFarao. Mbela okwe shi ningi nelalakano lyashike? Okwa ti: ‘Opo a kuthe ndje mondjedhililo muka.’

¹³ Mbela Josef okwa li owala a taamba ko onkalo ye, ye inaa kambadhala okuninga po sha kombinga yayo? Hasho nando, Josef okwa li lela e shi okwaanuuyuuki okundji hoka a ningilwa. Okwa yelithile omupindi gwomaviinu onkalo ye, ngoka a li e wete kutya otashi vulika e mu kwathele. Ndhindhilika kutya mOmanyolo inamu popiwa kutya Josef okwa li a lombwele Farao nenge aantu yalwe kutya aamwayina oyo ya li ye mu yaka po. Sho aamwayina yaJosef ye ya kuEgipiti e taa panga ombili naJosef, Farao okwa li e ya hambelele nokwe ya lombwele ya ninge omagumbo gawo muEgipiti noya nyanyukilwe “iinima ayihe iiwanawa yomuEgipiti.” —  Gen. 45:16-20.

14. Oshike tashi ke tu gamena komwigo gwokupopya oohapu oombwinayi, nonando otwa ningilwa okwaanuuyuuki megongalo?

¹⁴ Ngele Omukriste okwa mono kutya oku ungaungiwa naye shaa li pauyuuki, oku na na okukala a kotoka kaa kuthe ombinga moluhoko. Oshi li nawa a konge ekwatho kaakuluntugongalo noku ya lombwele kutya gumwe megongalo okwa ninga sha sha puka. (Lev. 5:1) Onkee ano, miinima oyindji mbyoka inaayi kwatela mo omayono ga kwata miiti, otashi vulika shi kale shi li nawa okukandula po uupyakadhi inaamu kwatelwa nando aantu yalwe, kutya nduno aakuluntugongalo. (Lesha Mateus 5:23, 24; 18:15.) Natu kale aadhiginini mokutula miilonga omakotampango gOmbiimbeli uuna tatu ungaunga noonkalo dha tya ngaka. Omathimbo gamwe otashi vulika tu shi dhimbulule mo kutya hatse twa li twa ningilwa oshinima shontumba shoka twa li twaa uvite ko nawa. Otatu ka kala twa nyanyukwa, molwaashono inaatu nayipaleka onkalo mokutaandelitha oohapu oombwinayi kombinga yAakriste ooyakwetu. Natu dhimbulukweni kutya nonando  otu li mondjila nenge hasho, okutaandelitha oohapu tadhi ehameke kaku na esiku ku lundulule onkalo. Okukala aadhiginini kuJehova nokaamwatate otashi tu gamene kaatu ninge omapuko ga fa mpo. Omupisalomi okwa popi a ti: ‘Omuntu ngoka ha vulika kuKalunga miinima ayihe, naango ihaa lundile mukwawo, iha ningile ookuume ke uuwinayi ye iha hokola aashiinda ye.’ —  Eps. 15:2, 3; Jak. 3:5.

15. Ekwatathano lyaJosef naJehova olyu ulike ngiini kutya Jehova okwe mu yambeka?

¹⁵ Mekwatathano lyaJosef naJehova otatu ilongo mo oshinima sha simanenena. Uule womimvo 13 ndhoka a kala mondholongo, Josef oku ulike kutya oha tala ko iinima ngaashi Jehova. (Gen. 45:5-8) Ina pa nando Jehova uusama omolwonkalo ndjoka a li muyo. Nonando ina dhimbwa uuwinayi mboka a ningilwa, ina kala a geya. Shoka sha simanenena, ine etha nando okwaagwanenena nomapuko gayalwe ge mu ethithe po Jehova. Uudhiginini we owe mu kwathele a mone nkene Jehova tu ungaunga nokwaanuuyuuki hoka a li a ningilwa, nonkene e mu yambeke noyaandjawo.

16. Omolwashike tu na okuhedha lela popepi naJehova ngele otwa ningilwa okwaanuuyuuki megongalo?

¹⁶ Momukalo gwa faathana, otu na okukala twa lenga nokugamena ekwatathano lyetu naJehova. Inatu e tha nando okwaagwanenena kwayalwe ku tu ethithe po Jehova ngoka tu hole nohatu longele. (Rom. 8:38, 39) Pehala lyaashono, ngele otwa ningilwa okwaanuuyuuki kooitaali ooyakwetu, natu kale twa fa Josef e tatu hedha lela popepi naJehova, tse tatu lalakanene okukala tu na etaloko lya fa lye. Uuna twa ningi ashihe shoka tatu vulu mestokumwe nOmanyolo, natu ethele iinima momake gaJehova, tu na einekolo kutya ote ke yi opaleka pethimbo lye lyo opala nomomukalo gu uka.

17. Ongiini tatu vulu okuulika kutya otwi inekela “Omupanguli guuyuni auhe”?

¹⁷ Omanga tu li muuyuni mbuka, otatu vulu okuningilwa okwaanuuyuuki. Omathimbo gamwe ngoye nenge gulwe ngoka wu shi, otashi vulika mu ningilwe okwaanuuyuuki nenge mu mone oshinima tashi monika sha fa kaashi li pauyuuki tashi ningwa megongalo. Ihe nonando ongawo, ino etha wu pundukithwe. (Eps. 119:165) Pehala lyaashono, tu li aapiya yaKalunga, ohatu kala twi inekela muye tatu shi ningi nuudhiginini pamwe negalikano. Ohatu ulike eifupipiko, molwaashoka kaatwa li tu uvite ko naanaa ashihe shoka sha kwatelwa mo. Otu shi shi nawa kutya omolwokwaagwanenena kwetu, ohashi vulika tu kale tu na etaloko lya puka moshinima shontumba. Ngaashi twi ilongo moshiholelwa shaJosef, otwa hala okuyanda omapopyo omawinayi, molwaashoka otu shi kutya otaga nayipaleke owala onkalo. Lwahugunina, pehala lyokukambadhala okukandula po uupyakadhi kutse yene, natu kale twa tokola okukala aadhiginini nokutegelela Jehova u ukithe iinima. Uuna tatu ningi ngawo, Jehova ote ke tu yambeka shili, ngaashi naanaa a li e shi ningile Josef. Odhoshili kutya otatu vulu okukala nuushili kutya Jehova, “Omupanguli guuyuni auhe,” oha longo aluhe shoka shi li mondjila, oshoka ‘oondjila dhe adhihe odhu uka.’ —  Gen. 18:25; Deut. 32:4.   

18. Oshike tatu ka kundathana moshitopolwa tashi landula?

¹⁸ Moshitopolwa tashi landula otatu ka kundathana iiholelwa iyali ya gwedhwa po yi na ko nasha nokwaanuuyuuki hoka kwa li kwa ningilwa aapiya yaJehova yopethimbo lyOmbiimbeli. Iiholelwa mbika otayi ke tu kwathela tu mone nkene eifupipiko nosho wo okukala nehalo lyokudhimina po ya pambathana nankene Jehova ha tala ko iinima pauyuuki.